ட்ரம்பின் 5,000 டொலர் காசோலை வாக்குறுதி: குடியரசுக் கட்சி ஆதரவாளர்களிடமே சந்தேகம்!

அமெரிக்காவில் நவம்பர் மாதம் நடைபெறவுள்ள இடைக்காலத் தேர்தலில் குடியரசுக் கட்சிக்கு ஆதரவை அதிகரிக்கும் நோக்கில், ஒவ்வொருவருக்கும் 5,000 அமெரிக்க டொலர் வழங்கப்படும் என ஜனாதிபதி டொனால்ட் ட்ரம்ப் அளித்துள்ள வாக்குறுதி தொடர்பில், அவரது ஆதரவாளர்கள் மத்தியிலேயே சந்தேகங்கள் எழுந்துள்ளன.

அரசாங்கத்திடமிருந்து இந்தப் பணம் உண்மையில் கிடைக்குமா என்ற கேள்வி பல வாக்காளர்களிடையே எழுந்துள்ள நிலையில், ட்ரம்பின் பொருளாதாரக் கொள்கைகள் மற்றும் அவரது வாக்குறுதிகளை நிறைவேற்றும் திறன் குறித்த விவாதங்களும் தீவிரமடைந்துள்ளன.

அலாஸ்காவில் அண்மையில் நடைபெற்ற ட்ரம்பின் தேர்தல் பிரசாரக் கூட்டத்தில் கலந்துகொண்ட ஜேமி அல்வாரெஸ், வாக்குகளைப் பணம் கொடுத்து வாங்குவது சரியான அணுகுமுறையல்ல எனத் தெரிவித்துள்ளார்.

“சிலருக்கு இது நல்லதாக இருக்கலாம். ஆனால், உங்கள் வாக்கு பணத்தால் வாங்கப்பட வேண்டும் என்று நான் நினைக்கவில்லை. யார் சிறப்பாகச் செயல்படுவார்கள் என்று நீங்கள் கருதுகிறீர்களோ, அவர்களுக்கே வாக்களிக்க வேண்டும்” என அவர் குறிப்பிட்டுள்ளார்.

அதே கூட்டத்தில் கலந்துகொண்ட ஜோசப் ஈதர்டனும், இந்தத் தொகை வழங்கப்படுவது அவசியமா என்பது குறித்து உறுதியாகக் கூற முடியாது எனத் தெரிவித்துள்ளார். ட்ரம்ப் இந்த வாக்குறுதியை நிறைவேற்றுவாரா என்று கேட்கப்பட்டபோது, “எனக்குத் தெரியாது” என அவர் பதிலளித்துள்ளார்.

தேர்தல் நெருக்கடிகளின்போது பணம் வழங்கும் வாக்குறுதிகள்

அரசியல் நெருக்கடிகளை எதிர்கொள்ளும் சந்தர்ப்பங்களில் மக்களுக்கு நேரடியாகப் பணம் வழங்கும் வாக்குறுதிகளை ட்ரம்ப் முன்வைப்பது வழக்கமாகியுள்ளது.

இதற்கு முன்னர், இறக்குமதி வரிகள் மூலம் கிடைக்கும் வருவாயிலிருந்து ஒவ்வொருவருக்கும் 2,000 டொலர் பங்குத்தொகை வழங்கப்படும் என்றும், அரசாங்கச் செலவுகளைக் குறைப்பதன் மூலம் கிடைக்கும் சேமிப்பிலிருந்து மக்களுக்குப் பெருமளவு பணம் திருப்பி வழங்கப்படும் என்றும் அவர் தெரிவித்திருந்தார். எனினும், அந்த வாக்குறுதிகள் நடைமுறைக்கு வரவில்லை.

இந்நிலையில், எதிர்வரும் நவம்பர் 3ஆம் திகதி நடைபெறவுள்ள இடைக்காலத் தேர்தலில் அமெரிக்க காங்கிரஸின் பிரதிநிதிகள் சபை மற்றும் செனட் சபை ஆகியவற்றின் கட்டுப்பாட்டைத் தீர்மானிப்பதில், ட்ரம்பின் புதிய வாக்குறுதி முக்கியத்துவம் பெறக்கூடும் எனக் கருதப்படுகிறது.

