கருங்கடலில் சரக்குக் கப்பல்கள் மீது ட்ரோன் தாக்குதல்: ரஷ்யாவின் அடுத்தகட்ட நகர்வு குறித்து நேட்டோ நாடுகள் அச்சம்!

ருமேனியா, பல்கேரியா கடற்பகுதிகளில் தாக்குதல்கள் – இருவர் உயிரிழப்பு; 25-க்கும் மேற்பட்டோர் மாயம்

கருங்கடலில் நேட்டோ உறுப்பு நாடுகளான ருமேனியா மற்றும் பல்கேரியாவின் கடற்பகுதிகளுக்கு அருகில் குறைந்தது ஏழு சரக்குக் கப்பல்கள் மீது இந்த மாதம் நடத்தப்பட்ட ட்ரோன் தாக்குதல்கள், ரஷ்யா – உக்ரைன் போர் மேலும் விரிவடையக்கூடும் என்ற அச்சத்தை ஏற்படுத்தியுள்ளன.

இந்தத் தாக்குதல்களின் பின்னணியில் ரஷ்ய ஜனாதிபதி விளாடிமிர் புட்டின் இருக்கக்கூடும் என்றும், உக்ரைனுக்கு ஆதரவளிக்கும் நேட்டோ நாடுகளின் எதிர்வினையைச் சோதிப்பதற்காக ரஷ்யா பதற்றத்தை அதிகரிக்க முயற்சிக்கிறதா என்றும் கூட்டணியின் சில உறுப்பினர்கள் கேள்வி எழுப்பியுள்ளனர்.

ருமேனியா மற்றும் பல்கேரியாவின் பிரத்தியேக பொருளாதார கடல் வலயங்களில் இடம்பெற்றுள்ள இந்தத் தாக்குதல்கள், சர்வதேச கடல் போக்குவரத்துக்கு அச்சுறுத்தலாக மாறியுள்ளன. இதுவரை இருவர் உயிரிழந்துள்ளதுடன், குறைந்தது 25 பேர் காணாமல் போயுள்ளதாகத் தெரிவிக்கப்படுகிறது. இந்தச் சம்பவங்கள் உக்ரைன் போரில் ஏனைய நாடுகளும் நேரடியாக இழுக்கப்படும் அபாயத்தையும் அதிகரித்துள்ளன.

ரஷ்யா மீது சந்தேகம்

உக்ரைனின் கருங்கடல் மற்றும் டான்யூப் நதித் துறைமுகங்கள் மீது ரஷ்யா தொடர்ந்து தாக்குதல்களை நடத்தி வருகிறது. இதனால், ஆபிரிக்க மற்றும் மத்திய கிழக்கு நாடுகளுக்கான தானிய ஏற்றுமதியை மேற்கொள்ள மாற்றுப் போக்குவரத்துப் பாதைகளைப் பயன்படுத்த வேண்டிய நிலைக்கு உக்ரைன் தள்ளப்பட்டுள்ளது.

அத்துடன், உக்ரைனின் டான்யூப் துறைமுகங்களுக்கு அருகிலுள்ள ருமேனிய வான்பரப்புக்குள் ரஷ்ய ட்ரோன்கள் பலமுறை அத்துமீறி நுழைந்துள்ளதாகவும் தெரிவிக்கப்படுகிறது.

இந்நிலையில், கடந்த புதன்கிழமையும் வியாழக்கிழமையும் ட்ரோன் தாக்குதல்களுக்கு உள்ளான இரண்டு கப்பல்களில் தீப்பரவல் ஏற்பட்டது. அவற்றில் ஒரு கப்பல் ருமேனியாவின் பிராந்திய கடல் எல்லைக்குள் இருந்தபோது தாக்குதலுக்கு உள்ளாகியுள்ளது.

பிரஸ்ஸல்ஸில் வியாழக்கிழமை கருத்துத் தெரிவித்த ருமேனிய ஜனாதிபதி நிக்குசோர் டான், இரண்டு ட்ரோன்கள் கப்பல்களைத் தாக்கியதாகக் கூறியதுடன், அவை எந்தத் தரப்பைச் சேர்ந்தவை என்பதைத் தெளிவுபடுத்தவில்லை.

எனினும், இந்தச் சம்பவங்களுக்கு ருமேனிய அரசு பதிலளிக்கும் என்றும் அவர் எச்சரித்தார்.

