பெண்கள் சுகாதாரத்திற்காக புதிய பிரிவு, விசேட பணிக்குழு – ட்ரம்ப் அதிரடி அறிவிப்பு!

அமெரிக்காவில் பெண்களின் சுகாதாரத்தை மேம்படுத்தும் நோக்கில், தேசிய சுகாதார நிறுவனத்தின் (NIH) கீழ் புதிய பெண்கள் சுகாதாரப் பிரிவையும், வெள்ளை மாளிகையின் கீழ் விசேட பணிக்குழுவையும் அமைப்பதற்கான நிறைவேற்று உத்தரவில் அமெரிக்க ஜனாதிபதி டொனால்ட் ட்ரம்ப் திங்கட்கிழமை கையெழுத்திட்டுள்ளார்.

வெள்ளை மாளிகை வெளியிட்ட தகவலின்படி, அமெரிக்காவின் முதல் பெண்மணி மெலானியா ட்ரம்பும் இந்த நிகழ்வில் பங்கேற்றுள்ளார்.

இந்தப் புதிய பணிக்குழுவுக்கு ட்ரம்பின் வெள்ளை மாளிகை தலைமைப் பணியாளர் சூசி வைல்ஸ் மற்றும் அமெரிக்க சுகாதாரச் செயலாளர் ரொபர்ட் எப். கென்னடி ஜூனியர் ஆகியோர் தலைமை தாங்கவுள்ளனர். அண்மையில் சூசி வைல்ஸ், தமக்கு புற்றுநோய் பாதிப்பு இல்லை என அறிவித்திருந்தார்.

புதிய பெண்கள் சுகாதாரப் பிரிவு, தேசிய சுகாதார நிறுவனத்தின் (NIH) கீழ் ஏற்கனவே இயங்கிவரும் பெண்கள் சுகாதார ஆராய்ச்சி அலுவலகத்துக்குப் பதிலாக அமைக்கப்படுவதில்லை. மாறாக, ஆராய்ச்சியைத் தாண்டி விரிவான பொறுப்புகளுடன் இந்தப் பிரிவு செயற்படவுள்ளது.

பெண்களின் சுகாதாரம் தொடர்பான ஆராய்ச்சிகளில் காணப்படும் குறைபாடுகளைக் களைவது, மருத்துவச் சேவைகளை நவீனமயப்படுத்துவது மற்றும் பெண்களுக்கான சுகாதாரப் பராமரிப்பை மேம்படுத்துவது ஆகியவை இந்த முயற்சியின் முக்கிய நோக்கங்களாகக் குறிப்பிடப்பட்டுள்ளன.

மேலும், பெண்களின் சுகாதாரம் தொடர்பான புதிய கண்டுபிடிப்புகளை விரைவுபடுத்துவதற்கு செயற்கை நுண்ணறிவுத் தொழில்நுட்பத்தைப் பயன்படுத்துவதன் அவசியம் குறித்தும், மருத்துவச் சேவைகளை அனைவரும் அணுகக்கூடியதாகவும் செலவுக்கேற்ற வகையிலும் மாற்றுவது குறித்தும் மெலானியா ட்ரம்ப் நிகழ்வில் உரையாற்றவுள்ளதாக வெள்ளை மாளிகை அதிகாரி ஒருவர் தெரிவித்துள்ளார்.

எனினும், ட்ரம்ப் நிர்வாகம் சுகாதாரத் துறைக்கான செலவுகளைக் குறைப்பதற்கான நடவடிக்கைகளை முன்னெடுத்து வரும் நிலையில், இந்தப் புதிய அறிவிப்பு வெளியாகியுள்ளது. தேசிய சுகாதார நிறுவனம் உள்ளிட்ட சுகாதார அமைப்புகளுக்கான நிதியைக் குறைப்பதற்கும், கடந்த ஆண்டு மத்திய அரசின் சுகாதாரப் பணியாளர் எண்ணிக்கையைக் குறைப்பதற்கும் நிர்வாகம் நடவடிக்கை எடுத்திருந்தது.

