கொழும்பு துறைமுகம் ஊடாக பாகிஸ்தான் பொருட்கள் கடத்தல்: 31.5 இலட்சம் டொலர் மோசடி அம்பலம் – இந்தியாவில் நால்வர் கைது
பாகிஸ்தான் வம்சாவளி பொருட்களை இலங்கை ஊடாக இந்தியாவுக்குக் கடத்தியதாகக் கூறப்படும் பாரிய கடத்தல் வலையமைப்பை இந்திய வருவாய் புலனாய்வு இயக்குநரகம் (DRI) கண்டுபிடித்துள்ளது. இந்தச் சம்பவம் தொடர்பாக நால்வர் கைது செய்யப்பட்டுள்ளதுடன், மேலதிக விசாரணைகள் முன்னெடுக்கப்பட்டு வருகின்றன.
இந்திய நிதி அமைச்சு வெளியிட்ட தகவல்களின்படி, சுமார் 73 இலட்சம் கிலோகிராமுக்கும் அதிகமான பாகிஸ்தான் பாறை உப்பைக் கடத்தும் நடவடிக்கை இடம்பெற்றுள்ளது. இதன் பெறுமதி 3.15 மில்லியன் அமெரிக்க டொலர்களுக்கும் அதிகம் எனவும், இந்திய மதிப்பில் சுமார் 30 கோடி ரூபாய் எனவும் தெரிவிக்கப்பட்டுள்ளது.
பாகிஸ்தான் வம்சாவளிப் பொருட்களை இறக்குமதி செய்வதற்கு விதிக்கப்பட்டுள்ள கட்டுப்பாடுகளை மீறி, கடந்த 2026 மார்ச் மாதம் முதல் இந்தியாவின் முந்த்ரா மற்றும் கண்ட்லா துறைமுகங்கள் ஊடாக ஒன்பது இறக்குமதியாளர்கள் 295 கொள்கலன்களில் இப்பொருட்களை நாட்டுக்குள் கொண்டுவந்துள்ளதாக விசாரணைகளில் தெரியவந்துள்ளது.
ஐக்கிய அரபு இராச்சியத்தைத் தளமாகக் கொண்ட நிறுவனம் ஒன்றின் ஊடாக, கொழும்பு துறைமுகம் வழியாக இந்தப் பொருட்கள் அனுப்பப்பட்டுள்ளதாகக் கூறப்படுகிறது. அவற்றின் உண்மையான பாகிஸ்தான் பூர்வீகத்தை மறைப்பதற்காக போலியான வர்த்தக ஆவணங்கள் பயன்படுத்தப்பட்டதாகவும் அதிகாரிகள் சந்தேகம் வெளியிட்டுள்ளனர்.
கடந்த செப்டம்பர் 26ஆம் திகதி முதல் ஒக்டோபர் 11ஆம் திகதி வரை முன்னெடுக்கப்பட்ட விசேட நடவடிக்கையின் போது, சந்தேகத்துக்குரிய சரக்குகள் அடையாளம் காணப்பட்டன. இதன்போது, சுமார் 140 மெட்ரிக் தொன் பாறை உப்பைக் கொண்ட ஐந்து கொள்கலன்கள் கைப்பற்றப்பட்டதாக இந்திய அதிகாரிகள் தெரிவித்துள்ளனர்.
இலங்கையில் சமர்ப்பிக்கப்பட்ட சுங்க அறிவிப்புகளில், பொருட்களின் பிறப்பிடமாக பாகிஸ்தானும், இறுதி இலக்காக இந்தியாவும் சரியாகக் குறிப்பிடப்பட்டிருந்தமை விசாரணைகளில் தெரியவந்துள்ளது.
எனினும், இந்தியாவுக்குள் பொருட்களை இறக்குமதி செய்யும் நடைமுறையின்போது, அவற்றின் உண்மையான பிறப்பிடத்தை மாற்றிக் காட்டும் வகையில் போலிச் சான்றிதழ்கள் பயன்படுத்தப்பட்டதாகக் குற்றஞ்சாட்டப்பட்டுள்ளது. இதன் மூலம் இறக்குமதிக் கட்டுப்பாடுகளைத் தவிர்க்க முயற்சி மேற்கொள்ளப்பட்டதாகவும் தெரிவிக்கப்படுகிறது.
இந்தக் கடத்தல் வலையமைப்புடன் பாகிஸ்தான், ஐக்கிய அரபு இராச்சியம், இலங்கை மற்றும் இந்தியாவைச் சேர்ந்தவர்களுக்குச் சொந்தமான வர்த்தக நிறுவனங்கள் தொடர்புபட்டுள்ளதாக அதிகாரிகள் குறிப்பிட்டுள்ளனர்.
இந்தச் சம்பவம் தொடர்பாக நால்வர் கைது செய்யப்பட்டுள்ள நிலையில், கடத்தல் நடவடிக்கையில் மேலும் தொடர்புடையவர்களை அடையாளம் காண்பதற்கான விசாரணைகள் தொடர்ந்து முன்னெடுக்கப்பட்டு வருகின்றன.
