கோட்டாபயவின் வெளிநாட்டுப் பயணத் தடை: நவம்பர் 4ஆம் திகதி சிஐடிக்கு நீதிமன்றம் உத்தரவு
முன்னாள் ஜனாதிபதி கோட்டாபய ராஜபக்ஷவுக்கு விதிக்கப்பட்டுள்ள வெளிநாட்டுப் பயணத் தடையைத் தற்காலிகமாக நீக்குவது தொடர்பான கோரிக்கை குறித்து, எதிர்வரும் நவம்பர் 4ஆம் திகதி நீதிமன்றத்தில் முன்னிலையாகி தமது நிலைப்பாட்டைத் தெரிவிக்குமாறு குற்றப் புலனாய்வுத் திணைக்களத்திற்கு (சிஐடி) கொழும்பு கோட்டை நீதவான் நீதிமன்றம் இன்று (28) உத்தரவிட்டுள்ளது.
மருத்துவ சிகிச்சையைத் தொடர்வதற்காக சிங்கப்பூருக்குப் பயணம் மேற்கொள்ள அனுமதி வழங்குமாறு கோரி, முன்னாள் ஜனாதிபதி கோட்டாபய ராஜபக்ஷ சார்பில் அவரது சட்டத்தரணிகள் தாக்கல் செய்த மனுவைப் பரிசீலித்த பின்னர், கொழும்பு கோட்டை நீதவான் பசன் அமரசேன இந்த உத்தரவைப் பிறப்பித்துள்ளார்.
கோட்டாபய ராஜபக்ஷவுக்கு இலங்கையிலுள்ள வைத்தியசாலையொன்றில் இதய அறுவை சிகிச்சை மேற்கொள்ளப்பட்டதாகவும், அதன் தொடர்ச்சியாக மேலதிக மருத்துவ சிகிச்சைகளைப் பெற்றுக்கொள்வதற்காக அவர் சிங்கப்பூர் செல்ல வேண்டியுள்ளதாகவும் அவரது சட்டத்தரணிகள் நீதிமன்றத்தில் தெரிவித்துள்ளனர்.
இந்த வழக்கு விசாரணைக்கு எடுத்துக்கொள்ளப்பட்டபோது, முன்னாள் ஜனாதிபதி கோட்டாபய ராஜபக்ஷவும் திறந்த நீதிமன்றத்தில் பிரசன்னமாகியிருந்தார்.
எனினும், இந்த வழக்கில் முறைப்பாட்டாளரான குற்றப் புலனாய்வுத் திணைக்களத்தின் அதிகாரிகள் நீதிமன்றத்தில் முன்னிலையாகியிருக்கவில்லை.
இதனையடுத்து, வெளிநாட்டுப் பயணத் தடையைத் தற்காலிகமாக நீக்குவது தொடர்பான கோரிக்கை குறித்து தமது நிலைப்பாட்டை முன்வைப்பதற்காக, நவம்பர் 4ஆம் திகதி நீதிமன்றத்தில் முன்னிலையாகுமாறு சிஐடிக்கு நீதவான் உத்தரவிட்டுள்ளார்.
உயிர்த்த ஞாயிறு பயங்கரவாதத் தாக்குதல்கள் தொடர்பான விசாரணைகளின் பின்னணியில், முன்னாள் ஜனாதிபதி கோட்டாபய ராஜபக்ஷ உள்ளிட்ட பல முன்னாள் புலனாய்வு அதிகாரிகளுக்கு வெளிநாட்டுப் பயணத் தடை விதிக்கப்பட்டுள்ளமை குறிப்பிடத்தக்கது.