ட்ரம்பின் இரண்டாவது பதவிக்காலத்தில், பன்முகத்தன்மை தொடர்பான தலைப்புகளில் மேற்கொள்ளப்படும் ஆராய்ச்சிகளுக்கான தேசிய சுகாதார நிறுவனத்தின் நிதியுதவிகளைக் குறைக்கவும் நடவடிக்கைகள் முன்னெடுக்கப்பட்டதாகத் தெரிவிக்கப்படுகிறது. சுகாதார ஆராய்ச்சிகளுக்கான நிதி ஒதுக்கீட்டில் அரசியல் நியமனதாரர்கள் கட்டுப்பாட்டைச் செலுத்த அனுமதிக்கும் நடவடிக்கைகளும் முன்னெடுக்கப்படுவதாகத் தகவல்கள் வெளியாகியுள்ளன.

அத்துடன், கருக்கலைப்புக்குப் பயன்படுத்தப்படும் மிஃபெப்ரிஸ்டோன் (Mifepristone) மருந்தின் பாதுகாப்பு தொடர்பான சர்ச்சைக்குரிய மறுஆய்வையும் அமெரிக்க நிர்வாகம் ஆரம்பித்துள்ளது. இந்த ஆய்வு, குறித்த மருந்தின் பயன்பாட்டைக் கட்டுப்படுத்துவதற்கான வழியை ஏற்படுத்தக்கூடும் எனக் கருதப்படுகிறது.

முக்கிய மருத்துவ அமைப்புகள் இந்த நடவடிக்கை அரசியல் நோக்கங்களால் முன்னெடுக்கப்படுவதாக விமர்சித்துள்ள நிலையில், கருக்கலைப்புக்கு எதிரான அமைப்புகள் இந்த மறுஆய்வு மிகவும் மெதுவாக நடைபெறுவதாகக் குற்றஞ்சாட்டியுள்ளன. இந்த ஆய்வு எதிர்வரும் மார்ச் மாதத்துக்குள் நிறைவடையும் என அமெரிக்க அதிகாரிகள் அண்மையில் நீதிமன்றத்தில் தெரிவித்துள்ளனர்.

இதற்கிடையில், ஹோர்மோன் மாற்று சிகிச்சை (Hormone Replacement Therapy) தொடர்பான பல தயாரிப்புகளில் நீண்டகாலமாக இடம்பெற்றிருந்த பாதுகாப்பு எச்சரிக்கையை அமெரிக்க சுகாதார அதிகாரிகள் நீக்கியுள்ளனர். இதனால் விநியோகத்தில் பாதிப்புகளும் தட்டுப்பாடுகளும் ஏற்பட்டுள்ளதாகத் தெரிவிக்கப்படுகிறது.

பெண்களுக்கான டெஸ்டோஸ்டிரோன் சிகிச்சைகள் தொடர்பில் மேலதிக ஆய்வுகளை மேற்கொள்ளுமாறும் மருந்து உற்பத்தியாளர்களிடம் அதிகாரிகள் வலியுறுத்தியுள்ளனர். இதன் மூலம் எதிர்காலத்தில் பெண்களுக்கென பிரத்தியேகமாகத் தயாரிக்கப்படும் மருந்துகளுக்கு அங்கீகாரம் வழங்குவதற்கான வாய்ப்புகள் உருவாகலாம் என எதிர்பார்க்கப்படுகிறது.

மேலும், குடும்பக் கட்டுப்பாட்டுச் சேவைகளுக்கான நிதியுதவிகளிலும் ட்ரம்ப் நிர்வாகம் கட்டுப்பாடுகளை விதித்துள்ளது. குறிப்பாக, ‘டைட்டில் 10’ (Title X) திட்டத்தின் கீழ் நிதியுதவி கோரும் நிறுவனங்கள், தமது திட்டங்களை ட்ரம்ப் நிர்வாகத்தின் அரசியல் முன்னுரிமைகளுக்கு ஏற்ப அமைக்க வேண்டும் என்ற புதிய நிபந்தனை இந்த ஆண்டின் தொடக்கத்தில் அறிவிக்கப்பட்டது.

இதற்கு எதிராக சட்ட நடவடிக்கைகளும் முன்னெடுக்கப்பட்டுள்ளன.

பெண்களின் சுகாதாரத்தை மேம்படுத்துவதற்கான புதிய பிரிவும் பணிக்குழுவும் அமைக்கப்பட்டுள்ள நிலையில், சுகாதாரத் துறையில் நிதிக் குறைப்புகள் மற்றும் கொள்கை மாற்றங்கள் தொடர்பான சர்ச்சைகளும் அமெரிக்காவில் தொடர்ந்து வருகின்றமை குறிப்பிடத்தக்கது.