சமூக வலைதளப் பதிவுக்காக 23 வயது ஈரானிய மாணவிக்குத் தூக்குத் தண்டனை!

ஈரானில் சமூக வலைதளப் பதிவுகள் மூலம் இறைத்தூதர் முகமது நபியை அவமதித்ததாகக் குற்றம் சாட்டப்பட்ட 23 வயதான மாணவி நஜ்மே அமினிக்கு மரண தண்டனை விதிக்கப்பட்டுள்ளதாக மனித உரிமை அமைப்புகள் தெரிவித்துள்ளன.

அரசியல் மற்றும் பாதுகாப்பு தொடர்பான குற்றச்சாட்டுகளின் கீழ் ஈரானில் மரண தண்டனைகள் அதிகரித்து வருவதாகக் கூறப்படும் நிலையில், இந்தத் தீர்ப்பு சர்வதேச அளவில் கவலையை ஏற்படுத்தியுள்ளது.

மஷ்ஹத் நகரில் கைது

ஈரானின் வடகிழக்குப் பகுதியில் அமைந்துள்ள மஷ்ஹத் நகரில் கடந்த பெப்ரவரி மாதம் நஜ்மே அமினி கைது செய்யப்பட்டார். இறைத்தூதர் முகமது நபியை அவமதிக்கும் வகையில் சமூக வலைதளங்களில் பதிவுகளை வெளியிட்டதாக அவர் மீது குற்றம் சுமத்தப்பட்டது.

அமெரிக்காவைத் தளமாகக் கொண்ட ஈரானுக்கான மனித உரிமைகள் மையம் (CHRI), மனித உரிமை ஆர்வலர்கள் செய்தி நிறுவனம் (HRANA) மற்றும் நோர்வேயைத் தளமாகக் கொண்ட ஈரான் மனித உரிமைகள் அமைப்பு (IHR) ஆகியவை இதனைத் தெரிவித்துள்ளன.

கடந்த செப்டம்பர் மாதம் அவருக்கு மரண தண்டனை விதிக்கப்பட்டதாகவும், எனினும் அந்தத் தீர்ப்பு இறுதியானது அல்ல என்பதால் மேல்முறையீடு செய்ய வாய்ப்புள்ளதாகவும் தெரிவிக்கப்பட்டுள்ளது.

சிறையிலிருந்து உருக்கமான குரல் பதிவு

சிறையில் இருந்து கடந்த செப்டம்பர் மாதம் வெளியிட்டதாகக் கூறப்படும் ஒலிப்பதிவில், நஜ்மே அமினி தனது நிலைமை குறித்து உருக்கமாகப் பேசியுள்ளார்.

“நான் ஒரு நிரபராதியான இளம் பெண். எனக்குப் பல நம்பிக்கைகளும் கனவுகளும் உள்ளன. எனக்காகக் காத்திருக்கும் தாய், தந்தை இருக்கிறார்கள். என்னை இழந்துவிடுவோமோ என்ற அச்சத்தில் ஒவ்வொரு இரவும் விடியும் வரை தவிக்கும் குடும்பம் எனக்கு இருக்கிறது” என்று அவர் கூறியுள்ளார்.

மேலும், “எனது பெயரை நினைவில் வைத்துக்கொள்ளுங்கள். ஒருவேளை இனி என்னால் பேச முடியாமல் போகலாம். ஆனால் நான் உயிருடன் இருக்கும் வரை எனக்கு ஒரு நம்பிக்கை இருக்கிறது. தூக்குக் கயிறு எனது வாழ்க்கையை முடிப்பதற்கு முன்பாக, சுதந்திரமான ஈரானைக் காண வேண்டும்” என்றும் அவர் தெரிவித்துள்ளார்.

மரண தண்டனைக்கு எதிராக மனித உரிமை அமைப்புகள் கவலை

ஈரானில் இறைத்தூதரை அவமதித்ததாகக் கூறப்படும் குற்றச்சாட்டின் கீழ் மரண தண்டனை விதிப்பது, அண்மைக் காலங்களில் ஒப்பீட்டளவில் அரிதாகவே இடம்பெற்று வந்ததாக மனித உரிமை அமைப்புகள் சுட்டிக்காட்டுகின்றன.

இந்நிலையில், தற்போதைய தீர்ப்பு மற்றவர்களுக்கு அச்சத்தை ஏற்படுத்தும் நோக்கில் பயன்படுத்தப்படலாம் என CHRI அமைப்பின் வாதிடல் பிரிவின் இயக்குநர் பஹார் கந்தேஹாரி தெரிவித்துள்ளார்.

