அமெரிக்க தபால் சேவைக்கு 126 மில்லியன் டொலர் இழப்பு: பாகிஸ்தானில் ஒருவர் கைது!

அமெரிக்க தபால் சேவைக்கு (USPS) 126 மில்லியன் டொலருக்கும் அதிகமான இழப்பை ஏற்படுத்தியதாகக் குற்றஞ்சாட்டப்பட்டுள்ள பாரிய போலி தபால் முத்திரை மோசடித் திட்டத்துடன் தொடர்புடைய 33 வயதுடைய நபர் ஒருவர் பாகிஸ்தானில் கைது செய்யப்பட்டுள்ளார்.

அசோசியேட்டட் பிரஸ் (AP) செய்தி நிறுவனத்தின் தகவலின்படி, பாகிஸ்தானின் பஞ்சாப் மாகாணத்தைச் சேர்ந்த பஹீம் அக்ரம் (Faheem Akram) என்பவர், பல வாரங்களாக முன்னெடுக்கப்பட்ட விசாரணைகள் மற்றும் நாட்டின் பல பகுதிகளில் மேற்கொள்ளப்பட்ட சோதனைகளைத் தொடர்ந்து ஒக்டோபர் 20ஆம் திகதி கைது செய்யப்பட்டுள்ளார்.

கானேவால் (Khanewal) பகுதியைச் சேர்ந்த அக்ரம் மீது, கடந்த செப்டெம்பர் மாதம் அமெரிக்காவின் புளோரிடா மாநிலத்தில் உள்ள மத்திய நீதிமன்றப் பெருநடுவர் குழுவினால் குற்றப்பத்திரிகை தாக்கல் செய்யப்பட்டிருந்தது.

அமெரிக்க வழக்குத் தொடுநர்களின் குற்றச்சாட்டுகளின்படி, LabelsBank.com என்ற இணையத்தளத்தை நடத்தி வந்த அக்ரம், அதன் மூலம் 5,200-க்கும் மேற்பட்ட வாடிக்கையாளர்களுக்கு 5.1 மில்லியனுக்கும் அதிகமான போலி அமெரிக்கத் தபால் கட்டணச் சீட்டுகளை விற்பனை செய்துள்ளார்.

இந்தப் போலி தபால் கட்டணச் சீட்டுகள், பொதிகளின் எடை, அளவு அல்லது அவை அனுப்பப்படும் இடம் ஆகியவற்றைப் பொருட்படுத்தாமல், ஒவ்வொன்றும் சுமார் இரண்டு டொலருக்கு விற்பனை செய்யப்பட்டதாகக் கூறப்படுகிறது. இதன் மூலம் வாடிக்கையாளர்கள் வழக்கமான தபால் கட்டணத்தைவிடக் குறைந்த செலவில் பொதிகளை அனுப்ப முடிந்துள்ளது.

இந்த மோசடித் திட்டத்தினால் அமெரிக்கத் தபால் சேவைக்கு 126 மில்லியன் டொலருக்கும் அதிகமான இழப்பு ஏற்பட்டுள்ளதாக அமெரிக்க அதிகாரிகள் தெரிவித்துள்ளனர். எனினும், இந்தத் தொகை சந்தேகநபர் சம்பாதித்த பணத்தைக் குறிக்கவில்லை; தபால் சேவைக்கு ஏற்பட்டதாக மதிப்பிடப்பட்ட இழப்பையே குறிக்கிறது.

பாகிஸ்தான் விசாரணை அதிகாரிகளின் தகவலின்படி, குறித்த இணையத்தளம் 2023 ஆகஸ்ட் முதல் 2026 செப்டெம்பர் வரை செயல்பட்டுள்ளது. இந்த நடவடிக்கைகளுடன் தொடர்புடைய பரிவர்த்தனைகள், அக்ரம் மற்றும் அவரது குடும்ப உறுப்பினர்களுக்குச் சொந்தமான 16 வங்கிக் கணக்குகளுடன் தொடர்புபட்டிருந்ததாகத் தெரிவிக்கப்பட்டுள்ளது.

இதற்கிடையில், அமெரிக்க அதிகாரிகள் குறித்த இணையத்தளத்தைக் கைப்பற்றி அதன் செயல்பாடுகளை முடக்கியுள்ளனர்.

அமெரிக்காவை ஏமாற்றச் சதி செய்தமை, போலியான தபால் கட்டணச் சீட்டுகளை விற்பனை செய்தமை மற்றும் மின்னணு வழியிலான நிதி மோசடி உள்ளிட்ட பல மத்திய குற்றச்சாட்டுகள் அக்ரம் மீது சுமத்தப்பட்டுள்ளன. இவற்றில் சில குற்றச்சாட்டுகள் நிரூபிக்கப்பட்டால், அதிகபட்சமாக 20 ஆண்டுகள் வரை சிறைத்தண்டனை விதிக்கப்பட வாய்ப்புள்ளதாகத் தெரிவிக்கப்படுகிறது.

அக்ரம் அமெரிக்காவுக்கு நாடு கடத்தப்படுவாரா அல்லது பாகிஸ்தானிலேயே அவருக்கு எதிராக வழக்குத் தொடரப்படுமா என்பது தொடர்பில் இதுவரை தெளிவான தகவல்கள் வெளியாகவில்லை.