13 மாவட்டங்களுக்கு இடியுடன் கூடிய மின்னல் தாக்கம் தொடர்பான எச்சரிக்கை
இலங்கையின் 13 மாவட்டங்களில் இன்று (21) மாலை மற்றும் இரவு வேளைகளில் இடியுடன் கூடிய மழை பெய்யக்கூடும் என வளிமண்டலவியல் திணைக்களம் எச்சரிக்கை விடுத்துள்ளது.
இதற்கமைய, குறித்த மாவட்டங்களுக்கு அம்பர் (Amber) நிற எச்சரிக்கை அறிவிப்பு விடுக்கப்பட்டுள்ளது.
இன்று நண்பகல் 12.03 மணிக்கு வெளியிடப்பட்ட இந்த எச்சரிக்கை, நாளை (22) அதிகாலை 1.00 மணி வரை அமுலில் இருக்கும் எனத் தெரிவிக்கப்பட்டுள்ளது.
கொழும்பு, கம்பஹா, களுத்துறை, கேகாலை, நுவரெலியா, புத்தளம் மற்றும் இரத்தினபுரி ஆகிய மாவட்டங்களின் அனைத்து பிரதேச செயலகப் பிரிவுகளுக்கும் இந்த எச்சரிக்கை பொருந்தும்.
அத்துடன், காலி, கண்டி, குருநாகல், பதுளை, மாத்தறை மற்றும் மொனராகலை ஆகிய மாவட்டங்களின் சில பகுதிகளிலும் இடியுடன் கூடிய மழை பெய்வதற்கான சாத்தியம் காணப்படுவதாக அறிவிக்கப்பட்டுள்ளது.
இடியுடன் கூடிய மின்னல் தாக்கங்களினால் திறந்தவெளிகளில் இருப்பவர்களுக்கு கடுமையான காயங்கள் அல்லது உயிரிழப்புகள் ஏற்படக்கூடும் என வளிமண்டலவியல் திணைக்களம் எச்சரித்துள்ளது.
மேலும், திறந்தவெளி நடவடிக்கைகள், மின்சார விநியோகம் மற்றும் தொலைத்தொடர்பு சேவைகளும் பாதிக்கப்படக்கூடும் என்பதால், பொதுமக்கள் அவதானத்துடன் செயற்படுமாறு அறிவுறுத்தப்பட்டுள்ளனர்.