விளக்கமறியலில் உள்ள ஷிராந்தி ராஜபக்ஷ நாளை தேசிய கண் வைத்தியசாலைக்கு கொண்டு செல்ல தீர்மானம்

விளக்கமறியலில் வைக்கப்பட்டுள்ள முன்னாள் முதன்மை பெண்மணி (First Lady) ஷிராந்தி ராஜபக்ஷவை, கொழும்பிலுள்ள தனியார் வைத்தியசாலை ஒன்றிற்கு சிகிச்சைக்காக இடமாற்றம் செய்ய வேண்டாம் என சிறைச்சாலைகள் திணைக்களம் தீர்மானித்துள்ளது.

சிறைச்சாலைகள் ஊடகப் பேச்சாளரும் சிறைச்சாலைகள் ஆணையாளருமான சேனக பல்லேதென்ன இது குறித்து தெரிவிக்கையில், ஷிராந்தி ராஜபக்ஷ சிறைச்சாலை வைத்தியசாலையின் விசேட வைத்திய நிபுணர் ஒருவரால் பரிசோதிக்கப்பட்டதாகக் குறிப்பிட்டார்.

குறித்த மருத்துவப் பரிசோதனையைத் தொடர்ந்து, மேலதிக விசேட மருத்துவ ஆலோசனைகளுக்காக அவரை கொழும்பு தேசிய கண் வைத்தியசாலைக்கு அழைத்துச் செல்லுமாறு விசேட வைத்திய நிபுணர் பரிந்துரைத்துள்ளார்.

முன்னாள் ஜனாதிபதி மஹிந்த ராஜபக்ஷவின் மனைவியான ஷிராந்தி ராஜபக்ஷ, இலஞ்ச அல்லது ஊழல் பற்றிய குற்றச்சாட்டுகளைப் புலனாய்வு செய்வதற்கான ஆணைக்குழுவினால் (CIABOC) கைது செய்யப்பட்டிருந்தார்.

அதனைத் தொடர்ந்து, கொழும்பு மேலதிக நீதிவான் நீதிமன்றத்தில் ஆஜர்படுத்தப்பட்ட அவரை, எதிர்வரும் ஒக்டோபர் 13 ஆம் திகதி வரை விளக்கமறியலில் வைக்குமாறு நீதிவான் உத்தரவிட்டிருந்தார்.

லேடி ரிட்ஜ்வே சிறுவர் வைத்தியசாலைக்கு கணினி வழி வரைவி வரைவி அலகை (CT scanner - சி.டி. ஸ்கேனர்) கொள்வனவு செய்வதாகக் கூறி, சிறிளிய சவிய அமைப்பின் ஊடாக தேசிய சேமிப்பு வங்கியிடமிருந்து (NSB) 10 மில்லியன் ரூபாய் பெற்றுக் கொள்ளப்பட்டதாகக் கூறப்படும் குற்றச்சாட்டு தொடர்பிலேயே இந்த நடவடிக்கை எடுக்கப்பட்டுள்ளது.

எனினும், குறித்த சி.டி. ஸ்கேனர் கருவி வைத்தியசாலைக்கு வழங்கப்படவில்லையெனவும், அந்த நிதி துஷ்பிரயோகம் செய்யப்பட்டுள்ளதாகவும் புலனாய்வு அதிகாரிகள் குற்றம் சுமத்தியுள்ளனர்.

இதனடிப்படையில், பொதுச் சொத்துக்கள் சட்டத்தின் கீழ் முறைகேடு செய்தமை மற்றும் அரச நிதியை துஷ்பிரயோகம் செய்தமை உள்ளிட்ட ஊழல் குற்றச்சாட்டுகளின் கீழ் ஷிராந்தி ராஜபக்ஷ மீது வழக்கு பதிவு செய்யப்பட்டுள்ளமை குறிப்பிடத்தக்கது.