இந்தோனேசியக் காட்டுத்தீ: 1.75 இலட்சம் பேர் நச்சுப் புகையால் பாதிப்பு!

இந்தோனேசியாவின் சுமாத்திரா மற்றும் போர்னியோ தீவுகளில் வாரக்கணக்கில் பரவி வரும் காட்டுத்தீ மற்றும் கடுமையான நச்சுப் புகை மூட்டம் காரணமாக, கடந்த ஆகஸ்ட் மாதம் முதல் இதுவரை 1.75 இலட்சத்திற்கும் அதிகமான மக்கள் கடுமையான சுவாச நோய்களால் பாதிக்கப்பட்டுள்ளதாக அந்நாட்டின் சுகாதார அமைச்சு அதிகாரப்பூர்வமாக அறிவித்துள்ளது.

பாதிக்கப்பட்டவர்களில் 40,000-க்கும் மேற்பட்டோர் சிறுவர்களும் குழந்தைகளுமாவர். இவர்கள் சாதாரண இருமல், மூச்சுக்குழாய் அழற்சி முதல் தீவிர நியூமோனியா வரையிலான கடுமையான சுவாசக் கோளாறுகளுக்கு உள்ளாகி மருத்துவமனைகளில் சிகிச்சை பெற்று வருகின்றனர்.

‘எல் நினோ’ தாக்கமும் பேரழிவும்:

பொதுவாக ஜூலை முதல் ஒக்டோபர் வரையிலான வறட்சிக் காலத்தில் காட்டுத்தீ ஏற்படுவது வழமையாகும். எனினும், இம்முறை ‘எல் நினோ’ (El Niño) காலநிலை மாற்றத்தின் காரணமாகக் காட்டுத்தீயின் தீவிரம் கட்டுக்கடங்காமல் அதிகரித்துள்ளது.

நடப்பு ஆண்டின் ஜனவரி மாதம் முதல் இதுவரை சுமார் 8,95,657 ஹெக்டேயர் நிலப்பரப்பு முற்றிலும் தீக்கிரையாகியுள்ளது. இது பிரித்தானியாவின் லண்டன் மாநகரப் பரப்பளவை விட சுமார் ஆறு மடங்கு அதிகம் என்பது குறிப்பிடத்தக்கது. மேலும், ‘நுசந்தரா அட்லஸ்’ (Nusantara Atlas) அமைப்பின் கணிப்பின்படி, நாடு முழுவதும் 7,34,000-க்கும் மேற்பட்ட தீப்பற்றல் மையங்கள்  கண்டறியப்பட்டுள்ளன.

அண்டை நாடுகளிலும் தொடரும் பாதிப்பு:

இந்தோனேசியாவில் நிலவும் இந்த நச்சுப் புகை மூட்டம் அந்நாட்டை மட்டுமன்றி, அண்டை நாடுகளான மலேசியா, சிங்கப்பூர் மற்றும் பிலிப்பைன்ஸ் ஆகிய நாடுகளுக்கும் பரவியுள்ளது. இதனால் அந்நாடுகளின் காற்றுத் தரம் பெருமளவில் சரிவடைந்துள்ளது.

புகைமூட்டம் காரணமாக இந்தோனேசியா மற்றும் மலேசியாவின் பல பகுதிகளில் பாடசாலைகள் தற்காலிகமாக மூடப்பட்டுள்ளதுடன், சுவாசப் பிரச்சினைகளுடன் மருத்துவமனைகளை நாடுவோரின் எண்ணிக்கையும் சடுதியாக அதிகரித்துள்ளது.

அத்துடன், தீவிரமாகப் பாதிக்கப்பட்ட மேற்கு கலிமந்தன் பகுதியில் பரவிய நச்சுப் புகையினால், அழிவின் விளிம்பிலுள்ள அரிய வகை ஒராங்குட்டான் (Orangutan) ஒன்று உயிரிழந்த சம்பவமும் சுற்றுச்சூழல் ஆர்வலர்கள் மத்தியில் பெரும் சோகத்தை ஏற்படுத்தியுள்ளது.

தீயைக் கட்டுப்படுத்த தீவிர நடவடிக்கை:

காட்டுத்தீயைக் கட்டுப்படுத்தும் பணியில் 54,000-க்கும் மேற்பட்ட தீயணைப்பு வீரர்கள் மற்றும் இராணுவத்தினர் ஈடுபடுத்தப்பட்டுள்ளனர். அத்துடன், 64 ஹெலிகொப்டர்கள் மூலம் வான்வழியாக நீர் தெளித்துத் தீயை அணைக்கும் தீவிர முயற்சிகள் மேற்கொள்ளப்பட்டு வருகின்றன.

மேலும், ஜப்பான் தற்காப்புப் படையினரின் தொழிநுட்ப உதவியுடன் மேக விதைப்பு முறையைப் பயன்படுத்திச் செயற்கை மழையை உருவாக்கித் தீயைக் கட்டுப்படுத்தும் நடவடிக்கைகளும் முன்னெடுக்கப்பட்டு வருகின்றன.

அரசுக்கு எதிராக வழக்குத் தாக்கல்:

இதனிடையே, தொடர்ச்சியாக ஏற்பட்டு வரும் இந்த இயற்கை மற்றும் சுற்றுச்சூழல் பேரழிவைத் தடுக்கத் தவறியதாகக் குற்றம்சாட்டி, அந்நாட்டின் பழங்குடியின மக்களும் சுற்றுச்சூழல் சமூக செயற்பாட்டாளர்களும் மத்திய மற்றும் மாநில அரசுகளுக்கு எதிராக நீதிமன்றத்தில் வழக்குத் தொடர்ந்துள்ளனர்.