அமெரிக்காவின் விஸ்கான்சின் பகுதியில் சிறிய விமானம் விபத்து: குழந்தை உட்பட 6 பேர் உயிரிழப்பு!

அமெரிக்காவின் விஸ்கான்சின் மாநிலத்தில் உள்ள விஸ்கான்சின் டெல்ஸ் (Wisconsin Dells) பகுதிக்கு அருகே சிறிய ரக விமானம் ஒன்று விபத்துக்குள்ளானதில், குழந்தை உட்பட ஆறு பேர் உயிரிழந்துள்ளனர்.

இந்த விபத்து செவ்வாய்க்கிழமை இரவு இடம்பெற்றதாக சாக் கவுண்டி ஷெரிப் திணைக்களம் தெரிவித்துள்ளது.

ஆறு இருக்கைகளைக் கொண்ட ஒற்றை இயந்திரமுடைய குறித்த விமானம், கெனோஷா (Kenosha) நகரிலிருந்து மெனோமோனி (Menomonie) நோக்கிப் பயணித்துக் கொண்டிருந்தது. இந்நிலையில், இரவு 10 மணிக்கு சற்று முன்னதாக, டெல்லோனா (Dellona) பகுதியில் உள்ள மிரர் லேக் மாநிலப் பூங்காவுக்கு அருகிலுள்ள வனப்பகுதியில் விமானம் விழுந்து விபத்துக்குள்ளானது.

விபத்து இடம்பெற்றபோது, அப்பகுதியில் இடியுடன் கூடிய மழை பெய்துகொண்டிருந்ததாக அதிகாரிகள் தெரிவித்தனர். இரவு சுமார் 9.30 மணியளவில் விமானம் விழுந்து விபத்துக்குள்ளானதாகப் பலர் அளித்த தகவல்களைத் தொடர்ந்து, அதிகாரிகள் சம்பவ இடத்துக்குச் சென்றுள்ளனர்.

விமானத்தில் பயணித்த ஐந்து பெரியவர்களும் ஒரு குழந்தையும் உயிரிழந்த நிலையில் மீட்கப்பட்டதாக ஷெரிப் திணைக்களம் உறுதிப்படுத்தியுள்ளது. உயிரிழந்தவர்களின் பெயர் விவரங்கள் உடனடியாக வெளியிடப்படவில்லை.

விபத்துக்குள்ளானது 'Piper PA-46' ரகத்தைச் சேர்ந்த சிறிய விமானம் எனத் தெரிவிக்கப்பட்டுள்ளது. விபத்து இடம்பெறுவதற்கு முன்னர், அந்த விமானம் அருகிலுள்ள விமானப் போக்குவரத்துக் கட்டுப்பாட்டு கோபுரத்துடன் தொடர்பில் இருந்ததாக அதிகாரிகள் கூறியுள்ளனர்.

விமானத்துக்கும் கட்டுப்பாட்டு கோபுரத்துக்கும் இடையில் இடம்பெற்ற தகவல் பரிமாற்றங்களை அதிகாரிகள் ஆய்வு செய்து வருகின்றனர். அத்துடன், சீரற்ற வானிலை இந்த விபத்துக்குக் காரணமாக அமைந்ததா என்பது குறித்தும் விசாரணைகள் முன்னெடுக்கப்பட்டுள்ளன.

இந்த விபத்தினால் அப்பகுதியிலுள்ள கட்டடங்களுக்கோ, தரையில் இருந்த பொதுமக்களுக்கோ பாதிப்பு ஏற்படவில்லை எனப் பொலிஸார் தெரிவித்துள்ளனர்.

அமெரிக்காவின் மத்திய விமானப் போக்குவரத்து நிர்வாகமும் (FAA), தேசிய போக்குவரத்து பாதுகாப்புச் சபையும் (NTSB) இணைந்து விபத்து தொடர்பான மேலதிக விசாரணைகளை முன்னெடுத்து வருகின்றன.