தென் கொரியாவுக்கு எதிரான பிரசார ஒலிபரப்புகளை மீண்டும் ஆரம்பிக்கிறது வட கொரியா!
தென் கொரியாவுக்கு எதிரான உளவியல் ரீதியான பிரசார நடவடிக்கைகளை மீண்டும் ஆரம்பிக்கவுள்ளதாக வட கொரியா அறிவித்துள்ளது. இரு நாடுகளுக்கும் இடையிலான இராணுவ எல்லைப் பகுதியில் பதற்றம் அதிகரித்துள்ள நிலையில், இந்த அறிவிப்பு வெளியாகியுள்ளது.
வட கொரியத் தலைவர் கிம் ஜோங் உன்னின் சகோதரியும், அந்நாட்டின் முக்கிய அரசியல் அதிகாரிகளில் ஒருவருமான கிம் யோ ஜோங், எதிர்வரும் ஒக்டோபர் மாதத்திற்குள் தென் கொரியாவுக்கு எதிரான ஒலிபெருக்கி பிரசாரங்கள் எல்லைப் பகுதி முழுவதும் மீண்டும் ஆரம்பிக்கப்படும் என புதன்கிழமை தெரிவித்துள்ளார்.
எல்லைப் பாதுகாப்பு நடவடிக்கைகளைத் தீவிரப்படுத்தி வரும் வட கொரிய இராணுவத்தினரை நேரில் சந்தித்த பின்னர் அவர் இந்த அறிவிப்பை வெளியிட்டுள்ளார். இதன்போது, எல்லைப் பகுதியில் பாதுகாப்பு அரண்களை அமைக்கும் நடவடிக்கைகளுக்கு எதிராகத் தென் கொரியா மேற்கொள்ளும் எந்தவொரு நடவடிக்கைக்கும் பதிலடி கொடுக்கப்படும் என்றும் அவர் எச்சரித்துள்ளார்.
எல்லைப் பகுதியில் தீவிரமடையும் இராணுவ நடவடிக்கைகள்
உலகின் மிகக் கடுமையான இராணுவப் பாதுகாப்பைக் கொண்ட எல்லைகளில் ஒன்றாகக் கருதப்படும் வட கொரியா – தென் கொரியா எல்லைப் பகுதியில், வட கொரியா கண்ணிவெடிகள், முள்வேலிகள், டாங்கி எதிர்ப்புத் தடைகள் உள்ளிட்ட பல்வேறு பாதுகாப்பு ஏற்பாடுகளை மேற்கொண்டு வருகிறது.
தென் கொரியாவுடனான உறவுகளை நிரந்தரமாகத் துண்டிக்கும் தனது சகோதரரின் கொள்கைக்கு ஆதரவான நடவடிக்கையாக இந்தப் பாதுகாப்பு ஏற்பாடுகளை கிம் யோ ஜோங் வர்ணித்துள்ளார்.
வட கொரியாவின் மூத்த இராணுவ அதிகாரியான மார்ஷல் பாக் ஜோங் சோனுடன் இணைந்து எல்லைப் பகுதிகளைப் பார்வையிட்ட அவர், இந்தப் பாதுகாப்புப் பணிகளைப் புனிதமானதும் மகத்தானதுமான நடவடிக்கை எனக் குறிப்பிட்டுள்ளார்.
தென் கொரியாவின் உத்தியோகபூர்வ பெயரான கொரியக் குடியரசைக் குறிக்கும் வகையில் கருத்துத் தெரிவித்த அவர், இரு நாடுகளுக்கும் இடையிலான எல்லை முழுவதும் உளவியல் ரீதியான பிரசார ஒலிபெருக்கிகள் இயங்கும் எனத் தெரிவித்துள்ளார்.
கண்ணிவெடித் தாக்குதலில் மூவர் காயம்
கடந்த செப்டெம்பர் 21ஆம் திகதி எல்லைப் பகுதியில் இடம்பெற்ற கண்ணிவெடிச் சம்பவங்களில் தென் கொரிய முன்னணி இராணுவ வீரர்கள் மூவர் காயமடைந்துள்ளனர்.
அமெரிக்கா தலைமையிலான ஐக்கிய நாடுகள் கட்டளைப் பிரிவுடன் இணைந்து மேற்கொண்ட ஆய்வுக்குப் பின்னர், இந்தச் சம்பவங்களுக்கு வட கொரியா புதைத்த கண்ணிவெடிகளே காரணம் எனத் தென் கொரியா குற்றஞ்சாட்டியுள்ளது.
மேலும், இச்சம்பவத்திற்காக வட கொரியா மன்னிப்புக் கோர வேண்டும் என்றும், எல்லைப் பகுதியில் எஞ்சியுள்ள கண்ணிவெடிகளை அகற்ற வேண்டும் என்றும் தென் கொரியா வலியுறுத்தியுள்ளது.
எனினும், இந்தக் குற்றச்சாட்டுகளை வட கொரியா நிராகரித்துள்ளதுடன், தன்னைத் தூண்டும் வகையில் நடவடிக்கைகள் முன்னெடுக்கப்பட்டால் கடுமையான பதிலடி வழங்கப்படும் என்றும் எச்சரித்துள்ளது.