எனினும், டெக்சாஸில் நடைபெற்ற ட்ரம்பின் பிரசாரக் கூட்டத்தில் பங்கேற்ற குடியரசுக் கட்சியின் பெண்கள் அமைப்புத் தலைவி லூசி மார்டினெஸ், இந்தப் பணம் கிடைக்கும் என்பதில் தனக்கு நம்பிக்கை இருப்பதாகத் தெரிவித்துள்ளார்.

ட்ரம்ப் தனது ஆதரவாளர்களுக்கும் அமெரிக்க மக்களுக்கும் அளித்த வாக்குறுதிகளை நிறைவேற்றியவர் என அவர் குறிப்பிட்டுள்ளார்.

பொருளாதாரக் கொள்கைகள் மீது அதிருப்தி

மறுபுறம், ட்ரம்பின் பொருளாதார நிர்வாகம் தொடர்பில் பல வாக்காளர்கள் ஏற்கெனவே அதிருப்தியடைந்துள்ளதாகத் தெரிவிக்கப்படுகிறது.

பணவீக்கத்தைக் கட்டுப்படுத்தத் தவறியமை, அமெரிக்காவை வெளிநாட்டு மோதல்களிலிருந்து விலக்கி வைக்க முடியாமை உள்ளிட்ட விடயங்களை அவரது விமர்சகர்கள் சுட்டிக்காட்டுகின்றனர். ஈரானுடனான போர் முட்டுக்கட்டையைச் சந்தித்துள்ள நிலையில், ட்ரம்பின் கொள்கைகள் பொருட்களின் விலைகள் அதிகரிப்பதற்கும் வழிவகுத்துள்ளதாக விமர்சனங்கள் முன்வைக்கப்படுகின்றன.

முன்னாள் குடியரசுக் கட்சியைச் சேர்ந்த மின்னசோட்டா மாநில செனட் சபையின் பெரும்பான்மைத் தலைவியும், தற்போது பொது விவகார ஆலோசனை நிறுவனமொன்றை நடத்துபவருமான ஏமி ஃபிரெடெரிக்சன், இந்த வாக்குறுதி மீதான நம்பிக்கை ஏற்கெனவே பெருமளவில் குறைந்துவிட்டதாகத் தெரிவித்துள்ளார்.

ட்ரம்ப் கடந்த இரண்டு ஆண்டுகளில் முன்வைத்த பல வாக்குறுதிகளைப் போலவே, இந்த 5,000 டொலர் வாக்குறுதியும் நடைமுறைக்கு வருமா என்பதில் மக்கள் சந்தேகம் கொண்டுள்ளதாகவும் அவர் குறிப்பிட்டுள்ளார்.

ஒரு டிரில்லியன் டொலருக்கும் அதிகமான செலவு?

குடியரசுக் கட்சி பிரதிநிதிகள் சபையிலும் செனட் சபையிலும் தமது பெரும்பான்மையைத் தக்கவைத்துக் கொண்டால் மட்டுமே 5,000 டொலர் வழங்கப்படும் என ட்ரம்ப் தெரிவித்துள்ளார்.

இந்தத் திட்டத்தைச் செயல்படுத்த ஒரு டிரில்லியன் அமெரிக்க டொலருக்கும் அதிகமான தொகை தேவைப்படலாம் என்பதையும் அவர் ஒப்புக்கொண்டுள்ளார்.

எனினும், இத்தகைய செலவினம் அமெரிக்காவின் வரவு-செலவுத் திட்டப் பற்றாக்குறையை அதிகரிக்குமா, பணவீக்கத்தை மேலும் தூண்டுமா என்பது தொடர்பில் வெள்ளை மாளிகை எந்த அளவுக்கு விரிவான பொருளாதார ஆய்வுகளை மேற்கொண்டுள்ளது என்பது தெளிவாகவில்லை.

