அமெரிக்க-சீன உச்சிமாநாடு: ஷி ஜின்பிங்கை விமான நிலையம் சென்று வரவேற்றார் ட்ரம்ப்

அமெரிக்க அதிபர் டொனால்ட் ட்ரம்ப் , சீன அதிபர் ஷி ஜின்பிங்கை (Xi Jinping) விமான நிலையத்திற்கே நேரில் சென்று வரவேற்றுள்ளார். செயற்கை நுண்ணறிவு (AI), வர்த்தகம் மற்றும் ஈரான் விவகாரம் உட்பட இரு நாடுகளுக்கும் இடையிலான பல்வேறு பதற்றமான சூழல்களைத் தணிக்கும் நோக்கில் இந்த அரசுமுறைப் பயணம் அமைந்துள்ளதாகத் தெரிவிக்கப்படுகிறது.

வாஷிங்டனுக்கு வெளியே உள்ள ‘ஜொயிண்ட் பேஸ் ஆண்ட்ரூஸ்’ ராணுவ விமான நிலையத்தில், சீன அதிபர் ஷி ஜின்பிங் மற்றும் அவரது மனைவி பெங் லியுவான் ஆகியோர் இறங்கியதும், அதிபர் ட்ரம்ப் மற்றும் முதன்மை பெண்மணி மெலனியா ட்ரம்ப் ஆகியோர் நேரில் சென்று சிவப்பு கம்பள வரவேற்பு அளித்தனர். அமெரிக்க வரலாற்றில், ஒரு நாட்டின் தலைவரை அதிபர் ஒருவர் நேரடியாக விமான நிலையத்திற்குச் சென்று வரவேற்பது மிக அரிதான நிகழ்வாகப் பார்க்கப்படுகிறது.

முன்னதாக 1962-ஆம் ஆண்டு முன்னாள் அதிபர் ஜான் எஃப். கென்னடி (John F. Kennedy) இவ்வாறான வரவேற்பை அளித்திருந்த நிலையில், நீண்ட இடைவெளிக்குப் பிறகு ட்ரம்ப் இந்த வரவேற்பை வழங்கியுள்ளார். கடந்த மே மாதம் ட்ரம்ப் சீனா சென்றிருந்தபோது அதிபர் ஷி ஜின்பிங் இத்தகைய வரவேற்பை அளிக்காதபோதிலும், அதனைப் பொருட்படுத்தாமல் ட்ரம்ப் இந்த உபசரிப்பை அளித்துள்ளார்.

இரண்டு மாத கால வர்த்தக போர் நிறுத்தம்:

இந்த உச்சமாநாட்டுச் சந்திப்பில் பெரிய அளவிலான முடிவுகள் எதுவும் எட்டப்படாது எனக் கருதப்பட்ட போதிலும், ஆரம்பத்திலேயே ஒரு முக்கிய முன்னேற்றம் ஏற்பட்டுள்ளது. எதிர்வரும் நவம்பர் மாதத்துடன் முடிவடையவிருந்த இரு நாடுகளுக்கும் இடையிலான வர்த்தகப் போர் நிறுத்த ஒப்பந்தத்தை மேலும் இரண்டு மாதங்களுக்கு, அதாவது வரும் ஜனவரி 10-ஆம் தேதி வரை நீடிப்பதாக அமெரிக்க நிதியமைச்சகம் அறிவித்துள்ளது.

இருப்பினும், அதிபர் ஷி ஜின்பிங்கின் குழுவில் முக்கிய சீன தொழிலதிபர்கள் யாரும் இடம்பெறாததால், புதிய வர்த்தக ஒப்பந்தங்கள் எதுவும் கையெழுத்தாகாது என்றே எதிர்பார்க்கப்படுகிறது.

செயற்கை நுண்ணறிவு மற்றும் ஈரான் விவகாரம்:

அமெரிக்கா மற்றும் சீனா ஆகிய இரு நாடுகளுமே தொழில்நுட்பத் துறையில் உலகளவில் ஆதிக்கம் செலுத்தப் போட்டியிட்டு வரும் நிலையில், இந்தச் சந்திப்பில் செயற்கை நுண்ணறிவு  முக்கிய பேசுபொருளாக இருக்கும் எனக் கருதப்படுகிறது. அதிபர் ட்ரம்ப் வியாழக்கிழமை அளிக்கும் அரசு விருந்தில் உலகின் முன்னணி செயற்கை நுண்ணறிவு நிறுவனங்களின் தலைவர்கள் பலர் கலந்துகொள்ளவுள்ளனர்.

அதேவேளை, மத்திய கிழக்கில் தொடர்ந்து நீடித்து வரும் ஈரான் போரில், ஈரான் நாட்டிற்கு சீனா உளவுத்துறை தகவல்களை வழங்கி உதவி வருகிறது என்ற குற்றச்சாட்டு தொடர்பிலும் தாம் அதிபர் ஷி ஜின்பிங்குடன் பேசவுள்ளதாக ட்ரம்ப் உறுதிப்படுத்தியுள்ளார்.

அரசியல் விமர்சனங்கள்:

அமெரிக்காவில் எதிர்வரும் நவம்பர் மாதம் இடைக்காலத் தேர்தல் நடைபெறவுள்ள நிலையில், உள்நாட்டுப் பொருளாதாரச் சவால்கள் மற்றும் எரிபொருள் விலை உயர்வினால் அதிபர் ட்ரம்பின் செல்வாக்கு சரிவைச் சந்தித்துள்ளது. இந்த நிலையில், சீன அதிபருக்கு அளிக்கப்படும் இந்த மிக உயரிய வரவேற்பு, ட்ரம்பின் சொந்தக் கட்சியான குடியரசுக் கட்சிக்குள்ளேயே விமர்சனங்களை உருவாக்கியுள்ளது.

"எமது படைகளின் தலைமை தளபதியான ட்ரம்ப், தாம் உபசரிக்கும் விருந்தாளி ஒரு தேர்ந்தெடுக்கப்படாத, சர்வாதிகாரி என்பதை நினைவில் கொள்ள வேண்டும்" என அமெரிக்க நாடாளுமன்றத்தின் ராணுவ சேவைகள் குழுவின் தலைவர் செனட்டர் ரோஜர் விக்கர் காரசாரமாக விமர்சித்துள்ளார்.

வெள்ளிக்கிழமை காலை வரை தொடரவுள்ள இந்த அரசுமுறைப் பயணத்தில், வெள்ளை மாளிகையின் ஓவல் அலுவலகத்தில் இரு நாட்டுத் தலைவர்களும் பங்கேற்கும் முக்கிய இருதரப்புப் பேச்சுகளும், வரலாற்று சிறப்புமிக்க அமெரிக்க ஆவணங்கள் அடங்கிய தேசிய ஆவணக்காப்பகப் பார்வையிடலும் இடம்பெறவுள்ளன.