இலங்கையின் புதிய குற்றத் தடுப்புச் சட்டமூலத்திற்கு ஐ.நா. கடும் எதிர்ப்பு!

இலங்கையில் முன்மொழியப்பட்டுள்ள ஒழுங்கமைக்கப்பட்ட குற்றங்களைத் தடுக்கும் சட்டமூலத்தின் பல்வேறு ஏற்பாடுகள் சர்வதேச மனித உரிமைக் கடப்பாடுகளை மீறக்கூடும் என ஐக்கிய நாடுகள் சபையின் மனித உரிமை நிபுணர்கள் எச்சரிக்கை விடுத்துள்ளனர்.

குறித்த சட்டமூலத்தை தற்போதைய வடிவில் நடைமுறைப்படுத்த வேண்டாம் என இலங்கை அரசாங்கத்திடம் அவர்கள் வலியுறுத்தியுள்ளனர்.

கடந்த ஒக்டோபர் 6ஆம் திகதி வர்த்தமானியில் வெளியிடப்பட்ட இந்தச் சட்டமூலம் தொடர்பில், ஐந்து ஐ.நா. மனித உரிமை நிபுணர்கள் ஒக்டோபர் 30ஆம் திகதியிட்ட 31 பக்கங்கள் கொண்ட அறிக்கையொன்றை வெளியிட்டு தமது கவலைகளை முன்வைத்துள்ளனர்.

இந்தச் சட்டமூலத்தின் சில ஏற்பாடுகள், சர்ச்சைக்குரிய பயங்கரவாதத் தடுப்புச் சட்டத்திற்கு (PTA) நிகரான அதிகாரங்களை வழங்குவதுடன், சில விடயங்களில் அதனைவிடவும் விரிவான அதிகாரங்களை வழங்கக்கூடும் என அவர்கள் சுட்டிக்காட்டியுள்ளனர்.

ஒழுங்கமைக்கப்பட்ட குற்றங்களைக் கட்டுப்படுத்த வலுவான சட்டங்கள் அவசியம் என்பதை ஏற்றுக்கொண்டுள்ள ஐ.நா. நிபுணர்கள், அவை அடிப்படை உரிமைகளையும் நீதித்துறைப் பாதுகாப்பு ஏற்பாடுகளையும் உறுதிப்படுத்துவதாக அமைய வேண்டும் என வலியுறுத்தியுள்ளனர்.

சட்டமூலத்தில் சுட்டிக்காட்டப்பட்டுள்ள முக்கிய சர்ச்சைக்குரிய அம்சங்கள் வருமாறு:

ஒரு வருடம் வரை பொலிஸ் தடுப்புக்காவல்: பொலிஸுக்குப் பொறுப்பான அமைச்சின் செயலாளர், சந்தேகநபர்களை விசாரணைக்காகவும் பொலிஸ் நிலையங்களில் ஒரு வருடம் வரை தடுத்து வைக்க அனுமதிக்கும் அதிகாரத்தை இந்தச் சட்டமூலம் வழங்கக்கூடும்.

பொலிஸாரிடம் வழங்கப்படும் வாக்குமூலங்கள்: உதவிப் பொலிஸ் அத்தியட்சகர் அல்லது அதற்கு மேற்பட்ட பதவிநிலையிலுள்ள அதிகாரிகளிடம் வழங்கப்படும் வாக்குமூலங்களை நீதிமன்றத்தில் சாட்சியமாக ஏற்றுக்கொள்ள முடியும். அத்தகைய வாக்குமூலங்கள் அச்சுறுத்தல் அல்லது வற்புறுத்தல் மூலம் பெறப்பட்டவை என்பதை நிரூபிக்கும் பொறுப்பும் குற்றம் சாட்டப்பட்டவர்களிடம் ஒப்படைக்கப்படலாம்.

ஊடகச் செய்திகளுக்குக் கட்டுப்பாடு: இந்தச் சட்டமூலத்தின் கீழ் உள்ளடக்கப்படும் நீதிமன்ற நடவடிக்கைகள் தொடர்பில், நீதிமன்றத்தின் முன் அனுமதியின்றி செய்தி வெளியிடும் ஊடகவியலாளர்களுக்கு சிறைத்தண்டனை விதிக்கப்படக்கூடிய ஏற்பாடுகள் உள்ளடக்கப்பட்டுள்ளன.

கண்காணிப்பு அதிகாரங்கள்: நீதிமன்ற அனுமதியின்றி சில தொலைத்தொடர்பு பதிவுகளைப் பொலிஸார் பெற்றுக்கொள்ள முடியும். மேலும், தகவல் தொடர்புகளை இடைமறித்துக் கண்காணித்தல் மற்றும் மறைகுறியாக்கப்பட்ட தகவல்களைத் திறக்குமாறு கட்டாயப்படுத்துதல் போன்ற அதிகாரங்களும் வழங்கப்படலாம்.