வர்த்தக ஒப்பந்தங்கள், வெளிநாடுகளின் முதலீட்டு உறுதிமொழிகள், தனியார் நிறுவனங்களில் அரசாங்கத்தின் பங்குகள் மற்றும் எண்ணெய், கனிம வளங்கள் தொடர்பான ஒப்பந்தங்கள் ஆகியவற்றின் மூலம் இந்தத் தொகையை வழங்குவதற்கான வாய்ப்புகள் இருப்பதாக வெள்ளை மாளிகை தெரிவித்துள்ளது.

2021ஆம் ஆண்டு அப்போதைய ஜனாதிபதி ஜோ பைடன் ஆட்சிக்காலத்தில் ஆரம்பித்த பணவீக்கத்தின் பாதிப்புகளிலிருந்து மக்களை மீட்டெடுப்பதற்கு இந்தப் பணம் உதவும் என்பது ட்ரம்ப் நிர்வாகத்தின் நிலைப்பாடாகும்.

ஆனால், கொரோனா பெருந்தொற்றுக் காலத்தில் வழங்கப்பட்ட அரசாங்க நிதியுதவிகள் அதிகப்படியான பணவீக்கத்துக்குக் காரணமாக அமைந்ததாக அப்போது குடியரசுக் கட்சியினர் குற்றஞ்சாட்டியிருந்தமை குறிப்பிடத்தக்கது.

இந்தப் பணம் வழங்கும் திட்டத்தின் பொருளாதாரத் தாக்கங்கள் குறித்து ஆய்வுகள் மேற்கொள்ளப்படுகின்றனவா என்று அசோசியேட்டட் பிரஸ் செய்தி நிறுவனம் கேட்டபோது, வெள்ளை மாளிகையின் பொருளாதார ஆலோசகர்கள் சபைத் தலைவர் கிறிஸ்டோபர் பெலன் பதிலளிப்பதைத் தவிர்த்திருந்தார்.

ட்ரம்பின் வாக்குறுதிகள் குறித்த கருத்துக் கணிப்பு

செப்டம்பர் மாதம் நடத்தப்பட்ட அசோசியேட்டட் பிரஸ் - NORC கருத்துக் கணிப்பின்படி, பதிவுசெய்யப்பட்ட வாக்காளர்களில் சுமார் பாதிப் பேர் ட்ரம்ப் அமெரிக்க மக்களுக்கு அளித்த வாக்குறுதிகளை நிறைவேற்றுவதில்லை எனக் கருதுகின்றனர்.

சுமார் 30 சதவீதமானோர், வாக்குறுதிகளை நிறைவேற்ற அவர் முயற்சித்தாலும் அவரால் அதைச் செய்ய முடியவில்லை எனக் குறிப்பிட்டுள்ளனர். சுமார் 20 சதவீதமானோர் மட்டுமே அவர் தனது வாக்குறுதிகளை நிறைவேற்றுவதாகத் தெரிவித்துள்ளனர்.

குடியரசுக் கட்சி ஆதரவாளர்கள் மத்தியில் ட்ரம்புக்கு ஒப்பீட்டளவில் அதிக ஆதரவு காணப்படுகின்றது. அவர்களில் சுமார் பாதிப் பேர் ட்ரம்ப் வாக்குறுதிகளை நிறைவேற்ற முயற்சிப்பதாகவும், சுமார் 40 சதவீதமானோர் அவர் வாக்குறுதிகளைக் காப்பாற்றுவதாகவும் நம்புகின்றனர்.

குடியரசுக் கட்சி வேட்பாளர்கள் மௌனம்

ட்ரம்ப் தனது 5,000 டொலர் வாக்குறுதியை உறுதியான ஒன்றாக முன்வைத்து வருகின்ற போதிலும், குடியரசுக் கட்சி வேட்பாளர்கள் இந்த விடயத்தைத் தமது தேர்தல் பிரசாரங்களில் பெரிதாக முன்னிலைப்படுத்தவில்லை.

