சவூதியின் அரம்கோ எண்ணெய் வளாகம் மீது ஹவுதிகள் தாக்குதல்: மத்திய கிழக்கில் போர் பதற்றம் தீவிரம்!

உலகின் முன்னணி எண்ணெய் உற்பத்தி நிறுவனங்களில் ஒன்றான சவூதி அரேபியாவின் 'அரம்கோ' (Aramco) நிறுவனத்திற்குச் சொந்தமான வளாகத்தின் மீது, யேமனின் இரான் ஆதரவு பெற்ற 'ஹவுதி' கிளர்ச்சியாளர்கள் நடத்திய தாக்குதலைத் தொடர்ந்து அங்கு தீ விபத்து ஏற்பட்டுள்ளது. மத்திய கிழக்கு பிராந்தியத்தில் சவூதி கூட்டணிப் படைகளுக்கும் ஹவுதி அமைப்பினருக்குமிடையே போர் தீவிரமடைந்து வரும் நிலையில், இத்தாக்குதல் பெரும் பரபரப்பை ஏற்படுத்தியுள்ளது.

சவூதி அரேபியாவின் கிழக்கு மாகாணத்தில் அமைந்துள்ள அரம்கோ எண்ணெய் சுத்திகரிப்பு வளாகத்திலுள்ள நிருவாகக் கட்டிட மொன்றைக் குறிவைத்து செவ்வாய்க்கிழமை இத்தாக்குதல் நடத்தப்பட்டுள்ளது. இதில் சிறிய அளவிலான தீ விபத்து ஏற்பட்ட போதிலும், உயிரிழப்புகளோ அல்லது காயங்களோ எதுவுமின்றி ஆபத்து தவிர்க்கப்பட்டுள்ளதாக சவூதி ஆற்றல் அமைச்சு உத்தியோகபூர்வமாக அறிவித்துள்ளது.

ரியாத் நகரில் பதற்றம் – குடியிருப்புப் பகுதியில் ஏவுகணைச் சிதைவுகள்:

அதேவேளை, சவூதி தலைநகர் ரியாத் மற்றும் எண்ணெய் வளம்மிக்க கிழக்கு மாகாணத்தை நோக்கி ஹவுதிகளால் ஏவப்பட்ட தொடர்ச்சியான தொலைதூர ஏவுகணைகள், தானியங்கி ஏவுகணைகள் மற்றும் நவீன ஆளில்லா வான் ஊர்திகளை (Drones) சவூதியின் வான் பாதுகாப்புப் படைகள் வான்வெளியிலேயே இடைமறித்து அழித்துள்ளன.

இருப்பினும், இடைமறிக்கப்பட்ட இரண்டு ஏவுகணைகளின் சிதைவுகள் ரியாத் நகரின் குடியிருப்புப் பகுதிகளில் விழுந்ததில், நான்கு பொதுமக்கள் காயமடைந்துள்ளதுடன் 15 வீடுகள் சேதமடைந்துள்ளதாக சவூதியின் சிவில் பாதுகாப்புத் திணைக்களம் தெரிவித்துள்ளது.

சனாவில் சவூதி கூட்டணியின் வான்வழித் தாக்குதல்:

இதற்குப் பதிலடியாக, யேமன் நாட்டின் தலைநகரும் ஹவுதிகளின் கட்டுப்பாட்டில் உள்ளதுமான 'சனா' (Sanaa) நகரில் உள்ள ஹவுதி கிளர்ச்சியாளர்களின் தளங்கள் மீது சவூதி தலைமையிலான கூட்டுப்படைகள் கடுமையான வான்வழித் தாக்குதல்களை மேற்கொண்டுள்ளன.

தாக்குதலுக்கு முன்னர், பொதுமக்கள் பாதுகாப்பான இடங்களுக்குச் செல்லுமாறு கூட்டுப்படையின் பேச்சாளர் மேஜர் ஜெனரல் துர்கி அல்-மாலிகி எச்சரிக்கை விடுத்திருந்தார். ஹவுதிகள் தமது ஏவுகணைகள் மற்றும் ஆளில்லா வான் ஊர்திகளை மறைத்து வைக்க யேமன் தேசிய எண்ணெய் நிறுவனத்தின் தளங்களையும், நிலத்தடி எரிபொருள் சேமிப்புக் கிடங்குகளையும் பயன்படுத்தி வருவதாக சவூதி கூட்டணி குற்றம் சாட்டியுள்ளது.

விமானப் போக்குவரத்து கடும் பாதிப்பு:

சவூதி அரேபியா மீதான தாக்குதல்கள் தீவிரமடைந்துள்ளதைத் தொடர்ந்து, அசம்பாவிதங்களைத் தவிர்க்கும் பொருட்டு சர்வதேச விமான சேவை நிறுவனங்கள் தமது விமானங்களை ரியாத் நகரிலிருந்து பாதுகாப்பான வேறு விமான நிலையங்களுக்கு மாற்ற நடவடிக்கை எடுத்துள்ளன.

கடந்த ஒக்டோபர் 8 ஆம் திகதி முதல் சவூதி அரேபியாவிலிருந்து புறப்படவிருந்த 3,120 இற்கும் அதிகமான விமானங்கள் (திட்டமிடப்பட்ட சேவைகளில் சுமார் 41 சதவீதம்) இரத்துச் செய்யப்பட்டுள்ளதாக விமானப் போக்குவரத்து பகுப்பாய்வு நிறுவனமான 'சரியம்' (Cirium) தெரிவித்துள்ளது.

செங்கடல் பாதையில் அச்சுறுத்தல்:

முன்னதாக, சர்வதேச எண்ணெய் மற்றும் வர்த்தகக் கப்பல் போக்குவரத்திற்கு மிக முக்கிய நீர்ச்சுரங்கப் பாதையாகத் திகழும் பாப் அல்-மந்தெப் (Bab el-Mandeb) ஜலசந்தியின் முக்கியப் பகுதிகளை ஹவுதிகள் கைப்பற்றியதைத் தொடர்ந்தே தற்போதைய போர் உக்கிரம் பெற்றுள்ளது.

இந்நிலையில், "தமது நாட்டின் பாதுகாப்பிற்கும், செங்கடல் (Red Sea) மற்றும் பாப் அல்-மந்தெப் கடல்சார் போக்குவரத்தின் சுதந்திரத்திற்கும் ஏற்படும் எந்தவொரு அச்சுறுத்தலையும் சவூதி சகித்துக் கொள்ளாது. தாக்குதல்களைத் தொடரும் ஹவுதிகள் அதற்கான கடுமையான விளைவுகளைச் சந்திக்க நேரிடும்" என சவூதி அரேபிய அமைச்சரவை எச்சரித்துள்ளது.

அதேவேளை, யேமனின் தைஸ் (Taiz) நகரில் இடம்பெற்று வரும் மோதல்களில் ஆறு பேர் உயிரிழந்துள்ளதுடன், அங்குள்ள மக்கள் கடும் உணவு மற்றும் எரிபொருள் பற்றாக்குறையை எதிர்கொண்டு இடம்பெயர்ந்து வருவதாக ஐக்கிய நாடுகள் சபையின் பேச்சாளர் ஸ்தேபான் டுஜாரிக் கவலை தெரிவித்துள்ளார்.