2025ஆம் ஆண்டு வரவு செலவுத் திட்ட வாக்குறுதிகளில் 40% உரிய அளவில் நிறைவேற்றப்படவில்லை – வெரிட்டே ஆய்வு

இலங்கையின் 2025ஆம் ஆண்டு வரவு செலவுத் திட்டத்தில் முன்வைக்கப்பட்ட வாக்குறுதிகளில் சுமார் 40 சதவீதமானவை குறிப்பிடத்தக்க அளவில் நடைமுறைப்படுத்தப்படவில்லை என வெரிட்டே ரிசர்ச் (Verité Research) நிறுவனத்தின் ஆய்வில் தெரிவிக்கப்பட்டுள்ளது.

எனினும், 2017ஆம் ஆண்டு முதல் மேற்கொள்ளப்பட்டு வரும் கண்காணிப்பில், முழுமையாக நடைமுறைப்படுத்தப்பட்ட வரவு செலவுத் திட்ட முன்மொழிவுகளின் விகிதம் 2025ஆம் ஆண்டிலேயே அதிகபட்சமாகப் பதிவாகியுள்ளது.

வெரிட்டே ரிசர்ச் நிறுவனத்தின் PublicFinance.lk தளத்தின் கீழ் வெளியிடப்பட்டுள்ள 'Budget Promises' கண்காணிப்பு அறிக்கையிலேயே இந்தத் தகவல்கள் தெரிவிக்கப்பட்டுள்ளன.

2025ஆம் ஆண்டு வரவு செலவுத் திட்டத்தில் குறைந்தபட்சம் 500 மில்லியன் ரூபாய் ஒதுக்கீடு செய்யப்பட்ட 36 முக்கிய முன்மொழிவுகள் இந்த ஆய்வுக்கு உட்படுத்தப்பட்டுள்ளன. இவற்றுக்காக மொத்தம் 212.25 பில்லியன் ரூபாய் ஒதுக்கீடு செய்யப்பட்டிருந்தது.

ஆய்வின்படி, இந்த முன்மொழிவுகளில் 33 சதவீதமானவை முழுமையாக நடைமுறைப்படுத்தப்பட்டுள்ளதுடன், 8 சதவீதமானவை கணிசமான அளவில் நடைமுறைப்படுத்தப்பட்டுள்ளன. இதன்படி, மொத்தம் 41 சதவீதமான முன்மொழிவுகள் குறிப்பிடத்தக்க அளவில் நிறைவேற்றப்பட்டுள்ளன.

அதேவேளை, 22 சதவீதமானவை பகுதியளவில் நடைமுறைப்படுத்தப்பட்டுள்ளதுடன், 14 சதவீதமானவை மிகவும் குறைந்த முன்னேற்றத்தையே பதிவு செய்துள்ளன. மேலும், 3 சதவீதமானவை நிறைவேற்றப்படாத வாக்குறுதிகளாக வகைப்படுத்தப்பட்டுள்ளன.

ஏனைய 19 சதவீதமான முன்மொழிவுகளின் நடைமுறைப்படுத்தல் முன்னேற்றம் தொடர்பான தகவல்கள் வெளிப்படுத்தப்படவில்லை.

2024ஆம் ஆண்டில் முழுமையாக நடைமுறைப்படுத்தப்பட்ட வரவு செலவுத் திட்ட முன்மொழிவுகளின் விகிதம் 17 சதவீதமாக இருந்த நிலையில், 2025ஆம் ஆண்டில் அது 33 சதவீதமாக அதிகரித்துள்ளது.

இதன்படி, 12 முன்மொழிவுகள் முழுமையாகவும், 3 முன்மொழிவுகள் கணிசமான அளவிலும் நடைமுறைப்படுத்தப்பட்டுள்ளன. எட்டு முன்மொழிவுகள் பகுதியளவில் நடைமுறைப்படுத்தப்பட்டுள்ளதுடன், ஐந்து முன்மொழிவுகள் குறைந்த முன்னேற்றத்தையும், ஒரு முன்மொழிவு நிறைவேற்றப்படாத வாக்குறுதியாகவும் வகைப்படுத்தப்பட்டுள்ளது. ஏழு முன்மொழிவுகளின் முன்னேற்றம் தொடர்பான தகவல்கள் வெளியிடப்படவில்லை.

