விதிமுறைகளை மீறிய 11 நிறுவனங்களுக்கு மத்திய வங்கி 14.6 மில்லியன் ரூபா அபராதம்
விதிமுறைகளுக்கு அமையச் செயற்படத் தவறியமைக்காக 11 நிதி நிறுவனங்களுக்கு மொத்தமாக 14.6 மில்லியன் ரூபா அபராதம் விதித்துள்ளதாக இலங்கை மத்திய வங்கியின் நிதி உளவுப் பிரிவு (FIU) அறிவித்துள்ளது.
2025 அக்டோபர் முதல் 2026 மார்ச் வரையான காலப்பகுதியில், 2006 ஆம் ஆண்டின் 6 ஆம் இலக்க நிதிச் கொடுக்கல் வாங்கல்கள் அறிக்கைப்படுத்தல் சட்டத்தின் (FTRA) விதிகளைக் கடைப்பிடிக்கத் தவறிய நிறுவனங்களுக்கே இந்த அபராதம் விதிக்கப்பட்டுள்ளது.
பணச் சலவை எதிர்ப்பு மற்றும் பயங்கரவாதத்திற்கு நிதியளிப்பதைக் தடுத்தல் (AML/CFT) தொடர்பான இலங்கையின் ஒழுங்குமுறை அமைப்பாகச் செயற்படும் நிதி உளவுப் பிரிவு, குறித்த சட்டத்தின் 19(1) மற்றும் 19(2) பிரிவுகளின் கீழ் இந்த நிர்வாகத் தண்டப் பணத்தை விதித்துள்ளது.
நிறுவனங்களில் கண்டறியப்பட்ட விதிமீறல்களின் தன்மை மற்றும் பாரதூரத்தன்மை ஆகியவற்றின் அடிப்படையிலேயே இந்த அபராதத் தொகைகள் தீர்மானிக்கப்பட்டதாக மத்திய வங்கி சுட்டிக்காட்டியுள்ளது.
அபராதமாக சேகரிக்கப்பட்ட அனைத்துப் பணமும் அரசாங்கத்தின் திரட்டப்பட்ட நிதியத்தில் (Consolidated Fund) வைப்பிலிடப்பட்டுள்ளதாக மத்திய வங்கி உறுதிப்படுத்தியுள்ளது.
அறிக்கைப்படுத்தும் நிறுவனங்களிடையே விதிமுறைகளுக்கு இணங்கி நடக்கும் தன்மையை வலுப்படுத்தவும், இலங்கையின் நிதித் தொகுதியின் ஒருமைப்பாட்டை உறுதிப்படுத்தவும் முன்னெடுக்கப்பட்டு வரும் தொடர்ச்சியான முயற்சிகளின் ஒரு பகுதியாகவே இந்த நடவடிக்கை எடுக்கப்பட்டுள்ளதாக மத்திய வங்கி மேலும் தெரிவித்துள்ளது
