கடவுச்சீட்டு பெறுவதற்கு இணையவழி முன்பதிவு கட்டாயம்!
பிராந்திய அலுவலகங்களில் ஒருநாள் சேவை மற்றும் சாதாரண சேவையின் கீழ் கடவுச்சீட்டுகளைப் பெற்றுக்கொள்ள வருகை தரும் விண்ணப்பதாரர்கள், நாளை (29) முதல் இணையவழியில் திகதி மற்றும் நேரத்தை முன்கூட்டியே முன்பதிவு செய்வது கட்டாயமாக்கப்பட்டுள்ளது.
குடிவரவு மற்றும் குடியகல்வு திணைக்களம் இந்த அறிவிப்பை வெளியிட்டுள்ளது.
இதன்படி, கடவுச்சீட்டைப் பெற்றுக்கொள்வதற்காக எந்தவொரு பிராந்திய அலுவலகத்திற்குச் செல்வதற்கு முன்னரும், திணைக்களத்தின் உத்தியோகபூர்வ இணையத்தளத்தின் ஊடாகத் திகதி மற்றும் நேரத்தை முன்பதிவு செய்துகொள்ள வேண்டும்.
பிராந்திய அலுவலகங்கள் ஊடாகக் கடவுச்சீட்டைப் பெற்றுக்கொள்வதற்கான திகதி மற்றும் நேரத்தை முன்பதிவு செய்யும் வசதி, குடிவரவு மற்றும் குடியகல்வு திணைக்களத்தின் உத்தியோகபூர்வ இணையத்தளத்தில் ஏற்படுத்தப்பட்டுள்ளதாக திணைக்களத்தின் பேச்சாளர் மஹேஷ் கருணாதாச தெரிவித்துள்ளார்.
எனினும், பத்தரமுல்லையில் அமைந்துள்ள குடிவரவு மற்றும் குடியகல்வு திணைக்களத்தின் தலைமை அலுவலகத்தில் கடவுச்சீட்டு வழங்கும் சேவைகள் வழமைபோன்று எவ்வித மாற்றமுமின்றித் தொடரும் எனவும் அறிவிக்கப்பட்டுள்ளது.