முழுமையாக நடைமுறைப்படுத்தப்பட்ட முன்மொழிவுகளில் 110 பில்லியன் ரூபாய் செலவில் அரச ஊழியர்களுக்கான சம்பள அதிகரிப்பு, ஸ்ரீலங்கன் எயார்லைன்ஸின் பழைய கடன்களைத் தீர்ப்பதற்கான 20 பில்லியன் ரூபாய் ஒதுக்கீடு, சிரேஷ்ட பிரஜைகளுக்கான வட்டி மானியத் திட்டத்திற்கு ஒதுக்கப்பட்ட 15 பில்லியன் ரூபாய் மற்றும் ஓய்வூதியத் திருத்தங்களுக்கான 10 பில்லியன் ரூபாய் ஆகியவை அடங்குகின்றன.

மேலும், நெல் பாதுகாப்பு இருப்புகளைப் பராமரிப்பதற்கான 5 பில்லியன் ரூபாய், கிராமப்புற வீதிகள் மற்றும் பாலங்களுக்கான 4 பில்லியன் ரூபாய், பொதுப் போக்குவரத்து நவீனமயமாக்கலுக்கான 3 பில்லியன் ரூபாய் மற்றும் ஐந்தாம் தர புலமைப்பரிசில் கொடுப்பனவை அதிகரிப்பதற்கான ஒரு பில்லியன் ரூபாய் ஆகிய முன்மொழிவுகளும் முழுமையாக நிறைவேற்றப்பட்டுள்ளன.

புதிய பணியாளர்களை ஆட்சேர்ப்பு செய்வதற்கான 10 பில்லியன் ரூபாய், டிஜிட்டல் பொருளாதாரத்தை மேம்படுத்துவதற்கான 3 பில்லியன் ரூபாய் மற்றும் அஸ்வெசும அதிகாரமளித்தல் திட்டத்திற்கான 500 மில்லியன் ரூபாய் ஆகியவை பகுதியளவில் மட்டுமே நடைமுறைப்படுத்தப்பட்டுள்ளன.

அதேவேளை, 'Clean Sri Lanka' திட்டத்திற்காக ஒதுக்கப்பட்ட 5 பில்லியன் ரூபாய் கணிசமான அளவில் நடைமுறைப்படுத்தப்பட்டுள்ளதாக ஆய்வில் குறிப்பிடப்பட்டுள்ளது.

குறைந்த முன்னேற்றம் காணப்பட்ட திட்டங்களில் மாவட்ட அபிவிருத்தி வேலைத்திட்டத்திற்கான 2 பில்லியன் ரூபாய், முல்லைத்தீவு வடுவாகல் பாலத்திற்கான ஒரு பில்லியன் ரூபாய், கிரிபாவ – எப்பாவல நீர் விநியோகத் திட்டத்திற்கான ஒரு பில்லியன் ரூபாய் மற்றும் அநுராதபுரத்தில் திண்மக் கழிவுகளை அகற்றுவதற்கான 750 மில்லியன் ரூபாய் ஆகியவை அடங்குகின்றன.

புத்தாண்டுக் காலப்பகுதியில் அத்தியாவசிய உணவுப் பொருட்களை சலுகை விலையில் வழங்குவதற்காக ஒதுக்கப்பட்ட ஒரு பில்லியன் ரூபாய் தொடர்பான முன்மொழிவு நிறைவேற்றப்படாத வாக்குறுதியாக வகைப்படுத்தப்பட்டுள்ளது.

