தென்னாப்பிரிக்காவில் 10ஆவது பெண்ணின் சடலம் மீட்பு: தொடர் கொலைகளால் பரபரப்பு

தென்னாப்பிரிக்காவின் ஜோஹன்னஸ்பர்க் நகருக்கு அருகில் மேலும் ஒரு பெண்ணின் சடலம் சனிக்கிழமை கண்டெடுக்கப்பட்டுள்ளதாக அந்நாட்டு காவல்துறை தெரிவித்துள்ளது. இதன் மூலம், அப்பகுதியில் தீவிர விசாரணைக்கு உட்படுத்தப்பட்டுள்ள தொடர் கொலைச் சம்பவங்களில் பலியான பெண்களின் எண்ணிக்கை 10 ஆக உயர்ந்துள்ளது.

ஜோஹன்னஸ்பர்க்கின் கிழக்கே உள்ள எகுர்ஹுலேனி நகராட்சிக்கு உட்பட்ட பகுதியில் சுமார் 7 கிலோமீற்றர் (4.3 மைல்) சுற்றளவுக்குள், கடந்த ஜூலை மற்றும் ஆகஸ்ட் மாதங்களில் மூன்று பெண்களின் சடலங்கள் கண்டெடுக்கப்பட்டதை அடுத்து, காவல்துறையினர் விசாரணைகளைத் தொடங்கினர்.

இதனைத் தொடர்ந்து, நடப்பு மாதத்தின் தொடக்கத்தில் வெறும் 10 நாட்களுக்குள் அதே எகுர்ஹுலேனி பகுதியில் மேலும் ஆறு பெண்களின் சடலங்கள் மீட்கப்பட்டன. இச்சம்பவம், தொடர் கொலையாளி (Serial killer) அல்லது கொலையாளிகள் குழுவொன்று இக்கொலைகளுக்குக் காரணமாக இருக்கலாம் என்ற அச்சத்தைப் பொதுமக்கள் மத்தியில் ஏற்படுத்தியது.

கடந்த செப்டம்பர் 17ஆம் திகதி கண்டெடுக்கப்பட்ட ஒன்பதாவது பெண்ணின் சடலம் தொடர்பில், கடந்த வாரம் இரண்டு பெண்கள் கைது செய்யப்பட்டு அவர்கள் மீது கொலைக் குற்றம் சுமத்தப்பட்டது. கூர்மையான ஆயுதத்தால் குத்தப்பட்டு, கழுத்து அறுக்கப்பட்ட நிலையில் அப்பெண்ணின் சடலம் மீட்கப்பட்டதாகக் காவல்துறையினர் தெரிவித்தனர். இருப்பினும், கைது செய்யப்பட்ட அவ்விரு பெண்களுக்கும் ஏனைய கொலைச் சம்பவங்களுக்கும் தொடர்பிருப்பதாகக் காவல்துறையினர் இதுவரை உறுதிப்படுத்தவில்லை.

இது குறித்து தென்னாப்பிரிக்க அரச ஒளிபரப்புக் கூட்டுத்தாபனத்திற்கு (SABC) கருத்து தெரிவித்த மாகாண காவல்துறை ஆணையாளர் லெப்டினன்ட் ஜெனரல் டாமி மதோம்பெனி , ஒன்பதாவது கொலைச் சம்பவம் ஒரு தனிப்பட்ட நிகழ்வாகவே புலனாய்வாளர்களால் கருதப்படுகிறது என்றும், எனினும் ஏனைய கொலைச் சம்பவங்களுக்கு இடையே தொடர்புகள் இருப்பதற்கான சாத்தியக்கூறுகளை நிராகரிக்க முடியாது என்றும் குறிப்பிட்டுள்ளார்.

கொலை செய்யப்பட்ட முறைகளில் சில பொதுவான தன்மைகள் காணப்படுவதைக் காவல்துறையினர் கண்டறிந்துள்ள போதிலும், ஒரே நபரோ அல்லது ஒரே குழுவோ தான் அனைத்துக் கொலைகளுக்கும் காரணம் என்பதற்கான தீர்க்கமான சான்றுகள் இன்னும் கிடைக்கப்பெறவில்லை எனத் தெரிவிக்கப்பட்டுள்ளது.

சனிக்கிழமைக்கு முன்னர் சடலமாகக் கண்டெடுக்கப்பட்ட ஒன்பது பெண்களும் 20 முதல் 30 வயதிற்கு இடைப்பட்டவர்கள் எனத் தெரிகிறது. அவர்களில் பலர் ஆடைகளற்ற நிலையிலோ அல்லது அரைகுறை ஆடைகளுடனோ பிரதான வீதிகளுக்கு அருகிலுள்ள திறந்தவெளிகளில் வீசிச் செல்லப்பட்டிருந்தனர். சிக்கலான மற்றும் தொடர் வன்முறைக் குற்றங்களை ஆராயும் சிறப்புப் பிரிவான புலனாய்வு உளவியல் பிரிவின் அதிகாரிகளும் இவ்விசாரணையில் இணைக்கப்பட்டுள்ளனர்.

சனிக்கிழமை அதிகாலை மீட்கப்பட்ட பத்தாவது பெண்ணின் சடலம் குறித்தும், அவரது அடையாளம் குறித்தும் மேலதிக விபரங்களை வெளியிடுவதைக் காவல்துறையினர் தடுத்துள்ளனர்.

"சடலம் ஒன்று கண்டெடுக்கப்பட்டுள்ளதை மட்டுமே எம்மால் தற்போது உறுதிப்படுத்த முடியும். குற்றவியல் தள மேலாண்மை மற்றும் தேவையான அனைத்துத் துறை அதிகாரிகளும் தற்போது சம்பவ இடத்தில் தீவிர சோதனைகளில் ஈடுபட்டுள்ளனர்," என தென்னாப்பிரிக்க காவல் சேவை வெளியிட்டுள்ள உத்தியோகபூர்வ அறிக்கையில் தெரிவிக்கப்பட்டுள்ளது.

தென்னாப்பிரிக்காவில் பெண்களுக்கு எதிரான வன்முறைகளும் கொடூரமான குற்றச்செயல்களும் அதிகளவில் இடம்பெற்று வரும் சூழலில், எகுர்ஹுலேனி பகுதியில் இடம்பெற்று வரும் இந்தத் தொடர் கொலைச் சம்பவங்கள், பெண்களின் பாதுகாப்பு தொடர்பில் நாடு தழுவிய ரீதியில் பெரும் அதிர்வலைகளையும் கொந்தளிப்பையும் ஏற்படுத்தியுள்ளன.