ஆங்கிலக் கால்வாய் சுரங்க ரயிலுடன் மினிபஸ் மோதி விபத்து – 19 பேர் காயம்!

பிரான்ஸ் மற்றும் இங்கிலாந்தை இணைக்கும் ஆங்கிலக் கால்வாய் சுரங்கத்தில் வாகனங்களை ஏற்றிச் செல்லும் ரயிலுடன் மினிபஸ் மோதி விபத்துக்குள்ளானதில் 19 பேர் காயமடைந்துள்ளனர். இதனால் வாகனப் போக்குவரத்து சுமார் 90 நிமிடங்கள் தடைப்பட்டதாக பிரான்ஸ் அதிகாரிகள் தெரிவித்துள்ளனர்.

லொறி சாரதிகளை ஏற்றிச் சென்ற மினிபஸ், வியாழக்கிழமை சுரங்கத்தின் நுழைவுப் பகுதியை நோக்கிச் சென்றுகொண்டிருந்தபோது கட்டுப்பாட்டை இழந்து, வாகனங்களை ஏற்றிச் செல்லும் ஷட்டில் ரயிலின் பக்கவாட்டில் மோதியுள்ளது.

இந்த விபத்தில் இருவர் படுகாயமடைந்த நிலையில் வைத்தியசாலையில் அனுமதிக்கப்பட்டுள்ளனர். எனினும், அவர்களின் உயிருக்கு ஆபத்து இல்லை எனத் தெரிவிக்கப்பட்டுள்ளது. மேலும், 17 பேர் சிறு காயங்களுக்கு உள்ளாகியுள்ளனர். காயமடைந்தவர்களில் மினிபஸ்ஸின் சாரதியும் அடங்குவதாக அதிகாரிகள் தெரிவித்தனர்.

விபத்து இடம்பெற்ற இடத்துக்கு சுமார் 200 அவசரகால மீட்புப் பணியாளர்கள் மற்றும் ஏனைய அதிகாரிகள் விரைந்துள்ளனர். இதையடுத்து, சுரங்கத்தின் ஊடாக வாகனங்களை ஏற்றிச் செல்லும் ரயில் சேவை சுமார் 90 நிமிடங்கள் இடைநிறுத்தப்பட்டது. பின்னர், வியாழக்கிழமை மாலை சேவைகள் படிப்படியாக வழமைக்குத் திரும்பின.

எனினும், பயணிகள் போக்குவரத்துக்கான யூரோஸ்டார் ரயில் சேவைகளும் சரக்குப் போக்குவரத்துச் சேவைகளும் இந்த விபத்தினால் பாதிக்கப்படவில்லை என அதிகாரிகள் குறிப்பிட்டுள்ளனர்.

காயமடைந்தவர்கள் பல்வேறு நாடுகளைச் சேர்ந்தவர்கள் என்றும், சம்பந்தப்பட்ட நாடுகளின் தூதரகங்களுக்கு அறிவிக்கப்பட்டுள்ளதாகவும் உள்ளூர் அதிகாரியான அகாத் கியூரி தெரிவித்துள்ளார். எனினும், அவர்கள் எந்தெந்த நாடுகளைச் சேர்ந்தவர்கள் என்ற விபரத்தை அவர் வெளியிடவில்லை.

விபத்தில் காயமடைந்த அனைவரும் ஆண்கள் என்பதுடன், அவர்கள் அனைவரும் மினிபஸ்ஸில் பயணித்தவர்கள் என்றும் அவர் கூறியுள்ளார்.

விபத்துக்கான காரணம் இதுவரை கண்டறியப்படவில்லை. இது தொடர்பான விசாரணைகள் முன்னெடுக்கப்பட்டு வருகின்றன.

பிரான்ஸின் கலே (Calais) நகருக்கு அருகிலுள்ள கோகெல் (Coquelles) பகுதியில், ஆங்கிலக் கால்வாய் சுரங்கத்தின் நுழைவாயிலில் இந்த விபத்து இடம்பெற்றுள்ளது. வாகனங்களை ஏற்றிச் செல்லும் ரயில்களின் ஏற்றும் பகுதியில் இவ்வாறான விபத்து இடம்பெறுவது இதுவே முதல் முறை என அகாத் கியூரி பிரான்ஸ் ஊடகங்களுக்குத் தெரிவித்துள்ளார்.

1994ஆம் ஆண்டு திறக்கப்பட்ட இந்தச் சுரங்கத்தின் ஊடாக கடந்த ஆண்டு சுமார் 3.4 மில்லியன் வாகனங்கள் கொண்டு செல்லப்பட்டுள்ளன. அத்துடன், மில்லியன் கணக்கான யூரோஸ்டார் பயணிகளும் இந்தச் சுரங்கத்தைப் பயன்படுத்தியுள்ளனர்.