TIN இலக்கம் இல்லாதவர்களுக்கு வங்கிக் கணக்கு ஆரம்பித்தல், வாகன வருமான வரி அனுமதிப்பத்திரம் புதுப்பித்தலில் தற்காலிக சலுகை!

வரி செலுத்துவோர் அடையாள இலக்கமான (TIN) இலக்கத்தை இதுவரை பெற்றுக்கொள்ளாதவர்களுக்கு வங்கிக் கணக்குகளை ஆரம்பித்தல் மற்றும் வாகன வருமான வரி அனுமதிப்பத்திரங்களைப் புதுப்பித்தல் ஆகிய இரண்டு சேவைகளிலும் அரசாங்கம் தற்காலிக சலுகையை அறிவித்துள்ளது.

எதிர்வரும் பொருளாதார நடவடிக்கைகளுக்காக நவம்பர் 1, 2026 முதல் எட்டு வகையான செயற்பாடுகளுக்கு TIN இலக்கம் கட்டாயமாக்கப்பட்டுள்ள நிலையில், பொதுமக்கள் எதிர்கொள்ளும் சிரமங்களைக் கருத்திற்கொண்டு இந்தத் தற்காலிக நிவாரணம் வழங்கப்பட்டுள்ளதாக அமைச்சரவைப் பேச்சாளரும் சுகாதார மற்றும் வெகுஜன ஊடக அமைச்சருமான டொக்டர் நளிந்த ஜயதிஸ்ஸ தெரிவித்துள்ளார்.

வாராந்த அமைச்சரவை முடிவுகளை அறிவிக்கும் ஊடகவியலாளர் சந்திப்பில் கருத்துத் தெரிவித்த அவர், TIN இலக்கம் இல்லாதவர்கள் தங்களது தேசிய அடையாள அட்டை இலக்கம் உள்ளிட்ட அடிப்படை தனிப்பட்ட விபரங்களைச் சமர்ப்பித்து வங்கிக் கணக்குகளை ஆரம்பிக்க முடியும் எனக் குறிப்பிட்டார்.

அதேபோன்று, வாகன வருமான வரி அனுமதிப்பத்திரங்களைப் புதுப்பிக்கும்போது TIN சான்றிதழைச் சமர்ப்பிக்காமல், தேசிய அடையாள அட்டை விபரங்களை வழங்கி பிரதேச செயலகங்களில் குறித்த சேவையைப் பெற்றுக்கொள்ள முடியும் என்றும் அவர் தெரிவித்தார்.

இதற்கான அறிவுறுத்தல்களை உரிய நிறுவனங்களுக்கு வழங்குவதற்காக உள்நாட்டு இறைவரித் திணைக்கள ஆணையாளர் நாயகம் நடவடிக்கை எடுத்துள்ளதாகவும் அமைச்சர் குறிப்பிட்டார்.

எனினும், இந்தத் தற்காலிகச் சலுகையானது TIN இலக்கத்தைப் பெற்றுக்கொள்ள வேண்டிய கட்டாயத்தை நீக்குவதில்லை எனத் தெரிவித்த அமைச்சர், பொதுமக்கள் எவ்வித பதற்றமுமின்றி படிப்படியாகப் பதிவுகளை மேற்கொள்ளுமாறு கேட்டுக்கொண்டார்.

இலங்கையில் 18 வயதுக்கு மேற்பட்ட சுமார் 17 மில்லியன் மக்கள் உள்ள நிலையில், அவர்களில் இதுவரை 13 மில்லியன் பேருக்கு TIN இலக்கங்கள் வழங்கப்பட்டுள்ளன. எஞ்சியுள்ள சுமார் 4 மில்லியன் பேர் இன்னும் பதிவுகளை மேற்கொள்ள வேண்டியுள்ளதாகவும் அவர் தெரிவித்தார்.

அத்துடன், TIN இலக்கத்தைப் பெற்றுக்கொள்வதால் ஒருவர் தானாகவே வருமான வரி செலுத்த வேண்டிய நிலை ஏற்படாது என்றும் அமைச்சர் தெளிவுபடுத்தினார்.

13 மில்லியன் பேருக்கு TIN இலக்கங்கள் வழங்கப்பட்டுள்ள போதிலும், தற்போது சுமார் 12 இலட்சம் வருமான வரிக் கோப்புகளே பராமரிக்கப்பட்டு வருவதாகவும் அவர் சுட்டிக்காட்டினார்.

TIN கட்டாயமாக்கப்பட்டதைத் தொடர்ந்து புதிய வங்கிக் கணக்குகளை ஆரம்பித்தல் மற்றும் வாகன வருமான வரி அனுமதிப்பத்திரங்களைப் புதுப்பித்தல் ஆகியவற்றிலேயே அதிகளவிலான சிக்கல்கள் ஏற்பட்டுள்ளதாகவும், ஏனைய நடவடிக்கைகளில் இத்தகைய பாதிப்புகள் பெருமளவில் பதிவாகவில்லை என்றும் அமைச்சர் குறிப்பிட்டார்.

உள்நாட்டு இறைவரித் திணைக்கள அலுவலகங்களில் நீண்ட வரிசைகள் காணப்படுவது மற்றும் இணையவழி TIN பதிவுச் சேவையைப் பயன்படுத்துவதில் ஏற்பட்டுள்ள தொழில்நுட்பச் சிக்கல்கள் தொடர்பில் எழுப்பப்பட்ட கேள்விகளுக்குப் பதிலளித்த அவர், அவற்றைச் சீர்செய்வதற்கான நடவடிக்கைகள் முன்னெடுக்கப்பட்டு வருவதாகத் தெரிவித்தார்.

மேலும், நவம்பர் 1ஆம் திகதிக்குப் பின்னர் TIN பதிவுகளை மேற்கொள்ள முடியாது எனப் பரப்பப்படும் தகவல்களை மக்கள் நம்ப வேண்டாம் என்றும் அவர் கேட்டுக்கொண்டார்.

பொருளாதார நடவடிக்கைகளை முறைப்படுத்துதல் மற்றும் வரி நிர்வாகத்தை மேம்படுத்துதல் ஆகிய நோக்கங்களின் அடிப்படையில், TIN பதிவு முறைக்குள் தகுதியான அனைவரையும் படிப்படியாக உள்வாங்க அரசாங்கம் நடவடிக்கை எடுத்து வருவதாகவும் அமைச்சர் மேலும் தெரிவித்தார்.