மக்களிடையே அதிருப்தி அதிகரித்து வரும் சூழலில், இதுபோன்ற கடுமையான தீர்ப்பின் மூலம் சமூக வலைதளங்களில் கருத்துகளைப் பதிவிடுவோரைக் கட்டுப்படுத்த அதிகாரிகள் முயற்சிக்கக்கூடும் என்றும் அவர் குறிப்பிட்டுள்ளார்.

ஜனவரி 2026 போராட்டங்களைத் தொடர்ந்து போராட்டக்காரர்கள் மீது மேற்கொள்ளப்பட்ட கடுமையான அடக்குமுறையின் ஒரு பகுதியாக, தன்னிச்சையான கைதுகள், அரசியல் நோக்கத்திலான வழக்குத் தொடரல்கள் மற்றும் மரண தண்டனைகள் அதிகரித்துள்ளதாகவும் அவர் குற்றஞ்சாட்டியுள்ளார்.

போராட்டங்களுக்குப் பின்னர் கண்காணிப்பு

HRANA அமைப்பின் தகவலின்படி, ஜனவரி மாத மத்தியில் உச்சத்தை எட்டிய போராட்டங்களுக்குப் பின்னர், ஈரானின் இணையக் குற்றங்களை விசாரிக்கும் FATA பொலிஸாரால் நஜ்மே அமினி கண்காணிக்கப்பட்டுள்ளார்.

மஷ்ஹத் உள்ளிட்ட முக்கிய நகரங்களில் இடம்பெற்ற பாரிய மக்கள் போராட்டங்கள் அரசாங்கத்தால் ஒடுக்கப்பட்டதாகவும், அந்த நடவடிக்கைகளில் ஆயிரக்கணக்கானோர் உயிரிழந்ததாகவும் மனித உரிமை அமைப்புகள் தெரிவிக்கின்றன.

கைது செய்யப்பட்டபோது அமினி உடல் ரீதியான தாக்குதல்களுக்கு உள்ளாக்கப்பட்டதாகவும், நீண்ட காலம் தனிமையில் வைக்கப்பட்டதாகவும், தனக்குப் பிடித்த வழக்கறிஞரை அணுகுவதற்கான வாய்ப்பு முற்றாக மறுக்கப்பட்டதாகவும் HRANA குற்றஞ்சாட்டியுள்ளது.

இதற்கிடையில், தேசிய பாதுகாப்புக்கு எதிராகச் செயற்பட்டதாகக் கூறப்படும் மற்றொரு வழக்கில் அமினிக்கு 12 ஆண்டுகள் மற்றும் ஆறு மாதங்கள் சிறைத்தண்டனையும் விதிக்கப்பட்டுள்ளதாகத் தெரிவிக்கப்பட்டுள்ளது.

சமூக வலைதளக் கருத்துகளுக்கும் மரண தண்டனையா?

ஈரான் மனித உரிமைகள் அமைப்பின் இயக்குநர் மஹ்மூத் அமிரி-மொகத்தாம், சமூக வலைதளங்களில் கருத்துகளை வெளிப்படுத்தியதற்காக மரண தண்டனை விதிக்கப்படும் போக்கு விரிவடையும் அபாயம் உள்ளதாக எச்சரித்துள்ளார்.

23 வயதான பெண்ணுக்கு அவர் சமூக வலைதளங்களில் வெளியிட்ட கருத்துகளுக்காக மரண தண்டனை விதிக்கப்பட்டிருப்பது மிகவும் கவலைக்குரிய முன்னேற்றம் என்றும் அவர் தெரிவித்துள்ளார்.

அமினியின் உயிரைக் காப்பாற்றுவதற்கு சர்வதேச சமூகம் உடனடியாகச் செயல்பட வேண்டும் என மனித உரிமை அமைப்புகள் வலியுறுத்தியுள்ளன.

எனினும், அமினி வெளியிட்டதாகக் கூறப்படும் சமூக வலைதளப் பதிவுகளின் துல்லியமான உள்ளடக்கங்கள் இதுவரை தெளிவாக வெளியாகவில்லை. அவரது வழக்கறிஞர், அந்தப் பதிவுகள் திட்டமிட்டு வெளியிடப்பட்டவை அல்ல என வாதிட்டதாகவும், நண்பர்களுடன் உட்கொண்ட மாயத்தோற்றத்தை ஏற்படுத்தும் காளான்களின் தாக்கத்தில் இருந்ததாக அமினி கூறியதாகவும் பிராந்திய நாளிதழான Khorosan வெளியிட்ட தகவல்களில் குறிப்பிடப்பட்டுள்ளது.