தாக்குதல்களின் பின்னணியில் ரஷ்யா இருக்கலாம் என்ற சந்தேகம் அதிகரித்து வருகிறது. பல்கேரியப் பிரதமர் ருமென் ராடேவ், உக்ரைன் தனது சொந்தக் கப்பல்களையும் பணியாளர்களையும் தாக்குவதற்கு எந்தக் காரணமும் இல்லை எனக் குறிப்பிட்டுள்ளார்.

இந்தத் தாக்குதல்களால் ரஷ்யாவுக்கே சாதகமான சூழல் உருவாகிறது என்றும், அதனால் ரஷ்யாவின் தொடர்பு குறித்து சந்தேகம் எழுவதாகவும் அவர் தெரிவித்தார். இருப்பினும், இதனை நிரூபிப்பதற்கான ஆதாரங்கள் இதுவரை கிடைக்கவில்லை என்றும் அவர் கூறினார்.

அக்டோபரில் தொடரும் கப்பல்கள் மீதான தாக்குதல்கள்

இந்த மாதம் இடம்பெற்ற பல்வேறு தாக்குதல்களில் சரக்குக் கப்பல்கள் சேதமடைந்துள்ளதுடன், சில கப்பல்கள் மூழ்கியுள்ளன.

வியாழக்கிழமை: துனிசியாவிலிருந்து ருமேனியா நோக்கிப் பயணித்த, சான் மரினோ நாட்டின் கொடியுடன் சென்ற Wine Trader என்ற இரசாயனக் கப்பல் ட்ரோன் தாக்குதலுக்கு உள்ளாகி தீப்பற்றியது. ஐந்து பணியாளர்கள் மீட்கப்பட்ட நிலையில், மேலும் ஏழு பேர் காணாமல் போயுள்ளனர்.

புதன்கிழமை: துருக்கியிலிருந்து ருமேனியா நோக்கிப் பயணித்த, கொமொரோஸ் நாட்டின் கொடியுடன் சென்ற Yara J என்ற இரசாயன மற்றும் எண்ணெய்க் கப்பல் ட்ரோன் தாக்குதலுக்கு உள்ளாகித் தீப்பற்றியது. இது தொடர்பில் விசாரணைகள் முன்னெடுக்கப்பட்டுள்ளதாக ருமேனிய பதில் பாதுகாப்பு அமைச்சர் ராடு மிருடா தெரிவித்துள்ளார்.

செவ்வாய்க்கிழமை: பல்கேரியக் கடற்கரைக்கு அப்பால் இரண்டு கப்பல்கள் ட்ரோன் தாக்குதல்களுக்கு உள்ளாகின. மால்டா கொடியுடன் பயணித்த, உக்ரைன் இயக்கிய Chelsea 3 கப்பலிலிருந்த 15 பணியாளர்களும் பாதுகாப்பாக வெளியேற்றப்பட்டனர். எனினும், கினியா-பிசாவ் கொடியுடன் சென்ற HS Dignity கப்பலின் 11 பணியாளர்கள் காணாமல் போயுள்ளனர். Chelsea 3 கப்பலின் மேற்பகுதியும் உடற்பகுதியும் மூன்று வான்வழி ட்ரோன்களால் தாக்கப்பட்டதாக அதன் பணியாளர்கள் தெரிவித்துள்ளனர்.

இதற்கு முன்னதாக, இந்த மாதத்தின் ஆரம்பத்திலும் பல்கேரியாவின் பிரத்தியேக பொருளாதார கடல் வலயத்தில் இரண்டு வர்த்தகக் கப்பல்கள் கடல் மற்றும் வான்வழி ட்ரோன்களால் தாக்கப்பட்டன. டோகோ நாட்டின் கொடியுடன் சென்ற கப்பல் மூழ்கியதுடன், அதில் இருந்ததாகக் கூறப்படும் 12 மாலுமிகள் தொடர்பில் எந்தத் தகவலும் கிடைக்கவில்லை. மற்றொரு தாக்குதலில் சேதமடைந்த பலாவ் நாட்டின் கொடியுடன் சென்ற கப்பலிலிருந்து 18 பணியாளர்கள் பல்கேரியப் படகு ஒன்றின் மூலம் வெளியேற்றப்பட்டனர்.

அதற்கு முந்தைய நாளில், சோளம் ஏற்றிச் சென்ற துருக்கிக்குச் சொந்தமான சரக்குக் கப்பல் ருமேனியக் கடற்கரைக்கு அருகில் ட்ரோன் தாக்குதலுக்கு உள்ளாகித் தீப்பற்றிய பின்னர் மூழ்கியது. இந்தச் சம்பவத்தில் இருவர் உயிரிழந்ததுடன், 11 பணியாளர்கள் மீட்கப்பட்டனர்.

