அம்பாறை வைத்தியசாலையில் உரிமை கோரப்படாத 3 சடலங்கள் – அடையாளம் காண பொலிஸார் உதவி கோரல்
அம்பாறை பொது வைத்தியசாலையின் பிரேத அறையில் வைக்கப்பட்டுள்ள அடையாளம் காணப்படாத மூன்று ஆண்களின் சடலங்களை அடையாளம் காண்பதற்கு பொதுமக்களின் உதவியை பொலிஸார் கோரியுள்ளனர்.
குறித்த மூவரும் வெவ்வேறு சந்தர்ப்பங்களில் மருத்துவ சிகிச்சைக்காக அம்பாறை வைத்தியசாலையில் அனுமதிக்கப்பட்ட நிலையில், சிகிச்சை பெற்று வந்தபோது உயிரிழந்துள்ளனர்.
எனினும், சில மாதங்கள் கடந்துள்ள போதிலும், உயிரிழந்தவர்களின் உறவினர்கள் எவரும் இதுவரை முன்வந்து சடலங்களை அடையாளம் காணவோ, பொறுப்பேற்கவோ இல்லை என பொலிஸார் தெரிவித்துள்ளனர்.
முதலாவது நபர்
உ.டி. பெர்னாண்டோ (U. D. Fernando) எனத் தனது பெயரைக் குறிப்பிட்டுள்ள இவர், வசிப்பிட முகவரியை வழங்கவில்லை.
2026 மார்ச் 29ஆம் திகதி அம்பாறை வைத்தியசாலையில் அனுமதிக்கப்பட்ட இவர், மார்ச் 31ஆம் திகதி உயிரிழந்துள்ளார்.
சுமார் 52 வயதுடைய இவர், 5 அடி 3 அங்குல உயரமும், கட்டான உடல்வாகும், சற்று நீளமான தலைமுடியும் கொண்டவர் எனத் தெரிவிக்கப்பட்டுள்ளது.
இரண்டாவது நபர்
விஜேரத்ன (Wijeratne) எனத் தனது பெயரைக் குறிப்பிட்டுள்ள இவர், வசிப்பிட முகவரியை வழங்கவில்லை.
2026 ஜூன் 24ஆம் திகதி வைத்தியசாலையில் அனுமதிக்கப்பட்ட இவர், மறுநாள் ஜூன் 25ஆம் திகதி உயிரிழந்துள்ளார்.
சுமார் 70 வயதுடைய இவர், 5 அடி 1 அங்குல உயரமும், கருமையான நிறமும், மெலிந்த உடல்வாகும், சற்று வளர்ந்த தலைமுடியும் கொண்டவர் எனப் பொலிஸார் தெரிவித்துள்ளனர்.
மூன்றாவது நபர்
இதுவரை அடையாளம் காணப்படாத மூன்றாவது நபர், 2026 ஆகஸ்ட் 10ஆம் திகதி அம்பாறை வைத்தியசாலையில் அனுமதிக்கப்பட்டுள்ளார்.
சிகிச்சை பெற்று வந்த நிலையில், ஒக்டோபர் 24ஆம் திகதி உயிரிழந்துள்ளார்.
சுமார் 70 வயதுடைய இவர், 5 அடி உயரமும், கருமையான நிறமும், மெலிந்த உடல்வாகும், குறுகிய தலைமுடியும் கொண்டவர் எனத் தெரிவிக்கப்பட்டுள்ளது.
குறித்த நபர்களை அடையாளம் காண்பதற்கோ அல்லது அவர்களது உறவினர்களைக் கண்டறிவதற்கோ தகவல்கள் தெரிந்தவர்கள் 071-8591148 என்ற தொலைபேசி இலக்கத்தின் ஊடாக அம்பாறை தலைமையக பொலிஸ் பரிசோதகரை அல்லது 063-2222222 என்ற இலக்கத்தின் ஊடாக அம்பாறை பொலிஸ் நிலையத்தைத் தொடர்புகொள்ளுமாறு பொலிஸார் கேட்டுக்கொண்டுள்ளனர்.
அத்துடன், உயிரிழந்தவர்களின் அடையாளங்களைக் கண்டறிவதற்கு இந்தத் தகவல்களைப் பொதுமக்கள் மற்றும் ஊடக நிறுவனங்கள் பரவலாகப் பகிர்ந்து உதவுமாறும் பொலிஸ் ஊடகப் பிரிவு கோரிக்கை விடுத்துள்ளது.
