தென் கொரியாவில் உயர்கல்வி மற்றும் வேலைவாய்ப்பு – இலங்கை மாணவர்களுக்கு புதிய வாய்ப்பு!

தென் கொரியாவில் உயர்கல்வியைத் தொடர்வதுடன், அங்கு வேலைவாய்ப்புகளைப் பெற்று நீண்டகாலம் வசிப்பதற்கான வாய்ப்புகளை இலங்கை மாணவர்களுக்கு ஏற்படுத்தும் புதிய ஒப்பந்தத்திற்கு அமைச்சரவை அங்கீகாரம் வழங்கியுள்ளது.

இதன்படி, இலங்கையின் தேசிய தொழில்சார் பாதுகாப்பு மற்றும் சுகாதார நிறுவனம் (NIOSH) ஊடாகத் தெரிவுசெய்யப்படும் மாணவர்கள், தென் கொரியாவின் சாங்ஷின் பல்கலைக்கழகத்தில் (Changshin University) உயர்கல்வியைத் தொடர முடியும்.

அத்துடன், தென் கொரியாவின் கியோங்சாங்னம்-டோ (Gyeongsangnam-do) மாகாணத்தில் அமைந்துள்ள தொழில்துறைகளில் வேலைவாய்ப்புகளைப் பெற்றுக்கொள்வதற்கும், அந்த மாகாணத்தில் நீண்டகாலம் வசிப்பதற்குமான வாய்ப்புகளையும் இந்தத் திட்டம் ஏற்படுத்தும் என எதிர்பார்க்கப்படுகிறது.

இந்தத் திட்டத்தை நடைமுறைப்படுத்துவதற்காக ஐந்து தரப்பினரை உள்ளடக்கிய புதிய புரிந்துணர்வு ஒப்பந்தமும் (MoU), அதனைச் செயற்படுத்துவதற்கான கட்டமைப்பும் தயாரிக்கப்பட்டுள்ளன.

இலங்கையின் தொழில் அமைச்சு, தேசிய தொழில்சார் பாதுகாப்பு மற்றும் சுகாதார நிறுவனம், தென் கொரியாவின் கியோங்சாங்னம்-டோ மாகாணம், சச்சியோன் வர்த்தக மற்றும் கைத்தொழில் சம்மேளனம் (Sacheon Chamber of Commerce and Industry) மற்றும் சாங்ஷின் பல்கலைக்கழகம் ஆகிய ஐந்து தரப்பினரும் இந்த ஒப்பந்தத்தில் உள்வாங்கப்பட்டுள்ளனர்.

இதற்கு முன்னதாக, தொழிற்பயிற்சி மற்றும் மாணவர் பரிமாற்றத் திட்டங்களை நடைமுறைப்படுத்துவதற்காக தேசிய தொழில்சார் பாதுகாப்பு மற்றும் சுகாதார நிறுவனத்துக்கும் சாங்ஷின் பல்கலைக்கழகத்துக்கும் இடையில் 2023ஆம் ஆண்டு புரிந்துணர்வு ஒப்பந்தம் ஒன்று கைச்சாத்திடப்பட்டது.

எனினும், குறித்த ஒப்பந்தத்தில் உள்ளடக்கப்பட்டிருந்த சில ஏற்பாடுகள் தொடர்பான சிக்கல்கள் காரணமாக அதனை நடைமுறைப்படுத்த முடியாமல் போனது.

இதனையடுத்து, குறித்த திட்டத்தைச் செயற்படுத்துவதற்கான புதிய புரிந்துணர்வு ஒப்பந்தமும் செயல்பாட்டு ஏற்பாடுகளும் தயாரிக்கப்பட்டுள்ளன.

இந்நிலையில், ஐந்து தரப்பினரையும் உள்ளடக்கிய புதிய ஒப்பந்தத்தை முன்னெடுப்பதற்காக தொழில் அமைச்சரால் சமர்ப்பிக்கப்பட்ட முன்மொழிவுக்கு அமைச்சரவை அங்கீகாரம் வழங்கியுள்ளது.