ஒழுங்கமைக்கப்பட்ட குற்றங்கள் தொடர்பான பரந்த வரைவிலக்கணம்: சில சூழ்நிலைகளில் தொழிற்சங்கங்கள், மாணவர் அமைப்புகள் மற்றும் போராட்டக் குழுக்களும் ஒழுங்கமைக்கப்பட்ட குற்றச் செயல்களுடன் தொடர்புபடுத்தப்படக்கூடிய அபாயம் இருப்பதாக ஐ.நா. நிபுணர்கள் சுட்டிக்காட்டியுள்ளனர்.

மேலும், பயண நேரத்தைத் தவிர்த்து 72 மணித்தியாலங்கள் வரை சந்தேகநபர்களை நீதவான் முன்னிலையில் ஆஜர்படுத்தாமல் தடுத்து வைக்க அனுமதிக்கும் ஏற்பாடு குறித்தும் அவர்கள் கேள்வி எழுப்பியுள்ளனர்.

நீண்டகால பொலிஸ் தடுப்புக்காவலும், பொலிஸாரிடம் பெறப்படும் வாக்குமூலங்களை நீதிமன்றத்தில் சாட்சியமாக ஏற்றுக்கொள்ளும் ஏற்பாடும் இணைந்து, சித்திரவதை மற்றும் வற்புறுத்தி வாக்குமூலம் பெறப்படும் அபாயத்தை அதிகரிக்கக்கூடும் எனவும் எச்சரிக்கப்பட்டுள்ளது.

இலங்கை மனித உரிமைகள் ஆணைக்குழுவும் ஏற்கனவே இந்தச் சட்டமூலம் பயங்கரவாதத் தடுப்புச் சட்டத்தைவிடக் கடுமையானதாக அமையக்கூடும் எனத் தெரிவித்துள்ளதுடன், அதனை மீளப்பெற்று விரிவான திருத்தங்களை மேற்கொள்ளுமாறும் பரிந்துரைத்துள்ளதாக ஐ.நா. நிபுணர்கள் தமது அறிக்கையில் குறிப்பிட்டுள்ளனர்.

இந்தச் சட்டமூலம் ஊடகவியலாளர்கள், சட்டத்தரணிகள், மனித உரிமைப் பாதுகாவலர்கள் மற்றும் அமைதியான போராட்டங்களில் ஈடுபடுவோர் ஆகியோரின் உரிமைகளையும் பாதிக்கக்கூடும் எனவும் அவர்கள் கவலை வெளியிட்டுள்ளனர்.

எனவே, இலங்கை மனித உரிமைகள் ஆணைக்குழு, சட்டத்துறை நிபுணர்கள், சிவில் சமூக அமைப்புகள் மற்றும் பாதிக்கப்படக்கூடிய சமூகத்தினருடன் கலந்தாலோசித்து, சட்டமூலத்தில் கணிசமான திருத்தங்களை மேற்கொள்ளுமாறு அரசாங்கத்திடம் வலியுறுத்தியுள்ளனர்.

தடுப்புக்காவல் அதிகாரங்கள், நீதித்துறை மேற்பார்வை, ஊடகக் கட்டுப்பாடுகள், கண்காணிப்பு ஏற்பாடுகள் மற்றும் சித்திரவதைகளைத் தடுப்பதற்கான பாதுகாப்பு நடவடிக்கைகள் உள்ளிட்ட 15 விடயங்கள் தொடர்பில் இலங்கை அரசாங்கத்திடமும் ஐ.நா. நிபுணர்கள் விளக்கம் கோரியுள்ளனர்.

சித்திரவதை, தன்னிச்சையான தடுப்புக்காவல், வலிந்து காணாமல் ஆக்கப்படுதல், நீதிக்குப் புறம்பான கொலைகள் மற்றும் பெண்கள், சிறுமிகளுக்கு எதிரான வன்முறைகள் தொடர்பான ஐ.நா. நிபுணர்களின் அதிகார வரம்புகளின் கீழ் இந்தத் தகவல் தொடர்பு வெளியிடப்பட்டுள்ளது.

ஒழுங்கமைக்கப்பட்ட குற்றங்களைக் கட்டுப்படுத்துவது அரசாங்கத்தின் நியாயமான நோக்கமாக இருந்தாலும், அதற்காகக் கொண்டுவரப்படும் சட்டங்கள் இலங்கையின் சர்வதேச மனித உரிமைக் கடப்பாடுகளுக்கு முரணாக அமையக்கூடாது எனவும் ஐ.நா. நிபுணர்கள் வலியுறுத்தியுள்ளனர்.