சவூதி அரேபியாவில் வான்வழித் தாக்குதல் எச்சரிக்கை: மத்திய கிழக்கில் பதற்றம் தீவிரம்!

மத்திய கிழக்கு பிராந்தியத்தில் பதற்ற நிலை அதிகரித்து வரும் சூழலில், சவூதி அரேபியா முழுவதும் வான்வழி அச்சுறுத்தல்கள் குறித்த அவசரகால எச்சரிக்கைகள் விடுக்கப்பட்டுள்ள அதேவேளை, பிராந்தியத்தின் பல்வேறு பகுதிகளில் தாக்குதல்களும் தீவிர நடவடிக்கைகளும் பதிவாகியுள்ளன.

சவூதி அரேபியா முழுவதும் வான்வழி அச்சுறுத்தல் எச்சரிக்கை

சவூதி அரேபியாவில் "பகைமைமிக்க வான்வழி அச்சுறுத்தல்"  நிலவுவதாக எச்சரித்துள்ள சவூதி அதிகாரிகள், நாட்டின் தலைநகர் ரியாத் உட்பட பல பகுதிகளில் அவசரகால எச்சரிக்கை மணிகளை எழுப்பியுள்ளனர்.

தலைநகர் ரியாத்தில் சக்திவாய்ந்த வெடிப்புச் சத்தமொன்றும் கேட்கப்பட்டுள்ளதாக தகவல்கள் தெரிவிக்கின்றன. யேமனின் இரான் ஆதரவு பெற்ற ஹூதி கிளர்ச்சியாளர்களுடனான மோதல் தீவிரமடைந்துள்ள நிலையில், ரியாத் நகரில் இத்தகைய அவசரகால எச்சரிக்கை விடுக்கப்பட்டுள்ளமை இதுவே முதல்முறையாகும்.

பின்னர் இந்த எச்சரிக்கைகள் விலக்கிக்கொள்ளப்பட்டதுடன், உயிர்ச்சேதங்களோ அல்லது பொருட்சேதங்களோ ஏற்பட்டதாக தகவல்கள் எதுவும் வெளியாகவில்லை. இந்த வெடிப்புச் சத்தத்திற்கான காரணம் குறித்து சவூதி அதிகாரிகள் உத்தியோகபூர்வமாக எதுவும் தெரிவிக்காதபோதிலும், இதற்கு முன்னர் ஹூதி கிளர்ச்சியாளர்களால் ஏவப்பட்ட ஏவுகணைகள் மற்றும் ட்ரோன்களை அவர்கள் இடைமறித்து அழித்திருந்தமை குறிப்பிடத்தக்கது.

ஹூதி தாக்குதல்களுக்கு ஐக்கிய நாடுகள் பாதுகாப்புச் சபை கடும் கண்டனம்

ஹூதி கிளர்ச்சியாளர்களின் இராணுவ நடவடிக்கை உயர்வு மற்றும் அச்சுறுத்தல்கள் பிராந்திய மோதலை மேலும் விரிவுபடுத்தும் அபாயத்தைக் கொண்டுள்ளதாக ஐக்கிய நாடுகள் பாதுகாப்புச் சபை எச்சரித்துள்ளது.

வெள்ளிக்கிழமை இரவு கூடிய பாதுகாப்புச் சபை, இத்தாக்குதல்கள் சர்வதேச கடல்சார் பாதுகாப்புக்கும் வர்த்தகத்திற்கும் அச்சுறுத்தலாக அமைவதுடன், யேமனில் அமைதியை ஏற்படுத்துவதற்கான பிராந்திய மற்றும் சர்வதேச முயற்சிகளை சீர்குலைப்பதாகவும் சுட்டிக்காட்டியுள்ளது.

ஹூதி கிளர்ச்சியாளர்கள் ஆயுதங்கள், இராணுவப் பயிற்சிகள் மற்றும் நிதி உதவிகளைப் பெறுவதைத் தடுப்பதற்கு "நடைமுறை ரீதியிலான ஒத்துழைப்பை" நல்குமாறு உறுப்பு நாடுகளுக்கு வேண்டுகோள் விடுத்துள்ள பாதுகாப்புச் சபை, யேமன் கிளர்ச்சியாளர்கள் மீதான ஐ.நா.வின் ஆயுதத் தடையை அனைத்து நாடுகளும் கண்டிப்புடன் பின்பற்ற வேண்டும் என்றும் வலியுறுத்தியுள்ளது.

இஸ்ரேலின் 'மொசாத்' உளவு அமைப்பிற்கு உளவு பார்த்தவருக்கு இரானில் மரண தண்டனை

இஸ்ரேலின் உளவு அமைப்பான 'மொசாத்'திற்கு உளவு பார்த்த குற்றச்சாட்டில் தண்டனை விதிக்கப்பட்ட ஹொசைன் பெட்ராம் என்பவருக்கு மரண தண்டனை நிறைவேற்றப்பட்டுள்ளதாக இரான் மாநில தொலைக்காட்சி செய்தி வெளியிட்டுள்ளது.

