அமெரிக்கத் தேர்தல் வாக்காளர்களுக்கு 10 லட்சம் டொலர் வழங்கிய விவகாரம்: எலான் மஸ்க் வழக்குகளில் சமரசம்

2024ஆம் ஆண்டு அமெரிக்க ஜனாதிபதித் தேர்தலின்போது வாக்காளர்களுக்கு தலா ஒரு மில்லியன் அமெரிக்க டொலர் வழங்கிய விவகாரம் தொடர்பாகத் தொடரப்பட்ட எஞ்சியிருந்த இரண்டு சிவில் மோசடி வழக்குகளிலும் தொழில்நுட்பத் துறை கோடீஸ்வரரான எலான் மஸ்க் சமரசம் செய்துகொண்டுள்ளார்.

இதன்மூலம், சுமார் இரண்டு ஆண்டுகளாகத் தொடர்ந்த இந்தச் சட்டப் போராட்டம் முடிவுக்கு வந்துள்ளது. வியாழக்கிழமை நீதிமன்றத்தில் தாக்கல் செய்யப்பட்ட ஆவணங்களில், மஸ்க் தரப்பினரும் வழக்குத் தொடர்ந்த வாக்காளர்கள் தரப்பினரும் வழக்குகளைச் சமரசத்தின் மூலம் முடிவுக்குக் கொண்டுவர இணங்கியுள்ளதாகத் தெரிவிக்கப்பட்டுள்ளது. எனினும், சமரசத்தின் நிபந்தனைகள் குறித்த விவரங்கள் வெளியிடப்படவில்லை.

2024ஆம் ஆண்டு அமெரிக்க ஜனாதிபதித் தேர்தலின் இறுதிக்கட்டத்தில், குடியரசுக் கட்சியின் முக்கிய நிதி ஆதரவாளரான மஸ்க், டொனால்ட் ட்ரம்புக்கு ஆதரவாக வாக்காளர்கள் வாக்களிக்குமாறு வலியுறுத்தி வந்தார். இதேவேளை, போட்டி கடுமையாக நிலவிய மாநிலங்களில் பதிவு செய்யப்பட்ட வாக்காளர்களுக்கு நாள்தோறும் ஒரு மில்லியன் டொலர் வழங்கும் திட்டத்தை அவரது அரசியல் நடவடிக்கைக் குழுவான America PAC முன்னெடுத்தது.

தேர்தலுக்குப் பின்னர், குறித்த மாநிலங்களைச் சேர்ந்த சில வாக்காளர்கள் மஸ்க் மற்றும் America PAC அமைப்புக்கு எதிராகக் குழுவாக இணைந்து சிவில் மோசடி வழக்குகளைத் தாக்கல் செய்தனர். இந்தக் குற்றச்சாட்டுகளை மஸ்க் தரப்பும் அவரது அரசியல் அமைப்பும் மறுத்திருந்தன.

பணம் வழங்கும் குலுக்கல் திட்டத்தில் பங்கேற்கப் பதிவு செய்தால், தங்களுக்கு நியாயமான முறையில் பணம் வெல்லும் வாய்ப்பு கிடைக்கும் என நம்பவைக்கப்பட்டதாக வாக்காளர்கள் குற்றஞ்சாட்டினர். மேலும், இதற்காகத் தங்களின் தனிப்பட்ட தகவல்களை மஸ்க்கின் அரசியல் அமைப்பிடம் ஒப்படைக்க வேண்டியிருந்ததாகவும் அவர்கள் தெரிவித்தனர்.

பதிவு செய்யப்பட்ட வாக்காளர்களில் வெற்றியாளர்கள் “தற்செயலாகத் தெரிவுசெய்யப்படுவார்கள்” என மஸ்க் முன்னதாகப் பகிரங்கமாக அறிவித்திருந்தார். எனினும், நீதிமன்றத்தில் பின்னர் முன்வைக்கப்பட்ட விளக்கத்தில், வெற்றியாளர்கள் தற்செயலாகத் தெரிவுசெய்யப்படவில்லை என்றும், ட்ரம்புக்கு ஆதரவான அரசியல் அமைப்பின் சார்பில் வலுவான ஆதரவுக் குரலாகச் செயல்படக்கூடியவர்களைக் கருத்திற்கொண்டே அவர்கள் தெரிவுசெய்யப்பட்டனர் என்றும் அவரது சட்டத்தரணிகள் ஒப்புக்கொண்டதாகத் தெரிவிக்கப்பட்டது.

இந்த விவகாரம் தொடர்பாக, 2024ஆம் ஆண்டிலேயே வாக்காளர்களுக்குப் பணம் வழங்கும் திட்டம், வாக்குகளை விலைக்கு வாங்குவதற்கு எதிரான நீண்டகால அமெரிக்கக் கூட்டாட்சி சட்டங்களை மீறக்கூடும் என அமெரிக்க நீதித்துறை மஸ்க்கை எச்சரித்திருந்தது.

தேர்தலுக்கு முன்னர் இந்தப் பணப் பரிசுத் திட்டத்தை நிறுத்துவதற்காக பிலடெல்பியா மாவட்ட அரச சட்டத்தரணி அலுவலகம் வழக்குத் தொடர்ந்தது. இருப்பினும், தேர்தலுக்கு முந்தைய நாளில் குறித்த திட்டத்தைத் தொடர்வதற்கு மாநில நீதிபதி ஒருவர் அனுமதி வழங்கியிருந்தார்.

இதற்கிடையில், 2025ஆம் ஆண்டு விஸ்கான்சின் மாநில நீதித்துறைத் தேர்தலின்போதும் இதேபோன்ற பணப் பரிசுத் திட்டங்களை முன்னெடுத்ததன் மூலம் மஸ்க் மாநிலச் சட்டத்தை மீறியிருக்கக்கூடும் என அங்குள்ள இருதரப்புக் கட்சி உறுப்பினர்களைக் கொண்ட தேர்தல் ஆணையம் இந்த ஆண்டின் தொடக்கத்தில் முடிவுசெய்திருந்தது.

எனினும், லஞ்சம் வழங்கிய குற்றச்சாட்டில் தண்டனை பெற்றுத் தருவதற்குப் போதுமான வலுவான ஆதாரங்கள் இல்லை எனக் குறிப்பிட்டு, குற்றவியல் நடவடிக்கைகளை முன்னெடுக்க வேண்டாம் என வழக்குத் தொடரும் அதிகாரிகள் தீர்மானித்தனர்.

இந்நிலையில், 2026ஆம் ஆண்டின் இடைக்காலத் தேர்தல்களிலும் குடியரசுக் கட்சி வேட்பாளர்களுக்கு மஸ்க் தொடர்ந்து பெருமளவில் நிதியுதவி வழங்கி வருகிறார். இதுவரை குறைந்தது 276 மில்லியன் அமெரிக்க டொலர்களை அவர் நன்கொடையாக வழங்கியுள்ளதாகத் தெரிவிக்கப்படுகிறது. மேலும், தேர்தல் தொடர்பான தவறான தகவல்களைப் பரப்புவதில் முக்கிய பங்கு வகிப்பதாகவும் அவர் தொடர்ந்து விமர்சனங்களை எதிர்கொண்டு வருகிறார்.