தென் ஆபிரிக்காவில் விருந்தில் கொடூரத் துப்பாக்கிச் சூடு: கர்ப்பிணிப் பெண் உட்பட 11 பேர் பலி!

தென் ஆபிரிக்காவின் குவாசுலு-நதால் மாகாணத்தில் உள்ள டர்பன் நகருக்கு அருகில் அமைந்துள்ள குவாமாகுதா பகுதியில் இடம்பெற்ற கொடூரத் துப்பாக்கிச் சூட்டுச் சம்பவத்தில், கர்ப்பிணிப் பெண் ஒருவர் உட்பட 11 பேர் உயிரிழந்துள்ளனர்.

செவ்வாய்க்கிழமை இரவு வீடொன்றில் நடைபெற்ற நிகழ்வொன்றில் பங்கேற்றிருந்த 14 பேரை இலக்கு வைத்து, மூன்று துப்பாக்கிதாரிகள் இந்தத் திடீர் தாக்குதலை நடத்தியுள்ளனர்.

துப்பாக்கிச் சூடு இடம்பெற்ற இடத்திலேயே 10 பேர் உயிரிழந்த நிலையில், படுகாயமடைந்து மருத்துவமனையில் அனுமதிக்கப்பட்ட நால்வரில் ஒருவர் சிகிச்சை பலனின்றி உயிரிழந்தார். இதனையடுத்தே பலியானோரின் எண்ணிக்கை 11 ஆக அதிகரித்துள்ளதாகப் பொலிஸார் உறுதிப்படுத்தியுள்ளனர். எஞ்சிய மூவரும் தீவிர சிகிச்சைப் பிரிவில் (ICU) தொடர்ந்து சிகிச்சை பெற்று வருகின்றனர்.

தாக்குதலுக்கு இலக்கான 14 பேரில் 13 ஆண்களும் ஒரு கர்ப்பிணிப் பெண்ணும் அடங்குவர் எனத் தெரிவித்துள்ள பொலிஸார், உயிரிழந்த 11 பேரில் அந்த கர்ப்பிணிப் பெண்ணும் உள்ளடங்குவதாகக் குறிப்பிட்டுள்ளனர்.

தாக்குதலை நடத்திய நபர்கள் தப்பியோடுவதற்கு முன்னர், அங்கு நிறுத்தப்பட்டிருந்த நபர் ஒருவருக்குச் சொந்தமான வாகனத்திற்கும் தீவைத்து எரித்துவிட்டுத் தப்பிச் சென்றுள்ளனர்.

இத்தாக்குதலுக்கான துல்லியமான காரணம் இதுவரை உத்தியோகபூர்வமாக உறுதி செய்யப்படாத போதிலும், திட்டமிடப்பட்ட குற்றவியல் குழுக்களுக்கு இடையேயான பகையே இதன் பின்னணியாக இருக்கலாம் எனப் பொலிஸார் சந்தேகிக்கின்றனர். மேலும், கொல்லப்பட்டவர்களில் சிலர் ஏற்கனவே குற்றவியல் புலனாய்வுப் பிரிவின் கண்காணிப்பில் இருந்தவர்கள் என்றும் பொலிஸார் வெளிப்படுத்தியுள்ளனர்.

தப்பியோடிய மூன்று சந்தேகநபர்களையும் கைது செய்வதற்காகப் பொலிஸார் தீவிர தேடுதல் நடவடிக்கையை முடுக்கிவிட்டுள்ளனர்.

உலகளவில் மிக அதிகக் கொலை விகிதம் கொண்ட நாடுகளில் ஒன்றாகத் தென் ஆபிரிக்கா விளங்குகின்றது. நாட்டில் அதிகரித்து வரும் திட்டமிடப்பட்ட குற்றங்களைக் கட்டுப்படுத்துவதற்காக, அண்மையில் அந்நாட்டு ஜனாதிபதி சிறில் ரமபோசா இராணுவத்தைப் பொலிஸாருக்குத் துணையாகப் பாதுகாப்புப் பணியில் ஈடுபடுத்தியிருந்தமை குறிப்பிடத்தக்கது.