ஜெர்மனியில் 16 வயது சிறுமியிடம் பாலியல் அத்துமீறல் குற்றச்சாட்டு – ரோபோவைப் பறிமுதல் செய்த பொலிஸார்

ஜெர்மனியின் கொலோன் நகரில், 16 வயது சிறுமியிடம் பாலியல் ரீதியில் அத்துமீறியதாகக் கூறப்படும் சம்பவம் தொடர்பில், பொலிஸார் ரோபோ ஒன்றைப் பறிமுதல் செய்து விசாரணைகளை ஆரம்பித்துள்ளனர்.

கடந்த ஒக்டோபர் 10ஆம் திகதி சனிக்கிழமை இரவு, நகர மையத்தில் உள்ள துரித உணவகம் ஒன்றுக்கு அருகில் நண்பர்களுடன் நின்றுகொண்டிருந்த சிறுமியை, சுமார் 120 சென்ரிமீற்றர் உயரமுடைய சிவப்பு மற்றும் தங்க நிற ரோபோ ஒன்று பின்னால் இருந்து நெருங்கியுள்ளது.

அந்த ரோபோ சிறுமியின் பின்பகுதியைத் தொட்டுத் தட்டியதாகக் குற்றஞ்சாட்டப்படுகிறது. இதனால் அதிர்ச்சியடைந்த சிறுமி அலறியவாறு அங்கிருந்து ஓடியதாகத் தெரிவிக்கப்படுகிறது.

சம்பவம் தொடர்பில் 16 மற்றும் 19 வயதுடைய இருவரைச் சந்தேகத்தின் பேரில் பொலிஸார் அடையாளம் கண்டுள்ளனர். அவர்கள் குறித்த ரோபோவை இயக்குவதில் தொடர்புபட்டிருக்கலாம் என நம்பப்படுகிறது.

மேலும், சம்பவம் இடம்பெற்றபோது இருவரும் சமூக ஊடகங்களில் நேரலை ஒளிபரப்பு செய்துகொண்டிருந்ததுடன், நடந்துகொண்டிருந்த சம்பவம் குறித்து கருத்துகளையும் தெரிவித்திருக்கலாம் என விசாரணையாளர்கள் சந்தேகிக்கின்றனர்.

அவசர அழைப்பொன்றைத் தொடர்ந்து சம்பவ இடத்திற்கு அருகில் சந்தேகநபர்களைக் கண்டறிந்த பொலிஸார், 16 வயதுடைய சந்தேகநபருக்குச் சொந்தமான வாகனத்தின் பின்பகுதியில் ரோபோ இருப்பதைக் கண்டுள்ளனர். இதையடுத்து, ரோபோவும் இரண்டு கையடக்கத் தொலைபேசிகளும் விசாரணைக்காகப் பறிமுதல் செய்யப்பட்டுள்ளன.

குறித்த ரோபோவின் அசைவுகள் ஒருவரால் நேரடியாகக் கட்டுப்படுத்தப்பட்டனவா அல்லது முன்கூட்டியே நிரல்படுத்தப்பட்ட செயல்பாடுகளின் அடிப்படையில் இயங்கியதா என்பது குறித்து அதிகாரிகள் தற்போது ஆராய்ந்து வருகின்றனர்.

இந்தச் சம்பவம், ரோபோ தொழில்நுட்பத்தைத் தவறாகப் பயன்படுத்துவது தொடர்பாகவும், தொலைவிலிருந்து இயக்கப்படும் இயந்திரங்கள் மூலம் இடம்பெறும் செயல்களுக்கு யார் பொறுப்பேற்க வேண்டும் என்பது குறித்தும் கேள்விகளை எழுப்பியுள்ளது.

சம்பவம் தொடர்பான விசாரணைகள் தொடர்ந்து முன்னெடுக்கப்பட்டு வருகின்றன. சிறுமியிடம் இடம்பெற்றதாகக் கூறப்படும் அத்துமீறலுக்கு யார் பொறுப்பு என்பது இதுவரை உறுதிப்படுத்தப்படவில்லை.