இந்தியாவின் உட்கட்டமைப்புத் துறை உற்பத்தி 10.9% அதிகரிப்பு – புதிய சாதனை வளர்ச்சி பதிவு
இந்தியாவின் உட்கட்டமைப்புத் துறை உற்பத்தி கடந்த ஒக்டோபர் மாதத்தில் 10.9 சதவீதம் அதிகரித்துள்ளதாக இந்திய அரசாங்கம் வெளியிட்டுள்ள உத்தியோகபூர்வ புள்ளிவிபரங்களில் தெரிவிக்கப்பட்டுள்ளது.
திருத்தியமைக்கப்பட்ட தரவுத் தொடரின் அடிப்படையில், இதுவரை பதிவான அதிகபட்ச வளர்ச்சியாக இது அமைந்துள்ளது.
நிலக்கரி உற்பத்தி, மின்சார உற்பத்தி, இரும்புத் தாது உற்பத்தி மற்றும் சீமெந்து உற்பத்தி ஆகிய துறைகளில் ஏற்பட்ட குறிப்பிடத்தக்க அதிகரிப்பே இந்த வளர்ச்சிக்கு முக்கிய காரணமாக அமைந்துள்ளது.
கடந்த செப்டெம்பர் மாதத்தில் 8.2 சதவீதமாகப் பதிவான வளர்ச்சி, ஒக்டோபர் மாதத்தில் 10.9 சதவீதமாக அதிகரித்துள்ளது.
இந்தியாவின் கைத்தொழில் உற்பத்தியில் சுமார் மூன்றில் ஒரு பங்கைக் கொண்டுள்ள ஒன்பது முக்கிய உட்கட்டமைப்புத் துறைகளை உள்ளடக்கிய குறியீட்டின் அடிப்படையில் இந்த வளர்ச்சி கணக்கிடப்பட்டுள்ளது. கடந்த ஜூன் மாதம் 2022–23ஆம் ஆண்டை அடிப்படை ஆண்டாகக் கொண்டு இந்தத் தரவுத் தொடர் திருத்தியமைக்கப்பட்டது.
ஒக்டோபர் மாதத்தில் நிலக்கரி உற்பத்தி 23.1 சதவீதத்தாலும், மின்சார உற்பத்தி 21.6 சதவீதத்தாலும் அதிகரித்துள்ளன. அதேவேளை, இரும்புத் தாது உற்பத்தி 26.4 சதவீத வளர்ச்சியைப் பதிவு செய்துள்ளது.
சீமெந்து உற்பத்தி செப்டெம்பர் மாதத்தில் பதிவான 10.1 சதவீத வளர்ச்சியிலிருந்து ஒக்டோபரில் 15.4 சதவீதமாக அதிகரித்துள்ளது. உருக்கு உற்பத்தியும் முந்தைய மாதத்தின் 5.6 சதவீதத்திலிருந்து 7.3 சதவீதமாக உயர்ந்துள்ளது.
எண்ணெய் சுத்திகரிப்புப் பொருட்களின் உற்பத்தி 3.4 சதவீத வளர்ச்சியைப் பதிவு செய்துள்ள போதிலும், செப்டெம்பர் மாதத்தில் காணப்பட்ட 8.7 சதவீத வளர்ச்சியுடன் ஒப்பிடுகையில் அது வீழ்ச்சியடைந்துள்ளது.
எனினும், சில துறைகளில் உற்பத்தி வீழ்ச்சியும் தொடர்கிறது. கச்சா எண்ணெய் உற்பத்தி 4.1 சதவீதத்தாலும், இயற்கை எரிவாயு உற்பத்தி 7.6 சதவீதத்தாலும் வீழ்ச்சியடைந்துள்ளன. உர உற்பத்தியும் 12.2 சதவீத வீழ்ச்சியைப் பதிவு செய்துள்ளது.
இதேவேளை, 2026ஆம் ஆண்டு ஏப்ரல் முதல் ஒக்டோபர் வரையான ஏழு மாத காலப்பகுதியில் இந்தியாவின் உட்கட்டமைப்புத் துறை உற்பத்தி 6 சதவீதத்தால் வளர்ச்சியடைந்துள்ளது. கடந்த ஆண்டின் இதே காலப்பகுதியில் இந்த வளர்ச்சி 2.3 சதவீதமாக மாத்திரமே காணப்பட்டது.
இந்தப் புள்ளிவிபரங்கள் இந்தியாவின் எரிசக்தி, சுரங்கத் தொழில் மற்றும் கட்டுமானப் பொருட்கள் உற்பத்தி உள்ளிட்ட முக்கிய கைத்தொழில் துறைகளில் வலுவான வளர்ச்சி ஏற்பட்டுள்ளதை எடுத்துக்காட்டுகின்றன.