SUV வாகனம் வழங்குவதாகக் கூறி 59 இலட்சம் ரூபாய் மோசடி – கொழும்பில் ஒருவர் கைது!
SUV ரக வாகனத்தை வழங்குவதாகக் கூறி 59 இலட்சம் ரூபாய் மோசடி செய்ததாகக் கூறப்படும் 38 வயதுடைய நபர் ஒருவர் இன்று (ஒக்டோபர் 28) கைது செய்யப்பட்டுள்ளார்.
கொழும்பு 03, அல்பிரட் ஹவுஸ் பிளேஸ் பகுதியில் வசிக்கும் ஒருவரே இவ்வாறு கைது செய்யப்பட்டுள்ளார்.
குறித்த நபர் SUV ரக வாகனத்தை வழங்குவதாக உறுதியளித்து, ஒருவரிடமிருந்து 59 இலட்சம் ரூபாயைப் பெற்றுக்கொண்டதாகவும், எனினும் வாகனத்தை வழங்கத் தவறியதாகவும் தெரிவித்து முறைப்பாடு செய்யப்பட்டுள்ளது.
இதனையடுத்து, விசாரணைக்காக கொழும்பு மோசடி விசாரணைப் பணியகத்திற்கு அழைக்கப்பட்ட சந்தேகநபர், வாக்குமூலம் பதிவு செய்வதற்காக முன்னிலையானபோது விசாரணை அதிகாரிகளால் கைது செய்யப்பட்டுள்ளார்.
கைது செய்யப்பட்ட சந்தேகநபர் இன்று அலுத்கடை இலக்கம் 03 நீதவான் நீதிமன்றத்தில் முன்னிலைப்படுத்தப்பட்டார்.
இதன்போது, தலா 25 இலட்சம் ரூபாய் பெறுமதியான இரண்டு தனிப்பட்ட சரீரப் பிணைகளில் அவரை விடுவிக்க நீதிமன்றம் உத்தரவிட்டுள்ளது.
சம்பவம் தொடர்பான மேலதிக விசாரணைகளை கொழும்பு மோசடி விசாரணைப் பணியகம் முன்னெடுத்து வருகின்றது.
