ட்ரம்ப் பகிர்ந்த புலி தாக்குதல் காணொளி: பகிர்வதை நிறுத்துமாறு உயிரிழந்த இளைஞரின் குடும்பம் கோரிக்கை

பிரிட்டனில் உள்ள வனவிலங்கு பூங்காவில் புலி தாக்கியதில் உயிரிழந்த இளைஞரின் குடும்பத்தினர், அந்தத் தாக்குதல் தொடர்பான காணொளியைச் சமூக வலைத்தளங்களில் பகிர்வதை நிறுத்துமாறு பொதுமக்களிடம் கோரிக்கை விடுத்துள்ளனர். அமெரிக்க ஜனாதிபதி டொனால்ட் ட்ரம்ப் அந்தக் காணொளியைப் பகிர்ந்ததைத் தொடர்ந்து, தங்களுக்கு ஏற்பட்டுள்ள மனவேதனை அதிகரித்துள்ளதாகவும் அவர்கள் தெரிவித்துள்ளனர்.

அமெரிக்க ஜனாதிபதி டொனால்ட் ட்ரம்ப், செவ்வாய்க்கிழமை தனது ‘Truth Social’ சமூக வலைத்தளப் பக்கத்தில் குறித்த தாக்குதல் காணொளியைப் பகிர்ந்திருந்தார். அதனுடன், “இயற்கையுடன் ஒருபோதும் விளையாடாதீர்கள்!” எனக் குறிப்பிட்டிருந்தார்.

இதனைத் தொடர்ந்து, தாம் ஒரு புலியை அடக்கிப் பழக்கப்படுத்துவது போன்றும் பின்னர் அதனுடன் விளையாடுவது போன்றும் சித்தரிக்கும் செயற்கை நுண்ணறிவால் உருவாக்கப்பட்டதாகத் தோன்றும் காணொளி ஒன்றையும் ட்ரம்ப் வெளியிட்டிருந்தார்.

பிரிட்டனின் வடக்கு இங்கிலாந்தில் உள்ள டான்காஸ்டர் நகருக்கு அருகிலுள்ள யோர்க்ஷயர் வனவிலங்கு பூங்காவில், கடந்த சனிக்கிழமை இந்தச் சம்பவம் இடம்பெற்றுள்ளது. புலிகள் அடைக்கப்பட்டிருந்த பகுதிக்குள் நுழைந்த வில்லியம் சாப்மன் என்ற 23 வயதுடைய இளைஞர், புலியின் தாக்குதலுக்கு உள்ளாகி உயிரிழந்தார். அவர் சம்பவ இடத்திலேயே உயிரிழந்ததாக அறிவிக்கப்பட்டது.

காணொளி பகிரப்படுவதால் ஏற்பட்டுள்ள பாதிப்பு குறித்து செவ்வாய்க்கிழமை அறிக்கை வெளியிட்ட அவரது குடும்பத்தினர், “மிகவும் வேதனையளிக்கும் காணொளிகளை வெளியிடுவதும் தொடர்ந்து பகிர்வதும், நாங்கள் மிகவும் பாதிக்கப்படக்கூடிய இந்தத் தருணத்தில் கடுமையான மன உளைச்சலை ஏற்படுத்துகிறது. இவ்வாறான செயல்களை நிறுத்துமாறு மக்களைக் கேட்டுக்கொள்கிறோம்” எனத் தெரிவித்துள்ளனர்.

வில்லியம் சாப்மன் கடந்த பல ஆண்டுகளாகக் கடுமையான மனநலப் பாதிப்புகளுக்கு முகங்கொடுத்து வந்ததாகக் குறிப்பிட்ட குடும்பத்தினர், அவரை “புத்திசாலித்தனமும் அன்பும் கொண்ட, மற்றவர்களுடன் எளிதில் பழகக்கூடிய இளைஞர்” என்றும் வர்ணித்துள்ளனர்.

அவரது மருத்துவப் பின்னணி உயிரிழப்புக்குக் காரணமாக அமைந்ததா என்பதைத் தீர்மானிப்பது மரண விசாரணை அதிகாரியின் பொறுப்பு என்றும் குடும்பத்தினர் தெரிவித்துள்ளனர்.
இதற்கிடையில், தாக்குதலில் ஈடுபட்ட அமுர் புலிக்கு கருணைக் கொலை செய்யப்படமாட்டாது எனப் பூங்கா நிர்வாகம் அறிவித்துள்ளது. அழிவின் அச்சுறுத்தலை எதிர்கொண்டுள்ள அரிய வகைப் புலிகளில் அமுர் புலியும் ஒன்றாகும். அல்தாய் (Altai) எனப் பெயரிடப்பட்ட அந்தப் புலி தொடர்ந்து பராமரிக்கப்படும் என எதிர்பார்க்கப்படுகிறது.

இந்தச் சம்பவம் தொடர்பாக உள்ளூர் அதிகாரிகள் சுகாதாரம் மற்றும் பாதுகாப்பு விதிமுறைகள் குறித்து விசாரணைகளை ஆரம்பித்துள்ளனர். விசாரணைகள் முன்னெடுக்கப்படும் நிலையில், யோர்க்ஷயர் வனவிலங்கு பூங்கா தொடர்ந்து மூடப்பட்டுள்ளது.