இலங்கையின் பல்வேறு பகுதிகளில் இடம்பெற்ற விபத்துகள் – 4 பாதசாரிகள் உயிரிழப்பு!
இலங்கையின் அவிசாவளை, மத்தேகொட, கொழும்பு மற்றும் களுத்துறை ஆகிய பகுதிகளில் செவ்வாய்க்கிழமை (03) இடம்பெற்ற வெவ்வேறு வீதி விபத்துகளில் நான்கு பாதசாரிகள் உயிரிழந்துள்ளதாக பொலிஸார் தெரிவித்துள்ளனர்.
அவிசாவளையில் உள்ள வைத்தியசாலைக்கு முன்னால் அமைந்துள்ள பாதசாரிகள் கடவையில் வீதியைக் கடந்துகொண்டிருந்த 65 வயதுடைய பெண் ஒருவர், லொறி ஒன்றில் மோதுண்டு உயிரிழந்துள்ளார்.
மத்தேகொட பகுதியில், கட்டுப்பாட்டை இழந்த கார் ஒன்று பாதசாரி மீது மோதியதுடன், நிறுத்தி வைக்கப்பட்டிருந்த முச்சக்கரவண்டி மற்றும் மின்கம்பத்திலும் மோதியுள்ளது. இந்த விபத்தில் 68 வயதுடைய பாதசாரி உயிரிழந்துள்ளார்.
இதேவேளை, கொழும்பு பகடேல் சந்திக்கு அருகில் கட்டுப்பாட்டை இழந்த முச்சக்கரவண்டி ஒன்று பாதசாரி மீது மோதிய பின்னர் கவிழ்ந்துள்ளது. இந்த விபத்தில் உயிரிழந்த நபரின் அடையாளம் இதுவரை உறுதிப்படுத்தப்படவில்லை என பொலிஸார் தெரிவித்துள்ளனர்.
களுத்துறை நாகொட – கத்துகுருந்த வீதியில், வீதியைக் கடந்துகொண்டிருந்த இரண்டு பெண்கள் மீது கெப் ரக வாகனம் மோதியதில் 66 வயதுடைய பெண் ஒருவர் உயிரிழந்துள்ளார். மற்றைய பெண் காயமடைந்து வைத்தியசாலையில் அனுமதிக்கப்பட்டுள்ளார்.
இந்த விபத்துகள் தொடர்பில் அவிசாவளை, மத்தேகொட மற்றும் களுத்துறை ஆகிய பகுதிகளில் இடம்பெற்ற விபத்துகளுக்குப் பொறுப்பான வாகன சாரதிகள் கைது செய்யப்பட்டுள்ளதாக பொலிஸார் தெரிவித்துள்ளனர்.
நான்கு விபத்துகள் தொடர்பிலும் மேலதிக விசாரணைகள் முன்னெடுக்கப்பட்டு வருகின்றன.
