அவுஸ்திரேலிய நாடாளுமன்ற உறுப்பினர் ஹெலன் ஹெய்ன்ஸின் கால் அகற்றம் – திட்டமிட்ட தாக்குதல் என சந்தேகம்!

அவுஸ்திரேலியாவில் காரால் மோதித் தாக்கப்பட்ட சுயேச்சை நாடாளுமன்ற உறுப்பினர் ஹெலன் ஹெய்ன்ஸின் ஒரு கால் அறுவைச் சிகிச்சை மூலம் அகற்றப்பட்டுள்ளதாக அந்நாட்டு ஊடகங்கள் செய்தி வெளியிட்டுள்ளன.

65 வயதான ஹெலன் ஹெய்ன்ஸ், திங்கட்கிழமை (ஒக்டோபர் 19) விக்டோரியா மாநிலத்தின் மெல்பேர்னுக்கு வடகிழக்கே அமைந்துள்ள வங்கரட்டா (Wangaratta) நகரிலுள்ள தனது தொகுதி அலுவலகத்திற்கு வெளியே காரால் மோதப்பட்டு படுகாயமடைந்தார்.

இதையடுத்து, அவர் இரவு முழுவதும் அறுவைச் சிகிச்சைக்கு உட்படுத்தப்பட்டதாகவும், அவரது ஒரு கால் அகற்றப்பட்டுள்ளதாக அவுஸ்திரேலிய ஒலிபரப்புக் கூட்டுத்தாபனமான ஏ.பி.சி. (ABC) மற்றும் சிட்னி மார்னிங் ஹெரால்ட் நாளிதழ் ஆகியவை செவ்வாய்க்கிழமை செய்தி வெளியிட்டுள்ளன.

திட்டமிட்ட தாக்குதலா? விசாரணையில் பயங்கரவாதத் தடுப்புப் பிரிவு

ஹெலன் ஹெய்ன்ஸ் மீது மோதிய வாகனம் வெள்ளை நிற டொயோட்டா ரக SUV கார் எனப் பொலிஸார் தெரிவித்துள்ளனர். காரின் பின்பகுதியில் பொருட்களை ஏற்றிக்கொண்டிருந்தபோது அல்லது இறக்கிக்கொண்டிருந்தபோது அவர் மோதப்பட்டதாக ஆரம்பகட்ட விசாரணைகளில் தெரியவந்துள்ளது.

சாரதி காரைத் திருப்பிச் சென்று அவர்மீது மோதியிருக்கலாம் என அவுஸ்திரேலியப் பிரதமர் அந்தோனி அல்பானீஸ் தெரிவித்துள்ளார்.

இந்தச் சம்பவம் விபத்தாக இருக்க வாய்ப்பில்லை என்றும், திட்டமிட்ட செயற்பாடாக இருக்கலாம் என்றும் அவர் குறிப்பிட்டுள்ளார்.

சம்பவம் தொடர்பில் 43 வயதுடைய ஒருவர் கைது செய்யப்பட்டுள்ளதுடன், பொலிஸாரின் விசாரணைகளுடன் பயங்கரவாதத் தடுப்புப் பிரிவினரும் இணைந்துள்ளனர்.

எனினும், தாக்குதலுக்கான நோக்கம் இதுவரை உறுதிப்படுத்தப்படவில்லை.

சாரதியைத் தடுத்து நிறுத்திய உள்ளூர் முடிதிருத்துநர்

சம்பவம் இடம்பெற்ற இடத்திற்கு அருகிலுள்ள முடிதிருத்தகத்தின் உரிமையாளரான ரிக்கி ஜெஃப்ரீஸ், தாக்குதலுக்குப் பின்னர் சாரதியை வாகனத்திலிருந்து வெளியே இழுத்து, பொலிஸார் வரும் வரை அவரைக் கட்டுப்பாட்டில் வைத்திருந்ததாகத் தெரிவிக்கப்பட்டுள்ளது.

