அமெரிக்காவில் இந்துக் கோயில் மீது தாக்குதல் நடத்தத் திட்டம்? – 19 வயது இளைஞர் கைது!

அமெரிக்காவின் இல்லினாய்ஸ் மாநிலத்தில் இந்துக் கோயில் ஒன்றை இலக்காகக் கொண்டு துப்பாக்கிச் சூட்டுத் தாக்குதல் நடத்தத் திட்டமிட்டதாகச் சந்தேகிக்கப்படும் 19 வயது இளைஞர் ஒருவர் கைது செய்யப்பட்டுள்ளார்.

வெள்ளை இன மேலாதிக்கக் கொள்கைகளை ஆதரித்ததாகக் கூறப்படும் அலெக்சாண்ட்ரோஸ் பபோராக்கிஸ் (Alexandros Paporakis) என்ற இளைஞரே இவ்வாறு கைது செய்யப்பட்டுள்ளார். சிகாகோவின் புறநகர்ப் பகுதியான பலடைனில் உள்ள டகோ பெல் உணவகத்தில் பணியாற்றி வந்த இவர், பாரிய துப்பாக்கிச் சூட்டுத் தாக்குதல் ஒன்றை நடத்த முயன்றதாகப் பொலிஸார் தெரிவிக்கின்றனர்.

இந்தியர்களைக் கொல்லத் தன்னால் காத்திருக்க முடியவில்லை என அவர் தனது சக ஊழியர்களிடம் கூறியதாக அரசுத் தரப்பு வழக்கறிஞர்கள் குற்றஞ்சாட்டியுள்ளனர்.

இந்தியக் குடியேற்றம் மற்றும் திறமையான வெளிநாட்டுத் தொழிலாளர்களுக்கான விசா தொடர்பான அரசியல் விவாதங்கள் தீவிரமடைந்துள்ள நிலையில், அமெரிக்காவில் வாழும் இந்திய வம்சாவளியினருக்கு எதிரான வெறுப்புணர்வு அதிகரித்து வருவது குறித்த கவலைகளும் அதிகரித்துள்ளன.

தாக்குதல் திட்டம் தொடர்பான விசாரணை

இல்லினாய்ஸ் மாநிலத்தின் பலடைன் நகருக்கு அருகிலுள்ள அரோரா பகுதியில் அமைந்துள்ள மிகப்பெரிய இந்துக் கோயிலைத் தாக்குவதற்கு பபோராக்கிஸ் திட்டமிட்டிருக்கலாம் என விசாரணையாளர்கள் சந்தேகிக்கின்றனர். இந்தக் கோயில் பலடைனிலிருந்து தென்மேற்கே சுமார் 65 கிலோமீற்றர் தொலைவில் அமைந்துள்ளது.

எனினும், தாக்குதலுக்காக அவர் குறிப்பிட்டிருந்த இலக்கு எது என்பது இதுவரை உறுதிப்படுத்தப்படவில்லை என்றும், விசாரணைகள் தொடர்ந்து முன்னெடுக்கப்படுவதாகவும் பொலிஸார் தெரிவித்துள்ளனர்.

ஞாயிற்றுக்கிழமை ஒரு விசேட நாளாக இருக்கும் என பபோராக்கிஸ் தனது சக ஊழியர்களிடம் கூறியதாகத் தெரிவிக்கப்படுகிறது.

அன்றைய தினம் பிற்பகலில் தனது துப்பாக்கி செயலிழந்துவிட்டதாகத் தெரிவித்து, சக ஊழியர் ஒருவருக்கு அவர் தொலைபேசி அழைப்பை மேற்கொண்டதாக அரசுத் தரப்பு வழக்கறிஞர்கள் குறிப்பிட்டுள்ளனர். தன்னை யாரும் கவனிக்காத வகையில் மிக விரைவாக அங்கிருந்து வெளியேறியதாகவும் அவர் கூறியதாக அமெரிக்க ஊடகங்கள் செய்தி வெளியிட்டுள்ளன.

துப்பாக்கி இயங்கத் தவறியதைக் காண்பிக்கும் காணொளியொன்றையும் அவர் சக ஊழியருக்கு அனுப்பியதாகவும், துப்பாக்கியைச் சரிசெய்த பின்னர் மீண்டும் முயற்சிக்க விரும்புவதாகக் கூறியதாகவும் தெரிவிக்கப்படுகிறது.

இதையடுத்து, அவரது சக ஊழியர்கள் இருவர் பொலிஸாருக்கு தகவல் வழங்கினர். அதனைத் தொடர்ந்து, பலடைன் மற்றும் அண்டை நகரான மவுண்ட் புரொஸ்பெக்ட் பகுதிகளைச் சேர்ந்த பொலிஸார் இணைந்து, அவர் தனது வீட்டிலிருந்து வெளியேறியபோது கைது செய்தனர்.

