HSBC இலங்கையிலிருந்து வெளியேறும் முடிவை மறுபரிசீலனை செய்யுமாறு ரவி கருணாநாயக்க கோரிக்கை – 1,659 பேரின் வேலைவாய்ப்புக்கு ஆபத்து

இலங்கையில் தனது உலகளாவிய சேவை மையத்தை மூடிவிட்டு அதன் செயற்பாடுகளை வெளிநாடுகளுக்கு மாற்றும் முடிவை மறுபரிசீலனை செய்யுமாறு HSBC வங்கிக் குழுமத்திடம் முன்னாள் நிதியமைச்சரும் எதிர்க்கட்சி நாடாளுமன்ற உறுப்பினருமான ரவி கருணாநாயக்க கோரிக்கை விடுத்துள்ளார்.

இந்த முடிவினால் 1,659 ஊழியர்களின் வேலைவாய்ப்பும் அவர்களது குடும்பங்களின் வாழ்வாதாரமும் பாதிக்கப்படக்கூடும் என அவர் சுட்டிக்காட்டியுள்ளார்.

இது தொடர்பாக 2026 நவம்பர் 9ஆம் திகதியிட்டு HSBC குழுமத்தின் தலைவருக்கும் பிரதம நிறைவேற்று அதிகாரிக்கும் அனுப்பியுள்ள கடிதத்தில், HSBC Electronic Data Processing Lanka நிறுவனத்தை மூடுவதற்குப் பதிலாக மாற்று வழிகளை ஆராய்வதற்கான அவசரப் பேச்சுவார்த்தைகளை முன்னெடுக்குமாறு அவர் கோரியுள்ளார்.

குறிப்பாக, செயற்பாடுகளை வெளிநாடுகளுக்கு மாற்றும் நடவடிக்கை மீளமுடியாத நிலையை அடைவதற்கு முன்னர், மூடல் தீர்மானத்தை மீளாய்வு செய்து காலவரையறையுடன் கூடிய பேச்சுவார்த்தைகளை ஆரம்பிக்க வேண்டும் என அவர் வலியுறுத்தியுள்ளார்.

2026 செப்டெம்பர் 30ஆம் திகதி நிலவரப்படி, இலங்கையில் உள்ள HSBC சேவை மையத்தில் 1,659 பேர் பணியாற்றுவதாக ஒக்டோபர் 7ஆம் திகதியிட்ட நிறுவனத்தின் அறிவிப்பில் குறிப்பிடப்பட்டிருந்ததை ரவி கருணாநாயக்க தனது கடிதத்தில் சுட்டிக்காட்டியுள்ளார்.

ஒரு கட்டத்தில் சுமார் 4,500 இளம் இலங்கையர்களுக்கு சர்வதேச தரத்திலான தொழில் வாய்ப்புகளையும் தொழில்முறை வளர்ச்சிக்கான சந்தர்ப்பங்களையும் இந்த சேவை மையம் வழங்கியிருந்ததாகவும் அவர் குறிப்பிட்டுள்ளார்.

இந்த மையம் மூடப்பட்டால் ஊழியர்களின் வாழ்வாதாரம் மட்டுமன்றி, அவர்களது குடும்பங்களின் நிதிப் பொறுப்புகள், பிள்ளைகளின் கல்வி, வீடமைப்புக் கடமைகள் மற்றும் எதிர்கால வேலைவாய்ப்புகள் உள்ளிட்ட பல்வேறு அம்சங்களும் பாதிக்கப்படும் என அவர் கவலை தெரிவித்துள்ளார்.

அதேவேளை, உலகளாவிய செயற்பாட்டு மாதிரியை மறுபரிசீலனை செய்ததன் அடிப்படையிலேயே இலங்கையிலுள்ள செயற்பாடுகளை மாற்றும் தீர்மானம் எடுக்கப்பட்டதாகவும், இது இலங்கை நிறுவனத்தின் செயல்திறனுடன் தொடர்புடையதல்ல என்றும் HSBC தனது ஒக்டோபர் 7ஆம் திகதியிட்ட அறிவிப்பில் தெரிவித்திருந்ததை அவர் நினைவுபடுத்தியுள்ளார்.

இலங்கை நிறுவனத்தின் செயல்திறன் காரணமாக இந்த முடிவு எடுக்கப்படவில்லை என்ற அங்கீகாரம், மூடல் தீர்மானத்துக்குப் பதிலாக மாற்று வழிகளை ஆராய்வதற்கான வலுவான காரணமாக அமைகிறது என்றும் அவர் தெரிவித்துள்ளார்.