எல்லைப் பகுதியில் பாதுகாப்புப் பணிகளில் ஈடுபடும் வட கொரியப் படையினரைப் பின்வாங்கச் செய்வதற்காகத் தென் கொரிய இராணுவம் எச்சரிக்கைத் துப்பாக்கிச் சூடுகளை நடத்துவதாகத் தெரிவிக்கப்படுகிறது.
இத்தகைய நடவடிக்கைகள் தமது நாட்டின் பாதுகாப்புக்கும் இராணுவத்தினரின் உயிருக்கும் உண்மையான அச்சுறுத்தலை ஏற்படுத்தினால், எந்தவிதமான கருணையும் காட்டப்படாது என கிம் யோ ஜோங் எச்சரித்துள்ளார்.
தென் கொரியா கடும் எச்சரிக்கை
இந்த ஆண்டில் மட்டும் வட கொரியப் படையினர் சுமார் 50 தடவைகள் இராணுவ எல்லைக் கோட்டைத் தாண்டியதாகத் தென் கொரிய இராணுவம் தெரிவித்துள்ளது. பாதுகாப்பு அரண்களை அமைக்கும் பணிகளின்போது இந்த எல்லை மீறல்கள் இடம்பெற்றதாகவும், அவற்றுக்குப் பதிலளிக்கும் வகையில் எச்சரிக்கைத் துப்பாக்கிச் சூடுகள் மற்றும் ஒலிபெருக்கிப் பிரசாரங்கள் மேற்கொள்ளப்பட்டதாகவும் தென் கொரியா கூறியுள்ளது.
ஆனால், எல்லை மீறல்கள் தொடர்பான தென் கொரியாவின் குற்றச்சாட்டுகளை வட கொரியா மறுத்துள்ளது. மேலும், கண்ணிவெடிச் சம்பவங்களுக்குப் பின்னர் தென் கொரியாவின் ஆத்திரமூட்டும் நடவடிக்கைகள் அதிகரித்துள்ளதாகவும் கிம் யோ ஜோங் குற்றஞ்சாட்டியுள்ளார்.
தென் கொரியாவின் கூட்டுப் படைகளின் தலைவரான ஜின் யோங் சங், வட கொரியாவின் அச்சுறுத்தல்களை ஏற்றுக்கொள்ள முடியாதவை எனத் தெரிவித்துள்ளார். வட கொரியாவிடமிருந்து ஏதேனும் ஆத்திரமூட்டும் நடவடிக்கைகள் இடம்பெற்றால், இராணுவம் உறுதியான பதிலளிக்க வேண்டும் என்றும் அவர் உத்தரவிட்டுள்ளார்.
இதற்கிடையில், வட கொரியாவின் மூத்த இராணுவ அதிகாரி பாக் ஜோங் சோன், தென் கொரியா திட்டமிட்டுப் பொய்யான குற்றச்சாட்டுகளை முன்வைப்பதாகக் கூறியுள்ளார். வட கொரியப் படையினர் எல்லையை மீறியதாகக் கூறப்படுவதையும் அவர் மறுத்துள்ளதுடன், தென் கொரியாவின் நடவடிக்கைகளுக்கு மிகப்பெரிய அளவில் பதிலளிக்கப்படும் என்றும் எச்சரித்துள்ளார்.
மீண்டும் தலைதூக்கும் உளவியல் போர்
வட கொரியாவுக்கும் தென் கொரியாவுக்கும் இடையில் பதற்றம் அதிகரிக்கும் காலங்களில், ஒலிபெருக்கிகள் மூலம் எதிர்தரப்புக்கு எதிரான பிரசாரங்களை மேற்கொள்வது நீண்டகாலமாகப் பின்பற்றப்படும் உளவியல் போர் உத்தியாகும்.
தென் கொரியாவின் ஜனாதிபதி லீ ஜே மியுங் தலைமையிலான அரசாங்கம், வட கொரியாவுடனான உறவுகளை மேம்படுத்தும் நோக்கில் கடந்த ஆண்டு பதவியேற்ற பின்னர் தனது ஒலிபெருக்கிப் பிரசாரங்களை நிறுத்தியிருந்தது. இதற்குப் பின்னர் வட கொரியாவும் தனது பிரசாரங்களை நிறுத்தியதாகத் தெரிவிக்கப்பட்டது.
எனினும், வட கொரியத் தலைவர் கிம் ஜோங் உன், தென் கொரியாவுடனான இராஜதந்திர உறவுகள் மற்றும் ஒத்துழைப்புகளைத் துண்டித்து, அந்நாட்டை நிரந்தர எதிரியாக அறிவித்துள்ளார்.
அதேவேளை, அமெரிக்காவுடனான அணுவாயுதப் பேச்சுவார்த்தைகளும் நீண்டகாலமாக முடங்கியுள்ள நிலையில், வட கொரியாவின் புதிய அறிவிப்பு கொரிய தீபகற்பத்தில் இராணுவ மற்றும் இராஜதந்திர பதற்றத்தை மேலும் அதிகரிக்கும் சூழலை உருவாக்கியுள்ளது.