“இந்தக் குற்றச்சாட்டுடன் தொடர்புடைய அச்சுறுத்தலின் தீவிரத்தை ஒருபோதும் குறைத்து மதிப்பிட முடியாது” என பலடைன் பொலிஸ் தலைவர் வில்லியம் நோர்ட் தெரிவித்துள்ளார்.

பயங்கரவாத அச்சுறுத்தல் விடுத்தமை மற்றும் சட்டவிரோதமாக ஆயுதம் வைத்திருந்தமை உள்ளிட்ட கடுமையான குற்றச்சாட்டுகள் அவர் மீது சுமத்தப்பட்டுள்ளன. புதன்கிழமை நடைபெற்ற நீதிமன்ற விசாரணையைத் தொடர்ந்து, வழக்கு விசாரணை நிறைவடையும் வரை அவரைத் தொடர்ந்து விளக்கமறியலில் வைக்க நீதிபதி உத்தரவிட்டுள்ளார்.

இனவாதக் கருத்துகள் அடங்கிய ஆவணம் மீட்பு

பபோராக்கிஸ் தனது பணியிடத்தில் தன்னை வெள்ளை இன மேலாதிக்கவாதி என வெளிப்படையாக அடையாளப்படுத்திக் கொண்டதாக அரசுத் தரப்பு வழக்கறிஞர்கள் தெரிவித்துள்ளனர்.

மேலும், “நான் ஏன் போராடினேன்: அரோரா துப்பாக்கிச் சூட்டுத் தாக்குதலாளரின் அறிக்கை” என்ற தலைப்பிலான எட்டு பக்க ஆவணமொன்றை அவர் சக ஊழியர் ஒருவருக்கு அனுப்பியதாகவும் நீதிமன்ற ஆவணங்களை மேற்கோள்காட்டி அசோசியேட்டட் பிரஸ் செய்தி வெளியிட்டுள்ளது.

அந்த ஆவணத்தில் இந்தியர்கள், யூதர்கள் மற்றும் கறுப்பின மக்களை மனிதர்களுக்குக் கீழானவர்களாகச் சித்தரிக்கும் கருத்துகள் இடம்பெற்றிருந்ததாகவும், அவர்களில் முடிந்தவரை அதிகமானோரைக் கொலை செய்வதற்கான திட்டம் விவரிக்கப்பட்டிருந்ததாகவும் தெரிவிக்கப்படுகிறது.

தான் வெறுப்புணர்வால் நிறைந்த நவ-நாஜி வெள்ளை இன மேலாதிக்கவாதி என்றும், கிட்டத்தட்ட ஒவ்வொரு நாளும் பாரிய படுகொலைகள் குறித்து கற்பனை செய்து வந்ததாகவும் அந்த ஆவணத்தில் அவர் குறிப்பிட்டிருந்ததாக அரசுத் தரப்பு குற்றஞ்சாட்டியுள்ளது.

கடந்த இரண்டு ஆண்டுகளாகத் தாக்குதலுக்குத் திட்டமிட்டு வந்ததாகவும், யூடியூப் மற்றும் கூகுள் ஸ்ட்ரீட் வியூ ஆகியவற்றைப் பயன்படுத்தி இலக்குப் பகுதி குறித்து ஆய்வு செய்ததாகவும் அவர் தெரிவித்திருந்ததாக அமெரிக்க ஊடகங்கள் செய்தி வெளியிட்டுள்ளன.

பபோராக்கிஸ் மனநலப் பிரச்சினைகளைக் கொண்டிருந்ததாகவும், தனது தாயுடன் வசித்து வந்ததாகவும் விசாரணைத் தகவல்களை மேற்கோள்காட்டி ஏபிசி7 சிகாகோ செய்தி வெளியிட்டுள்ளது.

வீட்டில் துப்பாக்கி மற்றும் நாஜி அடையாளப் பொருட்கள் மீட்பு

சந்தேகநபரின் வீட்டில் பொலிஸார் மேற்கொண்ட சோதனையின்போது, வரிசை இலக்கம் இல்லாத ஏஆர் வகைத் துப்பாக்கி, தோட்டாக்கள் நிரப்பப்பட்ட துப்பாக்கி மெகசின்கள், தெற்காசியர்களை இழிவுபடுத்தும் வாசகம் பொறிக்கப்பட்ட எரிவாயுக் கொள்கலன் மற்றும் நாஜி அடையாளங்கள் கொண்ட பொருட்கள் உள்ளிட்டவை மீட்கப்பட்டதாகத் தெரிவிக்கப்படுகிறது.

இந்தச் சம்பவம் தொடர்பான மேலதிக விசாரணைகள் தொடர்ந்து முன்னெடுக்கப்பட்டு வருகின்றன. குற்றச்சாட்டுகள் நீதிமன்றத்தில் நிரூபிக்கப்படும் வரை சந்தேகநபர் குற்றவாளியாகக் கருதப்படமாட்டார்.