2030ஆம் ஆண்டுக்குள் 5 மில்லியன் சுற்றுலாப் பயணிகளை ஈர்க்க இலக்கு!
இலங்கையின் சுற்றுலாத்துறை மூலம் 2030ஆம் ஆண்டுக்குள் 10 பில்லியன் அமெரிக்க டொலர் வருமானத்தை ஈட்டுவதுடன், 5 மில்லியன் சுற்றுலாப் பயணிகளை நாட்டுக்கு ஈர்ப்பதற்கான நடவடிக்கைகள் குறித்து ஜனாதிபதி அநுர குமார திஸாநாயக்க தலைமையில் விசேட கலந்துரையாடல் நடைபெற்றுள்ளது.
சுற்றுலாத்துறை சார்ந்த சங்கங்களின் பிரதிநிதிகளுக்கும் ஜனாதிபதிக்கும் இடையிலான இந்தச் சந்திப்பு இன்று (28) காலை ஜனாதிபதி செயலகத்தில் இடம்பெற்றது.
இதன்போது, இலங்கையின் சுற்றுலாத்துறையை மேலும் மேம்படுத்துவதற்கும் விரிவுபடுத்துவதற்கும் மேற்கொள்ள வேண்டிய முக்கிய நடவடிக்கைகள் குறித்து விரிவாக ஆராயப்பட்டுள்ளது.
உள்நாட்டு விமானப் போக்குவரத்தை மேம்படுத்தத் திட்டம்
உள்நாட்டு விமானப் போக்குவரத்து வசதிகளை மேம்படுத்துவது தொடர்பில் இந்தக் கலந்துரையாடலில் விசேட கவனம் செலுத்தப்பட்டுள்ளது.
குறிப்பாக, திருகோணமலை, மட்டக்களப்பு, சிகிரியா மற்றும் யாழ்ப்பாணம் உள்ளிட்ட முக்கிய சுற்றுலாத் தலங்களுக்கான விமானப் போக்குவரத்து வசதிகளை மேம்படுத்துவது குறித்து ஆராயப்பட்டுள்ளது.
அதேவேளை, இலங்கைக்கான சர்வதேச விமானப் போக்குவரத்து இணைப்புகளை விரிவுபடுத்துவது தொடர்பிலும் கலந்துரையாடப்பட்டுள்ளது.
இந்த ஆண்டில் இதுவரை 10 புதிய சர்வதேச விமான நிறுவனங்கள் இலங்கைக்கான விமான சேவைகளை ஆரம்பித்துள்ளதாக இதன்போது சுட்டிக்காட்டப்பட்டுள்ளது.
இலங்கைக்கு விமான சேவைகளை முன்னெடுக்கும் சர்வதேச விமான நிறுவனங்களின் எண்ணிக்கையை 50 ஆக அதிகரிப்பதற்குத் தேவையான நடவடிக்கைகள் குறித்தும் ஆராயப்பட்டுள்ளது.
தேசிய பூங்காக்களைப் பயன்படுத்தி சுற்றுலாத்துறையை மேம்படுத்துதல்
இலங்கையின் தேசிய பூங்காக்களைச் சுற்றுலாத்துறையின் வளர்ச்சிக்காகப் பயன்படுத்துவது தொடர்பிலும் இதன்போது கவனம் செலுத்தப்பட்டுள்ளது.
எனினும், சுற்றுலாத்துறையை மேம்படுத்தும் அதேவேளை, வன வளங்களைப் பாதுகாப்பதற்குத் தேவையான சட்டங்கள் மற்றும் ஒழுங்குவிதிகளை அறிமுகப்படுத்துவது குறித்தும் கலந்துரையாடப்பட்டுள்ளது.
மேலும், இலங்கையின் சுற்றுலாத்துறையை சர்வதேச ரீதியில் பிரபலப்படுத்துவதற்காக முன்னெடுக்கப்பட்டுவரும் உலகளாவிய விளம்பரப் பிரசாரங்களின் முன்னேற்றம் குறித்தும் மீளாய்வு செய்யப்பட்டுள்ளது.
சுற்றுலா விடுதிகளுக்குப் பதிவு கட்டாயம்
சுற்றுலாத்துறையை முறையான சட்டக் கட்டமைப்பின் கீழ் கொண்டுவரும் நோக்கில், நாட்டில் இயங்கும் அனைத்து சுற்றுலா விடுதிகளையும் தங்குமிட வசதிகளை வழங்கும் நிறுவனங்களையும் இலங்கை சுற்றுலா அபிவிருத்தி அதிகார சபையில் (SLTDA) கட்டாயமாகப் பதிவு செய்வது தொடர்பிலும் கலந்துரையாடப்பட்டுள்ளது.
அத்துடன், இலங்கையில் நடைமுறையிலுள்ள சட்ட நடைமுறைகளைப் பின்பற்றாமல் வெளிநாட்டுப் பிரஜைகளால் முன்னெடுக்கப்படும் வர்த்தக நடவடிக்கைகளை ஒழுங்குபடுத்துவதற்குத் தேவையான சட்டங்கள் மற்றும் விதிமுறைகளை அறிமுகப்படுத்துவது குறித்தும் கவனம் செலுத்தப்பட்டுள்ளது.
முக்கிய அதிகாரிகள் பங்கேற்பு
இந்தக் கலந்துரையாடலில் தொழில் அமைச்சரும் நிதி மற்றும் திட்டமிடல் பிரதி அமைச்சருமான கலாநிதி அனில் ஜயந்த பெர்னாண்டோ, ஜனாதிபதியின் செயலாளர் கலாநிதி நந்திக சனத் குமாநாயக்க மற்றும் ஜனாதிபதியின் சிரேஷ்ட மேலதிக செயலாளர் ரொஷான் கமகே ஆகியோர் கலந்துகொண்டனர்.
மேலும், இலங்கை ஹோட்டல்கள் சங்கத்தின் தலைவர் அசோக ஹெட்டிகொட, ரிசோர்ட்ஸ் சங்கத்தின் உப தலைவர் ஏக்ஷத் விஜேரத்ன, பொதுப் பிரிவுக்கான பிரதி தலைவர் டிமித்ரி கூரி, சிரேஷ்ட முகாமைத்துவக் குழு உறுப்பினர் சமின் விக்கிரமசிங்க, பிரதம நிறைவேற்று அதிகாரி பிரியந்த பெர்னாண்டோ மற்றும் இலங்கை உள்வரும் சுற்றுலா ஏற்பாட்டாளர்கள் சங்கத்தின் தலைவர் பொபி ஜோர்டன் ஹான்சன் உள்ளிட்ட சுற்றுலாத்துறை பிரதிநிதிகளும் பங்கேற்றனர்.
சுற்றுலாத்துறையை மேம்படுத்துவதற்காக அமைக்கப்பட்டுள்ள செயலணியின் உறுப்பினர்கள் மற்றும் ஏனைய சுற்றுலாத்துறை சங்கங்களின் பிரதிநிதிகளும் இந்தக் கலந்துரையாடலில் கலந்துகொண்டனர்.
