குடிநீர் போத்தலை அதிக விலைக்கு விற்ற விடுதிக்கு 10 லட்சம் அபராதம்!
அரசாங்கத்தினால் நிர்ணயிக்கப்பட்ட அதிகபட்ச சில்லறை விலையை விட (MRP) மேலதிக தொகைக்கு குடிநீர் போத்தலை விற்பனை செய்த குற்றத்திற்காக, கிளஸ்டர் ஹோல்டிங்ஸ் (தனியார்) நிறுவனத்திற்கு சொந்தமான பண்டாரவளை ஓய்வு விடுதிக்கு 10 லட்சம் ரூபாய் அபராதம் விதிக்கப்பட்டுள்ளது.
நுகர்வோர் விவகார அதிகாரசபையினால் (CAA) தொடரப்பட்ட வழக்கில், குறித்த நிறுவனம் குற்றத்தை ஒப்புக்கொண்டதை அடுத்து, பண்டாரவளை நீதவான் நீதிமன்றம் ஒக்டோபர் 07 ஆம் திகதி இந்த தண்டப் பணத்தை விதித்து உத்தரவிட்டது.
கடந்த செப்டம்பர் 23 ஆம் திகதி நுகர்வோர் விவகார அதிகாரசபையின் அதிகாரிகளால் மேற்கொள்ளப்பட்ட திடீர் சோதனையின் போதே இசம்பவம் வெளிச்சத்திற்கு வந்துள்ளது. அரசாங்கத்தினால் 120 ரூபாய் என நிர்ணயிக்கப்பட்ட ஒரு லீற்றர் குடிநீர் போத்தல் ஒன்று, அங்கு 200 ரூபாய்க்கு விற்பனை செய்யப்பட்டுள்ளமை கண்டறியப்பட்டது.
அனுமதிக்கப்பட்ட விலையை விட 80 ரூபாய் மேலதிகமாக, அதாவது சட்டப்பூர்வமான விலையை விட சுமார் 67 சதவீதம் அதிக விலைக்கு இந்த குடிநீர் போத்தல் விற்பனை செய்யப்பட்டுள்ளது.
இதனைத் தொடர்ந்து நடத்தப்பட்ட விசாரணைகளின் அடிப்படையில், நுகர்வோர் விவகார அதிகாரசபையினால் குறித்த நிறுவனத்திற்கு எதிராக சட்ட நடவடிக்கை எடுக்கப்பட்டு, இந்த 10 லட்சம் ரூபாய் அபராதம் விதிக்கப்பட்டுள்ளது.
ஹோட்டல்கள், உணவகங்கள் உள்ளிட்ட அனைத்து வர்த்தக நிறுவனங்களும் அரசாங்கத்தினால் நிர்ணயிக்கப்பட்ட கட்டுப்பாட்டு விலைகளை கண்டிப்பாக பின்பற்ற வேண்டும் என நுகர்வோர் விவகார அதிகாரசபை இதன்போது நினைவூட்டியுள்ளது.
மேலும், கட்டுப்பாட்டு விலைக்குட்பட்ட பொருட்களைக் கொள்வனவு செய்யும் போது நுகர்வோர் விழிப்புணர்வுடன் செயல்பட வேண்டும் என்றும், வர்த்தகர்கள் முறைகேடுகளில் ஈடுபட்டால் 1977 என்ற உடனடி தொலைபேசி இலக்கத்தின் (Hotline) ஊடாக அலுவலக நேரத்தில் நுகர்வோர் விவகார அதிகாரசபைக்கு முறைப்பாடு செய்யுமாறும் பொதுமக்களுக்கு கோரிக்கை விடுக்கப்பட்டுள்ளது.