இது ரஷ்யாவின் இரண்டு ட்ரோன்களால் நடுநிலைக் கடற்பகுதியில் மேற்கொள்ளப்பட்ட பொதுமக்கள் கப்பல் மீதான கொடூரமான தாக்குதல் என உக்ரைன் ஜனாதிபதி வொலோடிமிர் செலென்ஸ்கி குற்றஞ்சாட்டியிருந்தார்.

இதற்கிடையில், ரஷ்ய பாதுகாப்பு அமைச்சிடமிருந்து இந்தச் சம்பவங்கள் தொடர்பான தகவல்கள் தமக்குக் கிடைக்கவில்லை என பல்கேரியாவிலுள்ள ரஷ்யத் தூதுவர் தெரிவித்துள்ளார்.

நேட்டோவின் கூட்டுப் பாதுகாப்பு விதி குறித்த கேள்விகள்

கருங்கடலில் அதிகரித்துவரும் பாதுகாப்பு அச்சுறுத்தல்கள் தொடர்பாக நேட்டோ பொதுச்செயலாளர் மார்க் ரூட்டே, பல்கேரியப் பிரதமர் ருமென் ராடேவ் மற்றும் ருமேனிய ஜனாதிபதி நிக்குசோர் டான் ஆகியோருடன் கலந்துரையாடியுள்ளார்.

வர்த்தகக் கப்பல்கள் மீதான சமீபத்திய தாக்குதல்கள் குறித்தும் கருங்கடல் பிராந்தியத்தின் பாதுகாப்பு குறித்தும் பேச்சுவார்த்தை நடத்தப்பட்டதாக அவர் தெரிவித்துள்ளார்.

நேட்டோவின் கிழக்குப் பிராந்திய பாதுகாப்பு நடவடிக்கைகள் வலுப்படுத்தப்பட்டுள்ளதாகவும், ட்ரோன் எதிர்ப்பு திறன்கள் அதிகரிக்கப்பட்டுள்ளதாகவும் மார்க் ரூட்டே குறிப்பிட்டுள்ளார். கருங்கடல் பிராந்தியத்திலுள்ள நேட்டோ உறுப்பு நாடுகளுடன் இணைந்து, தேவைக்கேற்ப தடுப்பு மற்றும் பாதுகாப்பு நடவடிக்கைகள் மாற்றியமைக்கப்படும் என்றும் அவர் தெரிவித்துள்ளார்.

நேட்டோ ஒப்பந்தத்தின் ஐந்தாவது பிரிவு (Article 5), கூட்டணியில் ஓர் உறுப்பு நாடு தாக்கப்பட்டால் அது அனைத்து உறுப்பு நாடுகள் மீதான தாக்குதலாகக் கருதப்படலாம் என்ற கூட்டுப் பாதுகாப்பு உத்தரவாதத்தை வழங்குகிறது.

எனினும், தற்போதைய ட்ரோன் தாக்குதல்களில் பல, உறுப்பு நாடுகளின் பிரத்தியேக பொருளாதார கடல் வலயங்களில் இடம்பெற்றுள்ளதால், அவற்றுக்கு இந்தப் பிரிவு பொருந்துமா என்பது தொடர்பில் கேள்விகள் எழுந்துள்ளன.

ருமேனிய பாதுகாப்பு ஆய்வாளர் ராடு டியூடர், பிரத்தியேக பொருளாதார கடல் வலயங்களில் இடம்பெறும் தாக்குதல்களுக்கு நேட்டோவின் ஐந்தாவது பிரிவின் கீழ் நடவடிக்கை எடுக்க முடியுமா என்பது இன்னும் தெளிவற்றதாக இருப்பதாகக் குறிப்பிட்டுள்ளார்.

கருங்கடல் பிராந்தியத்தில் பல சம்பவங்கள் தொடர்ச்சியாக இடம்பெற்று வருவதுடன், ரஷ்யா நேட்டோ எல்லைகளுக்கு மேலும் நெருங்கி வருவதாகவும் அவர் எச்சரித்துள்ளார்.

வெறும் அறிக்கைகளும் எச்சரிக்கைகளும் போதாது எனக் குறிப்பிட்ட அவர், கருங்கடலில் நேட்டோவின் பதிலளிப்பு நடவடிக்கைகள் மேலும் துரிதப்படுத்தப்பட வேண்டும் என்றும் வலியுறுத்தியுள்ளார்.