நீரிழிவு நோயைக் கட்டுப்படுத்த உணவு மட்டுமல்ல; தூக்கமும் மன அழுத்த முகாமைத்துவமும் அவசியம்!

டைப் 2 நீரிழிவு நோயைக் கட்டுப்படுத்துவதற்கும், அதனைத் தடுப்பதற்கும் உணவுப் பழக்கங்களில் மாற்றங்களை ஏற்படுத்துவது மட்டுமன்றி, போதிய தூக்கத்தையும் மன அழுத்தத்தைக் கட்டுப்படுத்துவதையும் கவனத்தில் கொள்ள வேண்டும் எனச் சுட்டிக்காட்டப்பட்டுள்ளது.

யூனியன் அஷ்யூரன்ஸ் நிறுவனத்தின் ‘சுவமாக’ (Suwamaga) திட்டத்தின் கீழ் மேற்கொள்ளப்பட்ட ஆய்வுகளின்படி, ஏற்கனவே நீரிழிவு நோய் இருப்பதாகக் கண்டறியப்பட்டு HbA1c பரிசோதனை செய்துகொண்டவர்களில் 92 சதவீதமானோரின் இரத்தச் சர்க்கரை அளவு தொடர்ந்தும் நீரிழிவு நோய்க்கான வரம்பிலேயே காணப்பட்டுள்ளது.

இதன் மூலம், உணவுக் கட்டுப்பாடு மாத்திரம் நீரிழிவு நோயைக் கட்டுப்படுத்தப் போதுமானதல்ல என்பதும், தூக்கம் மற்றும் அன்றாட மன அழுத்தம் போன்ற காரணிகளும் இரத்தச் சர்க்கரை அளவில் குறிப்பிடத்தக்க தாக்கத்தை ஏற்படுத்துகின்றன என்பதும் தெரியவந்துள்ளது.

நவம்பர் 14ஆம் திகதி அனுஷ்டிக்கப்படும் உலக நீரிழிவு தினத்தை முன்னிட்டு, 'நீரிழிவு நோய்க்கு எதிரான ஆரம்பகால நடவடிக்கை' (Early Action on Diabetes) என்ற தொனிப்பொருளின் கீழ் இந்த விடயங்கள் சுட்டிக்காட்டப்பட்டுள்ளன.

யூனியன் அஷ்யூரன்ஸ் நிறுவனத்தின் சுவமாக திட்டத்தின் கீழ், இலங்கையின் 25 மாவட்டங்களில் 28,177 பேர் பரிசோதனைக்கு உட்படுத்தப்பட்டுள்ளனர். இவர்களில் 869 பேர் தங்களுக்கு நீரிழிவு நோய் இருக்கக்கூடும் என்பதை முதன்முறையாக அறிந்துகொண்டுள்ளனர்.

மன அழுத்தத்துக்கும் இரத்தச் சர்க்கரைக்கும் இடையிலான தொடர்பு

தொழில் சுமை, பொருளாதார நெருக்கடி மற்றும் போதிய தூக்கமின்மை போன்ற காரணங்களால் ஏற்படும் மன அழுத்தம், உடலில் கோர்டிசோல் மற்றும் அட்ரினலின் போன்ற மன அழுத்த ஹோர்மோன்களின் சுரப்பை அதிகரிக்கிறது.

இதனால் இரத்தத்தில் குளுக்கோஸின் அளவு அதிகரிப்பதுடன், நீண்டகால மன அழுத்தம் உடலின் இன்சுலின் செயற்பாட்டையும் பாதிக்கக்கூடும் எனச் சுட்டிக்காட்டப்பட்டுள்ளது.

2021ஆம் ஆண்டு மேற்கொள்ளப்பட்ட ஒன்பது ஆய்வுகளை உள்ளடக்கிய மதிப்பாய்வில், அதிகளவிலான தொழில் சார்ந்த மன அழுத்தம் டைப் 2 நீரிழிவு நோய் ஏற்படும் அபாயத்தை 16 சதவீதம் அதிகரிப்பதுடன், பெண்களிடையே இந்த அபாயம் 48 சதவீதமாக அதிகரிப்பதாகவும் தெரிவிக்கப்பட்டுள்ளது.

இந்நிலையில், மன அழுத்தம் தொடர்பாக மக்கள் தங்களைத் தாங்களே மதிப்பீடு செய்துகொள்வதற்கு உதவும் வகையில், யூனியன் அஷ்யூரன்ஸ் நிறுவனம் இலங்கை நீரிழிவு சங்கத்துடன் இணைந்து இலவச மன அழுத்த சுயமதிப்பீட்டுச் சேவையொன்றை சுவமாக இணையப் பக்கத்தில் அறிமுகப்படுத்தவுள்ளது.

