ஏ.டி.எம். அட்டை மோசடி: சந்தேகப் பெண்ணைத் தேடும் பொலிஸார் – பொதுமக்களிடம் உதவி கோரிக்கை

மற்றொரு பெண்ணின் ஏ.டி.எம். அட்டையைப் பயன்படுத்தி பணம் எடுத்ததாகச் சந்தேகிக்கப்படும் பெண்ணை அடையாளம் கண்டு கைது செய்வதற்கு பொதுமக்களின் உதவியை இலங்கை பொலிஸார் கோரியுள்ளனர்.

கொழும்பு, கொஹுவல பகுதியில் இடம்பெற்றதாகக் கூறப்படும் இந்தச் சம்பவம் தொடர்பில், மொரட்டுவை, ராவத்தவத்தைப் பகுதியில் வசிக்கும் பெண்ணொருவரின் ஏ.டி.எம். அட்டையைப் பயன்படுத்தி அனுமதியின்றிப் பணம் பெற்றுக்கொண்டதாகக் கூறி, 2025 செப்டெம்பர் 26ஆம் திகதி கொஹுவல பொலிஸ் நிலையத்தில் முறைப்பாடு பதிவு செய்யப்பட்டுள்ளது.

இதனைத் தொடர்ந்து முன்னெடுக்கப்பட்ட விசாரணைகளில், கொஹுவலையில் அமைந்துள்ள மக்கள் வங்கிக் கிளையின் ஏ.டி.எம். இயந்திரத்தைப் பயன்படுத்தி சந்தேகநபரான பெண் பணத்தைப் பெற்றுக்கொண்டுள்ளதாகத் தெரியவந்துள்ளது.

இதன்போது, குறித்த ஏ.டி.எம். இயந்திரத்தில் பொருத்தப்பட்டிருந்த சி.சி.டி.வி. கமராவின் காட்சிகளைப் பொலிஸார் பெற்றுக்கொண்டுள்ளனர். சந்தேகநபரை அடையாளம் காண்பதற்கும் அவரைக் கைது செய்வதற்கும் உதவும் வகையில், அவருடைய புகைப்படங்களையும் பொலிஸார் வெளியிட்டுள்ளனர்.

எனவே, சந்தேகநபர் தொடர்பில் ஏதேனும் தகவல்கள் தெரிந்தவர்கள் பின்வரும் தொலைபேசி இலக்கங்களுடன் தொடர்புகொள்ளுமாறு பொலிஸார் கேட்டுக்கொண்டுள்ளனர்.

- கொஹுவல பொலிஸ் நிலையப் பொறுப்பதிகாரி: 071-8591669
- கொஹுவல பொலிஸ் நிலையம்: 011-2853929

சம்பவம் தொடர்பான விசாரணைகளுக்கு உதவும் வகையில், தகவல் தெரிந்தவர்கள் முன்வந்து தகவல்களை வழங்குமாறும் பொலிஸார் பொதுமக்களிடம் கோரிக்கை விடுத்துள்ளனர்.