இலங்கையின் 7 பகுதிகளில் ஆரோக்கியத்திற்குப் பாதிப்பை ஏற்படுத்தக்கூடிய அளவுக்கு காற்றின் தரம் வீழ்ச்சி
இலங்கையின் பல பகுதிகளில் காற்றின் தரம் ஆரோக்கியத்திற்குப் பாதிப்பை ஏற்படுத்தக்கூடிய அளவுக்குக் குறைந்துள்ளதாக தேசிய கட்டிட ஆராய்ச்சி நிறுவனம் தெரிவித்துள்ளது.
சனிக்கிழமை (21) கிடைக்கப்பெற்ற சமீபத்திய காற்றின் தரக் கண்காணிப்புத் தரவுகளின்படி, நாட்டின் ஏழு பகுதிகளில் காற்றின் தரச் சுட்டெண் (AQI) ஆரோக்கியத்திற்கு பாதிப்பை ஏற்படுத்தக்கூடிய நிலையை எட்டியுள்ளது.
தேசிய கட்டிட ஆராய்ச்சி நிறுவனத்தின் AirSL கண்காணிப்பு தளத்தின் தரவுகளின்படி, மன்னாரில் 153 ஆகவும், காலி கோட்டையில் 151 ஆகவும் காற்றின் தரச் சுட்டெண் பதிவாகியுள்ளது.
அத்துடன், தம்புள்ளையில் 135, ஹம்பாந்தோட்டையில் 128, பதுளையில் 120, குருநாகலில் 115 மற்றும் நுவரெலியாவில் 113 என்ற அளவிலும் காற்றின் தரச் சுட்டெண் பதிவாகியுள்ளது.
குறிப்பாக, சுவாசப் பிரச்சினைகள் உள்ளவர்கள், சிறுவர்கள் மற்றும் முதியவர்கள் காற்று மாசுபாடு அதிகமாகக் காணப்படும் காலப்பகுதிகளில் நீண்ட நேரம் வெளிப்புறங்களில் இருப்பதையும், கடுமையான உடற்பயிற்சிகள் மற்றும் உடல் உழைப்பு சார்ந்த நடவடிக்கைகளில் ஈடுபடுவதையும் மட்டுப்படுத்திக்கொள்ளுமாறு அறிவுறுத்தப்பட்டுள்ளனர்.