அசாமில் பேருந்து – லாரி நேருக்கு நேர் மோதல்; 26 மாணவர்கள் உயிரிழந்ததாக அச்சம்

இந்தியாவின் அசாம் மாநிலத்தில் மாணவர்கள் பயணித்த மினி பேருந்தும் லாரியும் நேருக்கு நேர் மோதிய கோர விபத்தில் 26 மாணவர்கள் உயிரிழந்திருக்கலாம் என அஞ்சப்படுகிறது. மேலும், 20-க்கும் மேற்பட்டோர் படுகாயமடைந்துள்ளனர்.

அசாம் மாநிலம் காஸிரங்கா தேசியப் பூங்காவுக்கு அருகிலுள்ள ராங்கஜன் பகுதியில் நேற்று (நவம்பர் 13) இந்த விபத்து இடம்பெற்றுள்ளது.

போகாகாட் பகுதியிலிருந்து நகோவான் நோக்கிச் சென்றுகொண்டிருந்த மினி பேருந்து மீது வேகமாக வந்த லாரி மோதியதில் இந்த விபத்து நிகழ்ந்துள்ளது. குறித்த பேருந்தில் 45-க்கும் மேற்பட்ட மாணவர்கள் பயணித்ததாகத் தெரிவிக்கப்படுகிறது.

விபத்து குறித்து தகவல் அறிந்த பொலிஸாரும் தீயணைப்புப் படையினரும் சம்பவ இடத்துக்கு விரைந்து சென்று, பேருந்தின் இடிபாடுகளுக்குள் சிக்கியிருந்தவர்களை மீட்கும் பணியில் ஈடுபட்டனர்.

இந்த விபத்தில் 26 பேர் உயிரிழந்திருக்கலாம் என அஞ்சப்படும் நிலையில், பலர் காயமடைந்துள்ளனர். அவர்களில் 20-க்கும் மேற்பட்டோர் படுகாயங்களுடன் வைத்தியசாலையில் அனுமதிக்கப்பட்டு சிகிச்சை பெற்று வருகின்றனர்.

பேருந்தும் லாரியும் பலமாக மோதிக்கொண்டதில் பேருந்து முற்றாக உருக்குலைந்துள்ளதாகத் தெரிவிக்கப்படுகிறது. படுகாயமடைந்தவர்களின் நிலை கவலைக்கிடமாக இருப்பதால் உயிரிழப்பு எண்ணிக்கை மேலும் அதிகரிக்கக்கூடும் என அஞ்சப்படுகிறது.

இது தொடர்பாக கோலாகாட் மாவட்டத்தின் சிரேஷ்ட பொலிஸ் கண்காணிப்பாளர் ஸ்வப்னநீல் தேகா தெரிவிக்கையில், பேருந்திலிருந்து பலரது சடலங்கள் மீட்கப்பட்டுள்ளதாகவும், 20-க்கும் மேற்பட்டோர் படுகாயங்களுடன் வைத்தியசாலையில் சிகிச்சை பெற்று வருவதாகவும் குறிப்பிட்டார்.

இதனிடையே, விபத்து தொடர்பாக அசாம் முதலமைச்சர் ஹிமந்த பிஸ்வா சர்மா வெளியிட்டுள்ள இரங்கல் செய்தியில், காஸிரங்கா தேசியப் பூங்காவுக்கு அருகில் இடம்பெற்ற விபத்து குறித்து மிகுந்த வேதனையடைந்துள்ளதாகவும், உயிரிழந்தவர்களின் குடும்பத்தினருக்கு ஆழ்ந்த இரங்கலையும் ஆறுதலையும் தெரிவித்துக் கொள்வதாகவும் குறிப்பிட்டுள்ளார்.