டப்ளின் விமான நிலையத்தில் பாகுபாடு – குமார் சங்கக்காரா குற்றச்சாட்டு!

இலங்கை கிரிக்கெட் அணியின் முன்னாள் தலைவரான குமார் சங்கக்காரா, அயர்லாந்தின் டப்ளின் விமான நிலையத்தில் Ryanair விமான நிறுவனத்தின் தரைச் சேவை ஊழியர்கள் தனது குடும்பத்தினரிடம் பாரபட்சமாக நடந்துகொண்டதாகக் குற்றஞ்சாட்டியுள்ளார்.

இந்தச் சம்பவம் அதிர்ச்சியளிப்பதாகவும் ஏற்றுக்கொள்ள முடியாததாகவும் இருப்பதாக அவர் தெரிவித்துள்ளார்.

இது தொடர்பாக சமூக வலைத்தளமான X இல் பதிவிட்டுள்ள சங்கக்காரா, டப்ளின் விமான நிலையத்தில் Ryanair நிறுவனத்தின் நுழைவாயில் ஊழியர்களால் இதுபோன்ற பாகுபாடான நடத்தையை வேறு பயணிகளும் எதிர்கொண்டுள்ளனரா எனக் கேள்வி எழுப்பியுள்ளார்.

“டப்ளினில் Ryanair நிறுவனத்தின் பாகுபாடு காட்டும் நுழைவாயில் ஊழியர்களால் வேறு யாராவது பாதிக்கப்பட்டுள்ளீர்களா? நானும் எனது குடும்பத்தினரும் இப்போது அத்தகைய அனுபவத்தை எதிர்கொண்டோம். இது அதிர்ச்சியளிக்கிறது” என அவர் தனது பதிவில் குறிப்பிட்டுள்ளார்.

தனது குடும்பத்தினரிடம் ஊழியர்கள் நடந்துகொண்ட விதத்தையும் சங்கக்காரா விமர்சித்துள்ளார். உரிய நடைமுறைகள் முறையாகக் கையாளப்படவில்லை என்றும், ஊழியர்கள் அச்சுறுத்தும் வகையில் நடந்துகொண்டதாகவும் அவர் குற்றஞ்சாட்டியுள்ளார்.

“எந்தவொரு பயணிக்கும் இவ்வாறான நடத்தை ஏற்றுக்கொள்ள முடியாதது. டப்ளினில் எனக்கு ஏற்பட்ட முதல் மோசமான அனுபவம் இதுவாகும்” என்றும் அவர் தெரிவித்துள்ளார்.

எனினும், இந்தச் சம்பவம் தொடர்பான மேலதிக விபரங்களையோ, ஊழியர்களுக்கும் தனது குடும்பத்தினருக்கும் இடையில் முரண்பாடு ஏற்படுவதற்கான காரணத்தையோ சங்கக்காரா வெளியிடவில்லை.

இந்நிலையில், அவரது பதிவுக்குப் பதிலளித்துள்ள இலங்கைத் தொழில்நுட்பத் தொழில்முனைவோரான சஞ்சீவ வீரவர்ண, மேற்கத்திய நாடுகளில் வாழ்ந்த மற்றும் பயணித்த காலங்களில் தானும் பாகுபாடான நடத்தையை எதிர்கொண்டுள்ளதாகக் குறிப்பிட்டுள்ளார்.

இந்தச் சம்பவம் தொடர்பில் Ryanair நிறுவனம் தரப்பிலிருந்து ஏதேனும் பதில் வெளியிடப்பட்டுள்ளதா என்பது குறித்த தகவல்கள் வெளியாகவில்லை.