இரான் நாட்டின் இஸ்ஃபஹான் மாகாணத்தில் அமைந்துள்ள "உணர்திறன் மிக்க இராணுவத் தளங்கள்" பற்றிய இரகசியத் தகவல்களை இவர் இஸ்ரேலுக்கு வழங்கியதாகக் குற்றம் சாட்டப்பட்டுள்ளது.

கடந்த ஆண்டு ஜூன் மாதம் அமெரிக்கா மற்றும் இஸ்ரேலினால் இரான் மீது நடத்தப்பட்ட 12 நாள் வான்வழித் தாக்குதலின் போது, ஏவுகணைத் தளங்கள் உள்ளிட்ட முக்கிய இடங்கள் இலக்கு வைக்கப்பட்டதைத் தொடர்ந்தே இவர் கைது செய்யப்பட்டதாகக் கூறப்படுகிறது. சமீபகாலமாக இரானில் மரண தண்டனைகள் அதிகரித்து வருவதாக மனித உரிமைகள் அமைப்புகள் கவலை வெளியிட்டுள்ளன.

காசாவில் இஸ்ரேல் நடத்திய தாக்குதலில் இருவர் பலி

காசா நகரின் ஷிஜையா பகுதியில் மேற்கொள்ளப்பட்ட தாக்குதலில் ஒருவர் கொல்லப்பட்டதாகவும், வடக்கே உள்ள ஜபலியா அகதிகள் முகாமில் நடந்து சென்று கொண்டிருந்த காசா சுகாதார அமைச்சின் பொது இயக்குநரின் மகன் கொல்லப்பட்டதாகவும் காசா சுகாதார அமைச்சு மற்றும் ஷிஃபா வைத்தியசாலை அதிகாரிகள் தெரிவித்துள்ளனர்.

பல இராணுவப் போராளிகளை இலக்கு வைத்து தாக்குதல் நடத்தியதாகக் குறிப்பிட்டுள்ள இஸ்ரேலிய பாதுகாப்புப் படைகள், இது குறித்த மேலதிக விபரங்களை பின்னர் வெளியிடவுள்ளதாகத் தெரிவித்துள்ளன.

கடந்த அக்டோபர் மாதம் நடைமுறைக்கு வந்த போர்நிறுத்தத்திற்குப் பிறகு கடுமையான மோதல்கள் தணிந்துள்ளபோதிலும், அன்றைய தினத்திலிருந்து இதுவரை இஸ்ரேலியத் தாக்குதல்களில் 13,780க்கும் மேற்பட்ட பாலஸ்தீனியர்கள் கொல்லப்பட்டுள்ளதாக அப்பகுதி சுகாதார அதிகாரிகள் தெரிவிக்கின்றனர்.

போரினால் சீரழிந்த காசாவில் கூடாரப் பள்ளிகளுக்குத் திரும்பும் சிறுவர்கள்

பல வருட போருக்குப் பிறகு, காசாவில் 280,000க்கும் அதிகமான சிறுவர்கள் கூடாரங்களிலும், கடுமையாக சேதமடைந்த வகுப்பறைகளிலும் கல்வி கற்கத் தொடங்கியுள்ளதாக பாலஸ்தீன அகதிகளுக்கான ஐக்கிய நாடுகளின் முகவரகம் (UNRWA) தெரிவித்துள்ளது.

நுஸைரத் பகுதியில் உள்ள பாடசாலையொன்றில் மேசைகள் கூட இல்லாத நிலையில், சிறுவர்கள் தரையில் விரிப்புகளை விரித்து அமர்ந்து கல்வி கற்கின்றனர். இருப்பினும், மீண்டும் பாடசாலைக்குத் திரும்புவது போரினால் சீர்குலைந்த தங்களின் இயல்பு வாழ்க்கையை மீட்டெடுக்கும் நம்பிக்கையைத் தருவதாக குடும்பங்கள் தெரிவிக்கின்றன.

முன்னர் இயங்கி வந்த 182 முழு வசதிகளுடன் கூடிய பாடசாலைகளில் 95 சதவீதமானவை போரினால் அழிக்கப்பட்டுவிட்டதாகத் தெரிவித்துள்ள முகவரகத்தின் கல்வித் திட்டப் பணிப்பாளர் தவ்ஃபீக் அல்-ஹூரானி, கல்விச் சூழலை பழைய நிலைக்குக் கொண்டுவர தீவிர முயற்சிகள் மேற்கொள்ளப்பட்டு வருவதாகக் குறிப்பிட்டுள்ளார்.