மெக்சிகோ கடற்பகுதியில் கடலில் தத்தளித்த 16 பேர் மீட்பு; பலரைத் தேடும் அமெரிக்க கடலோரக் காவல்படை

அமெரிக்காவின் கலிபோர்னியா மாநிலத்தை அண்மித்த மெக்சிகோவின் பாஜா கலிபோர்னியா கடற்கரைக்கு அப்பால், பசிபிக் பெருங்கடலில் தத்தளித்துக் கொண்டிருந்த குறைந்தது 16 பேர் வெள்ளிக்கிழமை அதிகாலை மீட்கப்பட்டுள்ளனர். மேலும் பலரைக் காணவில்லை என்பதால், அவர்களைத் தேடும் நடவடிக்கைகள் முன்னெடுக்கப்பட்டு வருவதாக அமெரிக்க கடலோரக் காவல்படை தெரிவித்துள்ளது.

அமெரிக்காவின் கலிபோர்னியா மாநிலத்திலுள்ள என்செனாடா (Ensenada) நகருக்கு மேற்கே சுமார் 140 மைல் (225 கிலோமீற்றர்) தொலைவில், வெள்ளிக்கிழமை அதிகாலை 1 மணியளவில் பலர் கடலில் தத்தளிப்பது கண்டறியப்பட்டதாக அமெரிக்க கடலோரக் காவல்படையின் அதிகாரி கிறிஸ் சப்பே தெரிவித்துள்ளார்.

கடலில் தத்தளித்தவர்கள் எவ்வாறு அங்கு வந்தார்கள் என்பது குறித்துத் தெளிவான தகவல்கள் கிடைக்கவில்லை. மேலும், அந்தப் பகுதியில் எந்தவொரு படகும் கண்டுபிடிக்கப்படவில்லை என்றும் அவர் குறிப்பிட்டுள்ளார்.

மீட்கப்பட்டவர்களில் ஒருவர் வழங்கிய தகவலின்படி, குறித்த படகில் 27 பேர் வரை பயணித்திருக்கலாம் எனத் தெரிவிக்கப்படுகிறது.

“கடலில் எந்தவொரு படகும் தென்படவில்லை. மக்கள் மட்டுமே நீரில் தத்தளித்துக் கொண்டிருந்தனர்” என கிறிஸ் சப்பே தெரிவித்துள்ளார்.

மீட்கப்பட்டவர்கள் மேலதிக சிகிச்சைகளுக்காக அமெரிக்காவின் சான் டியாகோ நகரிலுள்ள மருத்துவமனைகளுக்கு அழைத்துச் செல்லப்பட்டுள்ளனர்.

மீட்புப் பணிகளுக்கு உதவுவதற்காக அமெரிக்க கடலோரக் காவல்படை, ஹெலிகொப்டர், கண்காணிப்பு விமானம் மற்றும் கடலோரக் காவல் கப்பல் ஆகியவற்றை ஈடுபடுத்தியுள்ளது. மெக்சிகோ அதிகாரிகளுடன் இணைந்து தேடுதல் நடவடிக்கைகள் முன்னெடுக்கப்பட்டு வருகின்றன.

ஆபத்தான கடல் பயணங்களை நாடும் குடியேறிகள்

அமெரிக்காவின் நில எல்லைகளில் பாதுகாப்பு அதிகரிக்கப்பட்டுள்ள நிலையில், சட்டவிரோதமாக அமெரிக்காவுக்குள் நுழைய முயலும் குடியேறிகள், ஆட்கடத்தல்காரர்களின் உதவியுடன் ஆபத்தான கடல் வழிப் பயணங்களை மேற்கொண்டு வருவதாகத் தெரிவிக்கப்படுகிறது.

மெக்சிகோவிலிருந்து இரவு நேரங்களில் சிறிய படகுகளில் புறப்படும் இவர்கள், சில சந்தர்ப்பங்களில் நூற்றுக்கணக்கான மைல்கள் பயணித்து கலிபோர்னியா கடற்கரையைச் சென்றடைய முயற்சிக்கின்றனர். இவ்வாறான பயணங்களின்போது படகுகள் கவிழ்ந்து உயிரிழப்புகள் ஏற்படும் சம்பவங்களும் கடந்த சில ஆண்டுகளாகப் பதிவாகியுள்ளன.

2025ஆம் ஆண்டு மே மாதம், அமெரிக்கா–மெக்சிகோ எல்லைக்கு வடக்கே சுமார் 35 மைல் (56 கிலோமீற்றர்) தொலைவில் சிறிய படகு ஒன்று கவிழ்ந்ததில் குறைந்தது மூவர் உயிரிழந்தனர்.

அதேபோன்று, 2023ஆம் ஆண்டு அடர்ந்த பனிமூட்டத்துக்கு மத்தியில் குடியேறிகளை ஏற்றிச் சென்ற இரண்டு படகுகள் சான் டியாகோ கடற்கரையை அண்மித்தபோது, அவற்றில் ஒன்று கடல் அலைகளில் சிக்கிக் கவிழ்ந்தது. இந்தச் சம்பவத்தில் எட்டு பேர் உயிரிழந்தனர். அமெரிக்கக் கடற்பரப்பில் இடம்பெற்ற மிக மோசமான கடல் வழி ஆட்கடத்தல் சம்பவங்களில் ஒன்றாக இது கருதப்படுகிறது.

மேலும், 2022ஆம் ஆண்டு குடியேறிகள் 32 பேரை அளவுக்கு அதிகமாக ஏற்றிச் சென்ற சிறிய படகைச் செலுத்திய சான் டியாகோவைச் சேர்ந்த ஒருவருக்கு, அமெரிக்க நீதிமன்றம் 18 ஆண்டுகள் சிறைத்தண்டனை விதித்தது. குறித்த படகு கடற்கரைக்கு அருகிலுள்ள கடுமையான அலைகளில் சிக்கி உடைந்ததில் மூவர் உயிரிழந்ததுடன், இரண்டு டசனுக்கும் அதிகமானோர் காயமடைந்திருந்தமை குறிப்பிடத்தக்கது.