தகவல் வெளிப்படைத்தன்மையில் முன்னேற்றம்

வரவு செலவுத் திட்ட முன்மொழிவுகளை நடைமுறைப்படுத்துவது தொடர்பான தகவல்களின் வெளிப்படைத்தன்மையிலும் குறிப்பிடத்தக்க முன்னேற்றம் ஏற்பட்டுள்ளதாக ஆய்வில் சுட்டிக்காட்டப்பட்டுள்ளது.

இதன்படி, 64 சதவீதமான முன்மொழிவுகள் தொடர்பான தகவல்கள் வெளிப்படையாகக் கிடைக்கக்கூடியவையாகவும், 28 சதவீதமானவை கட்டுப்படுத்தப்பட்ட தகவல்களாகவும், 8 சதவீதமானவை கோரிக்கையின் அடிப்படையில் வழங்கப்படக்கூடியவையாகவும் வகைப்படுத்தப்பட்டுள்ளன.

2017ஆம் ஆண்டுக்குப் பின்னர் முதன்முறையாக எந்தவொரு வரவு செலவுத் திட்ட முன்மொழிவும் 'மூடப்பட்ட தகவல்' என வகைப்படுத்தப்படவில்லை. இதன் மூலம் அனைத்து முன்மொழிவுகள் தொடர்பாகவும் குறைந்தபட்சம் சில தகவல்கள் கிடைத்துள்ளதாகத் தெரிவிக்கப்பட்டுள்ளது. எனினும், சில சந்தர்ப்பங்களில் அவை நடைமுறைப்படுத்தல் நிலையை மதிப்பிடுவதற்குப் போதுமானதாக இருக்கவில்லை.

மேலும், 36 முன்மொழிவுகளுக்காக ஒதுக்கப்பட்ட மொத்த நிதியில் 81 சதவீதமானது முழுமையாக நிறைவேற்றப்பட்ட வாக்குறுதிகளுடன் தொடர்புடையதாகவும், 3 சதவீதமானது கணிசமான அளவில் நடைமுறைப்படுத்தப்பட்ட முன்மொழிவுகளுடன் தொடர்புடையதாகவும் உள்ளது.

நிதி ஒதுக்கீடுகள் தொடர்பான தகவல் வெளிப்படைத்தன்மையைப் பொறுத்தவரையில், மொத்த ஒதுக்கீட்டில் 91 சதவீதமான நிதி, தகவல்கள் வெளிப்படையாகக் கிடைக்கக்கூடிய முன்மொழிவுகளுடன் தொடர்புடையதாகக் காணப்பட்டுள்ளது.

2025ஆம் ஆண்டுக்கான வரவு செலவுத் திட்டம் அந்த ஆண்டின் பெப்ரவரி மாதத்திலேயே சமர்ப்பிக்கப்பட்டதால், அதன் நடைமுறைப்படுத்தலுக்குக் கிடைத்த காலப்பகுதி குறைவாக இருந்தபோதிலும், முன்னேற்றம் ஏற்பட்டுள்ளதாக வெரிட்டே ரிசர்ச் சுட்டிக்காட்டியுள்ளது.

இலங்கையின் வருடாந்த வரவு செலவுத் திட்ட முன்மொழிவுகளின் நடைமுறைப்படுத்தல் நிலையை 2017ஆம் ஆண்டு முதல் வெரிட்டே ரிசர்ச் நிறுவனத்தின் PublicFinance.lk தளம் கண்காணித்து வருகின்றது.

இந்நிலையில், 2027ஆம் ஆண்டுக்கான வரவு செலவுத் திட்டம் நாளை (12) நாடாளுமன்றத்தில் சமர்ப்பிக்கப்படவுள்ள நிலையில், 2025ஆம் ஆண்டு வரவு செலவுத் திட்டத்தின் நடைமுறைப்படுத்தல் தொடர்பான இந்த ஆய்வு வெளியாகியுள்ளது.

2027ஆம் ஆண்டுக்கான வரவு செலவுத் திட்டத்தை நிதியமைச்சர் என்ற வகையில் ஜனாதிபதி அநுரகுமார திஸாநாயக்க நாளை நாடாளுமன்றத்தில் சமர்ப்பிக்கவுள்ளார்.