யானைத் தந்தத்தின் ஒரு பகுதியை 8 இலட்சம் ரூபாவுக்கு விற்க முயற்சி – இருவர் கைது!
குருநாகல், படகமுவ வனப் பகுதிக்கு அருகில் யானைத் தந்தத்தின் ஒரு பகுதியை 8 இலட்சம் ரூபாவுக்கு விற்பனை செய்ய முயன்ற இருவர் கைது செய்யப்பட்டுள்ளனர்.
வடமேல் மாகாண வனஜீவராசிகள் திணைக்களத்தின் விசேட சுற்றிவளைப்புப் பிரிவினரால் கடந்த செவ்வாய்க்கிழமை (27) இந்தக் கைது நடவடிக்கை முன்னெடுக்கப்பட்டுள்ளது. இரகசிய நடவடிக்கையில் ஈடுபட்ட அதிகாரிகள், குறித்த தந்தப் பகுதியை விற்பனை செய்ய முயன்ற சந்தர்ப்பத்தில் சந்தேகநபர்களைக் கைது செய்துள்ளனர்.
கைது செய்யப்பட்டவர்கள் 26 மற்றும் 32 வயதுடையவர்கள் எனவும், அவர்கள் திஸ்ஸமஹாராம மற்றும் ரம்புக்கனை ஆகிய பகுதிகளைச் சேர்ந்தவர்கள் எனவும் தெரிவிக்கப்பட்டுள்ளது.
மேலும், இவர்கள் இருவரும் இப்பாகமுவ பகுதியில் அமைந்துள்ள விலங்கு பண்ணையொன்றில் முகாமையாளர்களாகப் பணியாற்றி வருவதாகவும் கூறப்படுகிறது.
சந்தேகநபர்கள் இருவரும் நேற்று புதன்கிழமை (28) குருநாகல் நீதவான் நீதிமன்றத்தில் ஆஜர்படுத்தப்பட்டதைத் தொடர்ந்து, எதிர்வரும் நவம்பர் 6ஆம் திகதி வரை விளக்கமறியலில் வைக்க நீதிமன்றம் உத்தரவிட்டுள்ளது.
