“சிறிமாவோவுக்கு ஜே.ஆர் செய்ததை மீண்டும் செய்ய வேண்டாம்” – அரசாங்கத்துக்கு தயாசிறி எச்சரிக்கை
அரசியல் எதிரிகளைத் தேர்தல் களத்திலிருந்து அகற்றுவதற்காகக் குற்றவியல் விசாரணைகளையும் சட்ட நடவடிக்கைகளையும் பயன்படுத்த வேண்டாம் என எதிர்க்கட்சி நாடாளுமன்ற உறுப்பினர் தயாசிறி ஜயசேகர அரசாங்கத்துக்கு எச்சரிக்கை விடுத்துள்ளார்.
நாடாளுமன்றத்தில் உரையாற்றிய அவர், அரசியல் எதிரிகளைச் சட்ட நடவடிக்கைகள் மூலம் தேர்தலில் போட்டியிட முடியாத நிலைக்குத் தள்ளுவது, அடுத்த தேர்தலில் மக்களை நேரடியாகச் சந்திப்பதற்கான அரசாங்கத்தின் நம்பிக்கையின்மையைக் காட்டுவதாகக் குறிப்பிட்டார்.
அரசியல் எதிரிகளைத் தேர்தலில் எதிர்கொள்ளத் துணிவிருந்தால், அந்த முடிவை மக்களிடமே விட்டுவிட வேண்டும் என்றும் அவர் வலியுறுத்தினார்.
ஊழல் எதிர்ப்புச் சட்டத்தின் 149ஆவது பிரிவு தொடர்பிலும் தயாசிறி ஜயசேகர கேள்வி எழுப்பினார். இலஞ்சம் அல்லது ஊழல் பற்றிய குற்றச்சாட்டுகளை விசாரிக்கும் ஆணைக்குழுவின் பணிப்பாளர் நாயகம் வழங்கும் சான்றிதழின் அடிப்படையில், சட்டத்தில் குறிப்பிடப்பட்டுள்ள நிபந்தனைகளுக்கு அமைய சந்தேகநபர் ஒருவரை விளக்கமறியலில் வைக்க நீதவானுக்கு அதிகாரம் வழங்கப்படுவது குறித்து அவர் கவலை வெளியிட்டார்.
எதிர்க்கட்சி நாடாளுமன்ற உறுப்பினர் நாமல் ராஜபக்ஷ தொடர்பான சட்ட நடவடிக்கைகளைச் சுட்டிக்காட்டிய அவர், இவ்வாறான சான்றிதழ்களின் பின்னணியில் உள்ள உண்மையான காரணங்களை ஆராய்ந்து, விளக்கமறியல் உத்தரவு பிறப்பிப்பதற்கு முன்னர் அவற்றைச் சவாலுக்கு உட்படுத்த நீதவான்களுக்கு போதிய அதிகாரம் உள்ளதா என்றும் கேள்வி எழுப்பினார்.
ஒருவர் குற்றவாளியா அல்லது நிரபராதியா என்பதைத் தீர்மானிப்பது நீதிமன்றங்களின் பொறுப்பு என்றாலும், விளக்கமறியலில் வைப்பதற்கான காரணங்களைச் சவாலுக்கு உட்படுத்த ஒவ்வொரு பிரஜைக்கும் உரிய வாய்ப்பு வழங்கப்பட வேண்டும் என அவர் வலியுறுத்தினார்.
மேலும், 22ஆவது அரசியலமைப்புத் திருத்தத்தின் கீழ் பதவியில் உள்ள உச்ச நீதிமன்ற நீதிபதிகளின் ஓய்வுபெறும் வயதை 65 இலிருந்து 67 ஆகவும், மேன்முறையீட்டு நீதிமன்ற நீதிபதிகளின் ஓய்வுபெறும் வயதை 63 இலிருந்து 65 ஆகவும் அதிகரித்தமை குறித்தும் அவர் கேள்வி எழுப்பினார்.
இந்த மாற்றங்களை ஏற்கனவே பதவியில் உள்ள நீதிபதிகளுக்குப் பொருந்தும் வகையில் அமுல்படுத்துவதற்குப் பதிலாக, எதிர்காலத்தில் நியமிக்கப்படும் நீதிபதிகளுக்கு மாத்திரம் நடைமுறைப்படுத்தியிருக்கலாம் என்றும் அவர் சுட்டிக்காட்டினார்.
அரசியல் முக்கியத்துவம் வாய்ந்த வழக்குகளை விசாரிக்கும் நீதிபதிகள் குழுக்களை நியமிக்கும் நடைமுறையிலும் வெளிப்படைத்தன்மை அவசியம் எனக் குறிப்பிட்ட தயாசிறி ஜயசேகர, முக்கிய வழக்குகளை விசாரிக்கும் நீதிபதிகள் குழுக்கள் தெரிவு செய்யப்படும் அடிப்படைகளையும், அதற்கான பதிவுகளையும் பகிரங்கப்படுத்த வேண்டும் எனக் கோரினார்.
இலங்கையின் அரசியல் வரலாற்றை நினைவுபடுத்திய அவர், முன்னாள் ஜனாதிபதி ஜே.ஆர். ஜயவர்தனவின் அரசாங்கம் 1980ஆம் ஆண்டு முன்னாள் பிரதமர் சிறிமாவோ பண்டாரநாயக்கவின் குடியுரிமையைப் பறித்ததன் மூலம், 1982ஆம் ஆண்டு ஜனாதிபதித் தேர்தலில் அவர் போட்டியிட முடியாத நிலையை ஏற்படுத்தியதைச் சுட்டிக்காட்டினார்.
அதேபோன்று, சட்டத்தைப் பயன்படுத்தி அரசியல் எதிரிகளைத் தேர்தல் களத்திலிருந்து அகற்றும் நடவடிக்கைகளில் தற்போதைய அரசாங்கமும் ஈடுபடக்கூடாது என அவர் எச்சரித்தார்.
“அரசியல் எதிரி ஒருவரைத் தேர்தலில் போட்டியிட முடியாத நிலைக்குத் தள்ளுவதற்காகக் குற்றவியல் சட்டத்தைப் பயன்படுத்தினால், ஜே.ஆர். சிறிமாவோவுக்கு செய்ததையே நீங்களும் அந்த அரசியல் எதிரிக்குச் செய்கிறீர்கள்” என அவர் தெரிவித்தார்.
எனினும், 1994ஆம் ஆண்டு சிறிமாவோ பண்டாரநாயக்க மீண்டும் பிரதமராகப் பதவியேற்றதை நினைவுபடுத்திய தயாசிறி ஜயசேகர, “இறுதியில் வெற்றி சிறிமாவுக்கே கிடைத்தது” எனக் குறிப்பிட்டார்.
அரசியல் சார்புகளுக்கு அப்பால் நீதித்துறையின் சுதந்திரம் பாதுகாக்கப்பட வேண்டும் என வலியுறுத்திய அவர், எதிர்க்கட்சி அரசியல்வாதிகள், அரசாங்க ஆதரவாளர்கள், தொழிற்சங்கத் தலைவர்கள் மற்றும் சாதாரண பொதுமக்கள் என அனைவருக்கும் ஒரே மாதிரியான சட்டப் பாதுகாப்பு வழங்கப்பட வேண்டும் என்றும் தெரிவித்தார்.