2001 முதல் 2004ஆம் ஆண்டு வரை வர்த்தக மற்றும் வாணிப அமைச்சராகப் பதவி வகித்த காலத்தில், HSBC நிறுவனத்தின் முதலீட்டை இலங்கைக்குக் கொண்டுவருவதில் தாம் பங்களித்ததாகக் குறிப்பிட்டுள்ள ரவி கருணாநாயக்க, கடந்த இரண்டு தசாப்தங்களுக்கும் மேலாக இந்தக் கூட்டாண்மை வேலைவாய்ப்பு உருவாக்கத்துக்கும் திறன்மிக்க தொழிலாளர்களை உருவாக்குவதற்கும் பெரும் பங்களிப்புச் செய்துள்ளதாகத் தெரிவித்துள்ளார்.

2004ஆம் ஆண்டு கொழும்பு உலக வர்த்தக மையத்தில் தனது செயற்பாடுகளை ஆரம்பித்த HSBC, பின்னர் ஸ்ரீ ஜயவர்தனபுர கோட்டே, யூனியன் பிளேஸ் மற்றும் மிரேகா டவர் உள்ளிட்ட இடங்களுக்கு தனது செயற்பாடுகளை விரிவுபடுத்தியதாகவும் அவர் குறிப்பிட்டுள்ளார்.

செயற்பாட்டுச் செலவுகள், பணியாளர் கிடைப்புத் தன்மை, நிறுவனத்தின் அளவு மற்றும் போட்டித்தன்மை தொடர்பான சவால்கள் கவனத்தில் கொள்ளப்பட வேண்டியவை என்பதை ஏற்றுக்கொண்ட அவர், இவற்றுக்குத் தீர்வு காண அரசாங்கம் மற்றும் சம்பந்தப்பட்ட தரப்புகளுடன் இணைந்து செயற்படுமாறு HSBC நிர்வாகத்திடம் கோரிக்கை விடுத்துள்ளார்.

செலவுகளைக் குறைத்தல், புதிய பணியாளர்களை இணைத்தல், பயிற்சிகள் வழங்குதல், உட்கட்டமைப்பு வசதிகளை மேம்படுத்துதல் மற்றும் கொள்கை ரீதியான மாற்றங்கள் உள்ளிட்ட விடயங்கள் குறித்து ஆராய முடியும் என்றும் அவர் தெரிவித்துள்ளார்.

தற்போது அரசாங்கத்தில் இல்லாவிட்டாலும், HSBC நிறுவனத்தின் இலங்கைச் செயற்பாடுகளைத் தொடர்ந்து தக்கவைத்துக்கொள்வதற்கான நடவடிக்கைகளில் அரசாங்கம், சம்பந்தப்பட்ட அதிகாரிகள் மற்றும் தொழில்துறைப் பங்காளர்களுடன் இணைந்து செயற்படத் தயாராக இருப்பதாகவும் அவர் குறிப்பிட்டுள்ளார்.

வேலைவாய்ப்புகளைப் பாதுகாப்பதும் சர்வதேச முதலீடுகளைத் தக்கவைப்பதும் அரசியல் வேறுபாடுகளுக்கு அப்பாற்பட்ட தேசியப் பொறுப்பாகக் கருதப்பட வேண்டும் என்றும் அவர் வலியுறுத்தியுள்ளார்.

பொருளாதார சவால்களில் இருந்து மீண்டு நம்பிக்கையைக் கட்டியெழுப்ப இலங்கை முயற்சித்து வரும் நிலையில், நீண்டகாலமாக நாட்டில் முதலீடு செய்து வரும் சர்வதேச நிறுவனங்களின் தொடர்ச்சியான ஆதரவு மிகவும் அவசியமானது எனவும் ரவி கருணாநாயக்க சுட்டிக்காட்டியுள்ளார்.

எனவே, இலங்கையில் HSBC உருவாக்கியுள்ள திறன்கள், அனுபவங்கள் மற்றும் ஆயிரக்கணக்கானோரின் வாழ்வாதாரம் உள்ளிட்ட பரந்த தேசிய நலன்களைக் கருத்திற்கொண்டு, இலங்கையுடனான இரண்டு தசாப்தங்களுக்கும் மேலான கூட்டாண்மையைத் தொடர்ந்து முன்னெடுக்குமாறு அவர் அந்த வங்கிக் குழுமத்திடம் கோரிக்கை விடுத்துள்ளார்.