“குடியரசுக் கட்சி வெற்றிபெற்றால், உங்கள் ஒவ்வொருவரின் கைகளிலும் 5,000 டொலர் இருக்கும். இதுவரை கண்டிராத பொருளாதார வெற்றியையும் அமெரிக்கா அடையும்” என கென்டக்கியில் நடைபெற்ற கூட்டத்தில் ட்ரம்ப் தெரிவித்திருந்தார்.

தாம் எப்போதும் அளித்த வாக்குறுதிகளை நிறைவேற்றுவதாகவும் அவர் குறிப்பிட்டார்.

எனினும், AdImpact நிறுவனம் கண்காணித்த தேர்தல் விளம்பரச் செலவுத் தரவுகளின்படி, இந்த வாக்குறுதியை முன்னிலைப்படுத்தி குடியரசுக் கட்சியினர் தொலைக்காட்சியிலோ இணையத்திலோ குறிப்பிடத்தக்க விளம்பரங்களை முன்னெடுக்கவில்லை.

மாறாக, ஜனநாயகக் கட்சிக்கு ஆதரவான சில அமைப்புகள், “உண்மையிலேயே அவர் உங்களுக்கு ஒரு காசோலையை அனுப்புவார் என்று நினைக்கிறீர்களா?” என்ற கேள்வியுடன் ட்ரம்பின் வாக்குறுதியை விமர்சிக்கும் விளம்பரங்களை வெளியிட்டுள்ளன.

ஜோர்ஜியாவில் நடைபெற்ற மற்றொரு கூட்டத்தில், அமெரிக்க இராணுவத்தினருக்கு 1,776 டொலர் வழங்கப்பட்டதை ட்ரம்ப் சுட்டிக்காட்டினார். எனினும், அந்தத் தொகை காங்கிரஸால் அங்கீகரிக்கப்பட்ட வீட்டு வசதிக் கொடுப்பனவின் மூலமே வழங்கப்பட்டிருந்தது.

ஜனநாயகக் கட்சியினர் காங்கிரஸின் ஏதேனும் ஒரு சபையில் பெரும்பான்மையைப் பெற்றால், அமெரிக்காவிடம் பணம் இல்லாத நிலை ஏற்படும் என்றும் ட்ரம்ப் கூறியுள்ளார். மேலும், இந்தத் தொகையை அமெரிக்காவுக்குள் மட்டுமே செலவிட வேண்டும் என்றும் அவர் தெரிவித்துள்ளார்.

புளோரிடாவின் பாம் பீச்சில் அமைந்துள்ள தனது ஆடம்பர விடுதியில் 5,000 டொலருக்கு ஒரு ஹாம்பர்கரும் சிறிய இனிப்பும் மட்டுமே கிடைக்கும் என நகைச்சுவையாகவும் அவர் குறிப்பிட்டிருந்தார்.

ட்ரம்பின் பிரசாரக் கூட்டங்களில் பங்கேற்க நாடு முழுவதும் பயணம் செய்துவரும் இந்தியானா மாநிலத்தைச் சேர்ந்த 58 வயதான மைக் போட்ட்மேன், தமக்கு 5,000 டொலர் கிடைத்தால் பயனுள்ளதாக இருக்கும் எனத் தெரிவித்துள்ளார்.

ட்ரம்ப் இதுவரை கூறிய அனைத்தையும் செய்துள்ளதாகத் தாம் நம்புவதாகவும் அவர் குறிப்பிட்டுள்ளார்.

எவ்வாறாயினும், நவம்பர் 3ஆம் திகதி நடைபெறவுள்ள இடைக்காலத் தேர்தலை முன்னிட்டு, 5,000 டொலர் வழங்கும் வாக்குறுதி வாக்காளர்களின் ஆதரவை எந்த அளவுக்கு மாற்றும் என்பதும், அந்த வாக்குறுதியை ட்ரம்ப் நடைமுறைப்படுத்துவாரா என்பதும் இன்னும் கேள்விக்குறியாகவே உள்ளது.