தூக்கமின்மையால் ஏற்படும் பாதிப்புகள்

உடலின் வளர்சிதை மாற்றச் செயற்பாடுகளைச் சீராகப் பேணுவதற்கு தூக்கம் மிகவும் அவசியமானது என மருத்துவ ஆய்வுகள் சுட்டிக்காட்டுகின்றன.

தினமும் ஆறு மணித்தியாலங்களுக்கும் குறைவாகத் தரமான தூக்கத்தைப் பெறுவது, இன்சுலின் உணர்திறனைப் பாதித்து இரத்தத்தில் உள்ள குளுக்கோஸைச் சீராகக் கையாளும் உடலின் திறனைக் குறைக்கக்கூடும்.

அத்துடன், தூக்கமின்மை பசியைக் கட்டுப்படுத்தும் ஹோர்மோன்களின் சமநிலையையும் பாதிப்பதால், அடுத்த நாள் அதிக சர்க்கரை மற்றும் மாப்பொருள் அடங்கிய உணவுகளை உட்கொள்வதற்கான விருப்பம் அதிகரிக்கக்கூடும்.

இதனால், போதிய தூக்கமின்மை உடலின் வளர்சிதை மாற்றத்தைப் பாதிப்பதுடன், ஆரோக்கியமற்ற உணவுப் பழக்கங்களுக்கும் வழிவகுக்கும் எனத் தெரிவிக்கப்பட்டுள்ளது.

இரத்தச் சர்க்கரையைக் கட்டுப்படுத்துவதற்கான பரிந்துரைகள்

உடலின் வளர்சிதை மாற்ற ஆரோக்கியத்தைப் பாதுகாப்பதற்கு பின்வரும் பழக்கவழக்கங்களைப் பின்பற்றுவது அவசியம் எனச் சுட்டிக்காட்டப்பட்டுள்ளது.

- தினமும் 7 முதல் 8 மணித்தியாலங்கள் வரை போதிய தூக்கத்தைப் பெறுதல்.
- உறங்குவதற்கு ஒரு மணித்தியாலத்திற்கு முன்னர் கையடக்கத் தொலைபேசி உள்ளிட்ட திரைச் சாதனங்களின் பயன்பாட்டைக் குறைத்தல்.
- ஆழ்ந்த சுவாசப் பயிற்சிகள் மற்றும் சிறிய உடற்பயிற்சிகளை மேற்கொள்ளுதல்.
- வேலை நேரத்தில் இடையிடையே ஓய்வு எடுத்துக்கொண்டு மன அழுத்தத்தைக் குறைத்தல்.
- உணவுப் பழக்கங்கள் மட்டுமன்றி, மன அழுத்தம் மற்றும் தூக்கமின்மை ஆகியவை இரத்தச் சர்க்கரை அளவில் ஏற்படுத்தும் மாற்றங்களையும் அவதானித்தல்.

சுவமாக திட்டத்தில் பங்கேற்றவர்களில் 82 சதவீதமானோர் தங்களுக்கு நீரிழிவு நோய் இல்லை என நம்பியிருந்ததுடன், இதற்கு முன்னர் நீரிழிவு நோய்க்கான பரிசோதனைகளையும் மேற்கொண்டிருக்கவில்லை எனத் தெரிவிக்கப்பட்டுள்ளது.

ஆரோக்கியமான வாழ்க்கைக்கு முழுமையான அணுகுமுறை அவசியம்

நீரிழிவு நோயைக் கட்டுப்படுத்துவதற்கும் நீண்டகால ஆரோக்கியத்தைப் பாதுகாப்பதற்கும் உணவுக் கட்டுப்பாடு, போதிய தூக்கம் மற்றும் மன அழுத்த முகாமைத்துவம் ஆகிய மூன்றும் முக்கியமானவை என யூனியன் அஷ்யூரன்ஸ் நிறுவனம் வலியுறுத்தியுள்ளது.

மேலும், சுவமாக திட்டத்தில் பங்கேற்றவர்களிடம் மேற்கொள்ளப்பட்ட தொடர் ஆய்வில், 71 சதவீதமானோர் தமது ஆரோக்கியப் பழக்கவழக்கங்களில் நேர்மறையான மாற்றங்களை ஏற்படுத்தியுள்ளதாகவும், 36 சதவீதமானோர் ஆரோக்கியமான வாழ்க்கை முறையைப் பின்பற்றத் தொடங்கியுள்ளதாகவும் தெரிவிக்கப்பட்டுள்ளது.

இதன் மூலம், நோய்கள் தொடர்பான விழிப்புணர்வும் ஆரம்பகாலப் பரிசோதனைகளும் ஆரோக்கியமான வாழ்க்கை முறையை நோக்கி மக்களை வழிநடத்துவதில் முக்கிய பங்கு வகிப்பது எடுத்துக்காட்டப்பட்டுள்ளது.