நீர்கொழும்பு சிறைச்சாலை மோதலில் உயிரிழந்த அதிகாரிகளுக்கு தலா 50 இலட்சம் ரூபா இழப்பீடு!
நீர்கொழும்பு சிறைச்சாலையில் 2026 ஜூலை 5 மற்றும் 6ஆம் திகதிகளில் இடம்பெற்ற மோதல்களின்போது உயிரிழந்த மற்றும் காயமடைந்த சிறைச்சாலை அதிகாரிகளுக்கு விசேட இழப்பீடு வழங்குவதற்கு அமைச்சரவை அங்கீகாரம் வழங்கியுள்ளது.
இதன்படி, மோதல்களில் உயிரிழந்த ஒவ்வொரு சிறைச்சாலை அதிகாரிக்கும் தலா 50 இலட்சம் ரூபா இழப்பீடு வழங்கப்படவுள்ளது. நிரந்தர ஊனமுற்ற அதிகாரிகளுக்கும் தலா 50 இலட்சம் ரூபா வழங்குவதற்கு தீர்மானிக்கப்பட்டுள்ளது.
அத்துடன், பகுதியளவிலான ஊனமுற்றதன் காரணமாக 100 சதவீத வருமான ஈட்டும் திறனை இழந்த அதிகாரிகளுக்கு 40 இலட்சம் ரூபாவும், தற்காலிக பகுதியளவிலான ஊனமுற்ற அதிகாரிகளுக்கு 30 இலட்சம் ரூபாவும் இழப்பீடாக வழங்கப்படவுள்ளது.
இந்த இழப்பீட்டுத் தொகைகள், பொது நிர்வாகச் சுற்றறிக்கை இலக்கம் 22/93இன் கீழ் வழங்கப்படும் இழப்பீட்டுக்கு மேலதிகமாக வழங்கப்படும் என அறிவிக்கப்பட்டுள்ளது.
நீதி மற்றும் தேசிய ஒருமைப்பாட்டு அமைச்சின் செயலாளர் தலைமையில், 2026 ஆகஸ்ட் 3ஆம் திகதி நடைபெற்ற அமைச்சரவைக் கூட்டத்தில் நியமிக்கப்பட்ட குழுவின் பரிந்துரைகளுக்கு அமைய இந்தத் தீர்மானம் எடுக்கப்பட்டுள்ளது.
குறித்த மோதல்களின்போது தமது கடமைகளை நிறைவேற்றிய வேளையில் பாதிக்கப்பட்ட சிறைச்சாலை அதிகாரிகளுக்கு வழங்கப்பட வேண்டிய இழப்பீடுகள் மற்றும் நிவாரண நடவடிக்கைகள் தொடர்பில் பரிந்துரைகளை முன்வைப்பதே இந்தக் குழுவின் பணியாக இருந்தது.
சிறைச்சாலை தந்திரோபாயப் படையை வலுப்படுத்தவும் நடவடிக்கை
இதற்கிடையில், சிறைச்சாலை தந்திரோபாயப் படையை (Prison Tactical Force) மேலும் வலுப்படுத்துவதற்கான பல்வேறு நடவடிக்கைகளுக்கும் அமைச்சரவை அங்கீகாரம் வழங்கியுள்ளது.
இதன் ஒரு பகுதியாக, குறித்த படைக்கு சட்டபூர்வ அங்கீகாரம் வழங்கும் வகையில் சிறைச்சாலைகள் கட்டளைச் சட்டத்தில் திருத்தங்களை மேற்கொள்ளவும் தீர்மானிக்கப்பட்டுள்ளது.
மேலும், தேவையான எண்ணிக்கையில் தகுதியான அதிகாரிகளை ஆட்சேர்ப்பு செய்தல், அவர்களுக்கு விசேட பயிற்சிகளை வழங்குதல், நவீன உபகரணங்களைப் பெற்றுக்கொடுத்தல் மற்றும் பொருத்தமான இடத்தில் குறித்த படைக்கெனத் தனியான தலைமையகத்தை அமைத்தல் ஆகிய நடவடிக்கைகளும் இதில் உள்ளடக்கப்பட்டுள்ளன.
குழுவின் பரிந்துரைகளுக்கு அமைய, நீதி மற்றும் தேசிய ஒருமைப்பாட்டு அமைச்சரினால் முன்வைக்கப்பட்ட இந்தப் பிரேரணைகளுக்கு அமைச்சரவை அனுமதி வழங்கியுள்ளது.
