தாய்லாந்தில் தொடர் கனமழை: பாங்காக் நகரில் வெள்ளப்பெருக்கு; பேரிடர் பகுதியாக அறிவிப்பு

தாய்லாந்து தலைநகர் பாங்காக்கில் பெய்து வரும் தொடர் கனமழை காரணமாக நகரின் பல்வேறு பகுதிகள் வெள்ளத்தில் மூழ்கியுள்ளன. இதனால் போக்குவரத்து கடுமையாகப் பாதிக்கப்பட்டுள்ளதுடன், நூற்றுக்கணக்கான பொதுமக்கள் பாதுகாப்பான இடங்களுக்கு வெளியேற்றப்பட்டுள்ளனர். நிலைமையின் தீவிரத்தன்மையைக் கருத்திற் கொண்டு பாங்காக் நகரம் முழுவதும் பேரிடர் பகுதியாக அறிவிக்கப்பட்டுள்ளது.

கடந்த வியாழக்கிழமை பிற்பகல் முதல் பெய்து வரும் இந்த கனமழை ஞாயிற்றுக்கிழமை வரை நாட்டின் பெரும்பாலான பகுதிகளில் நீடிக்கும் என தாய்லாந்து வானிலை ஆய்வு மையம் எச்சரித்துள்ளது. பாங்காக்கின் பல பகுதிகளில் வியாழக்கிழமை முதல் திரண்ட மழைவீழ்ச்சி 30 சென்டிமீட்டரையும் (30 centimetres - 11.8 அங்குலம்) தாண்டியுள்ளதாக அதிகாரிகள் தெரிவித்தனர். நகரின் மத்திய மற்றும் கிழக்குப் பகுதிகளில் வீதிகளை மூடி வெள்ள நீர் பாய்வதால் போக்குவரத்து முற்றாக முடங்கியுள்ளது.

நகரின் அனைத்துப் பகுதிகளும் முழுமையாக நீரில் மூழ்காவிட்டாலும், அவசர நிவாரண நடவடிக்கைகளை விரைவுபடுத்துவதற்காக பாங்காக்கின் 50 மாவட்டங்களும் வெள்ளப் பேரிடர் பகுதிகளாக அறிவிக்கப்பட்டுள்ளன. தாய்லாந்து நாடு முழுவதும் உள்ள 21 மாகாணங்களில் 84,000 க்கும் மேற்பட்ட மக்கள் வெள்ளத்தால் பாதிக்கப்பட்டுள்ளனர். மக்களுக்கு அவசர எச்சரிக்கை செய்திகள் அவர்களின் கைபேசிகள் மூலமாக அனுப்பி வைக்கப்பட்டுள்ளதாக அரசு தெரிவித்துள்ளது.

கனமழை காரணமாக பாங்காக்கில் உள்ள பல வர்த்தக நிறுவனங்கள் சனிக்கிழமை மூடப்பட்டிருந்தன. வெள்ள நீர் தேங்கியுள்ள வீதிகளில் வாகனங்கள் ஊர்ந்து செல்வதையும், இருசக்கர வாகன ஓட்டிகள் தங்களது வாகனங்களை உருட்டிச் செல்வதையும் காணமுடிந்தது. பாங்காக்கிலிருந்து கிழக்கு மாகாணங்களுக்குச் செல்லும் சில பிராந்திய பேருந்து சேவைகள் இடைநிறுத்தப்பட்டுள்ளதாக அதிகாரிகள் தெரிவித்துள்ளனர்.

நகரின் மிக முக்கிய வீதிகளில் ஒன்றான பெட்சபுரி வீதியில் (Phetchaburi Road) வெள்ள நீர் பெருக்கெடுத்து ஓடுவதால் வாகனங்கள் திருப்பி அனுப்பப்பட்டு, அவ்வீதி மக்கள் நடமாட்டமின்றி காணப்படுகிறது. சில வாகனங்கள் பகுதியளவில் நீரில் மூழ்கியுள்ளன. பொதுமக்கள் குடிநீர் மற்றும் உணவுப் பொருட்களைச் சுமந்தவாறு சேறு படிந்த வெள்ள நீரில் நடந்து செல்கின்றனர்.

அதேவேளை, விமானப் போக்குவரத்து கட்டுப்பாட்டு அதிகாரிகளின் தகவல்படி, விமான நிலைய செயல்பாடுகள் இயல்பாக நடைபெற்று வந்தாலும், சில விமானங்கள் தாமதமாகலாம் எனத் தெரிவிக்கப்பட்டுள்ளது.

கனமழை குறைந்தவுடன் வெள்ள நீர் வேகமாக வடியத் தொடங்கும் என்றும், வெள்ள நீரைக் வெளியேற்றும் பணிகளில் நகர அதிகாரிகள் தீவிரமாக ஈடுபட்டு வருவதாகவும் பாங்காக் மேயர் சட்சார்ட் சித்த்புண்ட் தெரிவித்துள்ளார். நகரம் முழுவதும் 200 க்கும் மேற்பட்ட தற்காலிக முகாம்கள் அமைக்கப்பட்டுள்ளதாகவும், இதுவரை சுமார் 900 மக்கள் அம்மார்க்கமாகப் பாதுகாப்பாகத் தங்குவதற்குச் சென்றுள்ளதாகவும் அவர் மேலும் குறிப்பிட்டார்.