தெரு கிரிக்கெட் விளையாடி இந்தியப் பயணத்தை ஆரம்பித்த பிரித்தானிய இளவரசர் வில்லியம் – இளவரசி கேட்!
பிரித்தானிய இளவரசர் வில்லியம் மற்றும் இளவரசி கேட் மிடில்டன் ஆகியோர், தமது மூன்று நாள் இந்தியப் பயணத்தின் முதல் நாளான திங்கட்கிழமை (16) மும்பையில் தெரு கிரிக்கெட் விளையாட்டில் பங்கேற்று பயணத்தை ஆரம்பித்துள்ளனர்.
2024ஆம் ஆண்டு புற்றுநோய்க்கான சிகிச்சையைப் பெற்ற பின்னர், இளவரசி கேட் மேற்கொள்ளும் மிக முக்கியமான வெளிநாட்டுப் பயணமாக இது அமைந்துள்ளது.
மும்பையின் தெற்குப் பகுதியில் அமைந்துள்ள வரலாற்றுச் சிறப்புமிக்க பல்லார்ட் எஸ்டேட் பகுதியில் நடைபெற்ற இந்தக் கிரிக்கெட் விளையாட்டில், புகழ்பெற்ற முன்னாள் இந்தியக் கிரிக்கெட் வீரர் சச்சின் டெண்டுல்கர் மற்றும் உள்ளூர் சிறுவர்கள் வீசிய பந்துகளை இளவரசர் வில்லியம், இளவரசி கேட் ஆகியோர் களத்தடுப்பில் ஈடுபட்டு எதிர்கொண்டனர்.
இதன்போது, பாரம்பரிய தலைக்கவசம் அணிந்த இசைக் கலைஞர்கள் மேள வாத்தியங்களை இசைத்ததுடன், அங்கு திரண்டிருந்த மக்களுடன் அரச தம்பதியினர் கலந்துரையாடி மகிழ்ந்தனர்.
மும்பை நகரின் கலாசாரத்துடன் நெருங்கிய தொடர்புடைய தெரு கிரிக்கெட், விளையாட்டு மைதானங்கள் குறைவாக உள்ள அந்நகரில் மிகவும் பிரபலமான விளையாட்டாகக் காணப்படுகிறது.
இதனைத் தொடர்ந்து, மும்பையின் மெட்ரோ ரயில் சேவையில் பயணிக்கவுள்ள அரச தம்பதியினர், காலநிலைக்கு உகந்த போக்குவரத்து முறைகளை ஊக்குவிப்பதிலும் பொருளாதார வளர்ச்சிக்கு ஆதரவளிப்பதிலும் பிரித்தானியாவுக்கும் இந்தியாவுக்கும் இடையிலான ஒத்துழைப்பை வெளிப்படுத்தும் நிகழ்விலும் பங்கேற்கவுள்ளனர்.
மேலும், செவ்வாய்க்கிழமை அறிவிக்கப்படவுள்ள 'எர்த்ஷாட்' (Earthshot Prize) விருதுகளுக்கான இறுதிப் போட்டியாளர்களையும் அவர்கள் சந்திக்கவுள்ளனர்.
2020ஆம் ஆண்டு இளவரசர் வில்லியத்தினால் ஆரம்பிக்கப்பட்ட இந்த விருது, காலநிலை மாற்றத்திற்குத் தீர்வுகளை முன்வைக்கும் திட்டங்களை ஊக்குவிக்கும் நோக்கத்தைக் கொண்டுள்ளது. இதன் கீழ் தெரிவு செய்யப்படும் ஐந்து வெற்றியாளர்களுக்கும் தலா ஒரு மில்லியன் பவுண்ட்ஸ் ஸ்டெர்லிங் நிதி வழங்கப்படுகிறது.
இந்தியப் பயணத்தின் இறுதிக்கட்டமாக, புதுடில்லியில் இந்தியப் பிரதமர் நரேந்திர மோடியையும் அரச தம்பதியினர் சந்திக்கவுள்ளனர்.
44 வயதான இளவரசி கேட், குறிப்பிடப்படாத புற்றுநோய் பாதிப்புக்காகத் தடுப்பு நோக்கிலான கீமோதெரபி சிகிச்சையைப் பெற்றிருந்தார். இதனைத் தொடர்ந்து தனது உத்தியோகபூர்வ பணிகளைக் கணிசமாகக் குறைத்திருந்தார்.
தற்போது புற்றுநோய் நிவாரண நிலையில் உள்ள அவர், படிப்படியாகப் பொது நிகழ்வுகளில் பங்கேற்பதை அதிகரித்து வருகிறார்.
2024ஆம் ஆண்டுக்குப் பின்னர், இளவரசர் வில்லியத்துடன் இணைந்து மேற்கொள்ளும் அவரது முதலாவது முக்கிய வெளிநாட்டுப் பயணம் இதுவாகும். இதற்கு முன்னர், கடந்த மே மாதம் சிறுவயது வளர்ச்சி தொடர்பான தனது பணியின் ஒரு பகுதியாக இத்தாலிக்கு இரண்டு நாள் தனிப்பட்ட பயணத்தை மேற்கொண்டிருந்தார்.