குறித்த சாரதியின் காரில் கத்தி ஒன்று இருந்ததாகவும், அதனை அவர் வெளியே எடுக்கவில்லை என்றாலும், சாரதியின் நடவடிக்கைகள் சந்தேகத்தை ஏற்படுத்தியதால் அந்தக் கத்தியை எடுத்து அப்புறப்படுத்தியதாகவும் ஜெஃப்ரீஸ் கூறியுள்ளார்.

பின்னர், சாரதியைத் தரையில் வைத்துக் கட்டுப்படுத்தியதாகவும், அவர் தப்பிச் செல்லாமல் பொலிஸார் வரும் வரை அங்கேயே இருந்ததாகவும் அவர் தெரிவித்துள்ளார்.

தனது செயற்பாட்டைப் பெரிதுபடுத்த விரும்பாத ஜெஃப்ரீஸ், சம்பவத்தின்போது உதவிய ஏனையவர்களும் பாராட்டுக்குரியவர்கள் எனக் குறிப்பிட்டுள்ளார்.

அரசியல் வன்முறைகள் அதிகரிப்பு – பிரதமர் கவலை

அவுஸ்திரேலியாவில் அண்மைக் காலமாக அரசியல் வன்முறைகள் அதிகரித்து வருவதாகப் பிரதமர் அந்தோனி அல்பானீஸ் கவலை தெரிவித்துள்ளார்.

இந்தச் சம்பவத்தின் பின்னணியில் உள்ள நோக்கம் குறித்து ஊகிப்பதற்கு இன்னும் காலம் தேவைப்படுவதாகக் குறிப்பிட்ட அவர், அரசியல்வாதிகள் மீதான அச்சுறுத்தல்கள் தொடர்பிலும் கவனம் செலுத்த வேண்டியுள்ளதாகத் தெரிவித்துள்ளார்.

விக்டோரியா மாநில முதலமைச்சர் பென் கரோலும் இந்தத் தாக்குதலுக்குக் கடும் கண்டனம் வெளியிட்டுள்ளார். ஹெலன் ஹெய்ன்ஸ் பிரதிநிதித்துவப்படுத்தும் வங்கரட்டா மக்களுக்கும் அவருடன் தொடர்புடைய அனைவருக்கும் இந்தச் சம்பவம் பெரும் அதிர்ச்சியை ஏற்படுத்தும் என அவர் குறிப்பிட்டுள்ளார்.

ஹெலன் ஹெய்ன்ஸ் விரைவில் முழுமையாகக் குணமடைய வேண்டும் என அனைவரும் பிரார்த்திப்பதாகப் பிரதமர் தெரிவித்துள்ளார்.

யார் இந்த ஹெலன் ஹெய்ன்ஸ்?

அரசியலில் பிரவேசிப்பதற்கு முன்னர் செவிலியராகவும் மருத்துவச்சியாகவும் பணியாற்றிய ஹெலன் ஹெய்ன்ஸ், 2019ஆம் ஆண்டு அவுஸ்திரேலிய நாடாளுமன்றத்திற்குத் தெரிவானார்.

காலநிலை மாற்றத்தைக் கட்டுப்படுத்துவதற்கான வலுவான நடவடிக்கைகளை ஆதரிக்கும் அரசியல்வாதியாக அவர் அறியப்படுகிறார்.

அவுஸ்திரேலியாவிலும் உலகின் ஏனைய பகுதிகளிலும் நாடாளுமன்ற உறுப்பினர்கள் மற்றும் உயர்மட்ட அரச அதிகாரிகள் மீதான அச்சுறுத்தல்களும் துன்புறுத்தல்களும் அண்மைய ஆண்டுகளில் அதிகரித்துள்ளதாகச் சுட்டிக்காட்டப்படும் நிலையில், இந்தச் சம்பவம் அந்நாட்டில் பெரும் கவனத்தைப் பெற்றுள்ளது.