முன்மொழியப்பட்ட PSTA சட்டத்தை இரத்துச் செய்யக் கோரி யாழ்ப்பாணத்தில் கவனயீர்ப்புப் போராட்டம்!
அனுர குமார திசாநாயக்க அரசாங்கத்தினால் முன்மொழியப்பட்டுள்ள புதிய பயங்கரவாத எதிர்ப்புச் சட்ட வரைவை (PSTA) உடனடியாக இரத்துச் செய்யக் கோரி, யாழ்ப்பாணத்தில் கவனயீர்ப்புப் போராட்டமொன்று முன்னெடுக்கப்பட்டுள்ளது.
இன்றைய தினம் (09) யாழ்ப்பாண மாவட்டச் செயலகத்திற்கு முன்பாக இப்போராட்டம் இடம்பெற்றது. மன்னார் மாவட்டத்தைச் சேர்ந்த சிவில் சமூக அமைப்புகளின் கூட்டமைப்பான மெசிடோ (MESIDO) அமைப்பினால் இப் போராட்டம் ஏற்பாடு செய்யப்பட்டிருந்தது.
இலங்கையில் தற்போது நடைமுறையிலுள்ள பயங்கரவாதத் தடைச் சட்டத்திற்கு (PTA) பதிலாகவே, இந்த புதிய பயங்கரவாத எதிர்ப்புச் சட்ட வரைவு அரசாங்கத்தினால் முன்மொழியப்பட்டு வருகின்றது.
எனினும், இப் புதிய சட்ட வரைவு தொடர்பாக சிவில் சமூக அமைப்புகள், சட்டத்தரணிகள் மற்றும் மனித உரிமைச் செயற்பாட்டாளர்கள் கடுமையான கரிசனைகளையும் எதிர்ப்புகளையும் வெளிப்படுத்தி வருகின்றனர்.
குறிப்பாக, இச் சட்ட மூலத்தில் உள்ள பயங்கரவாதம் தொடர்பான தெளிவற்ற வரையறைகள், பிடியாணையின்றி கைது செய்தல் மற்றும் நீண்டகாலத் தடுப்புக் காவலில் வைப்பதற்கான அதிகாரங்கள், மக்களின் அடிப்படைச் சுதந்திரம் மற்றும் கருத்து வெளிப்பாட்டுச் சுதந்திரம் மீதான கட்டுப்பாடுகள் தொடர்பில் பல்வேறு தரப்பினராலும் கடும் விமர்சனங்கள் முன்வைக்கப்பட்டு வருகின்றன.
இக் காரணங்களினால், முன்மொழியப்பட்டுள்ள புதிய சட்ட வரைவை முழுமையாகக் கைவிடுமாறு வலியுறுத்தி, வடக்கு மற்றும் கிழக்கு மாகாணங்களின் பல்வேறு பகுதிகளில் தொடர்ச்சியான கலந்துரையாடல்களும் எதிர்ப்புப் பிரசாரங்களும் தீவிரமாக முன்னெடுக்கப்பட்டு வருகின்றமை குறிப்பிடத்தக்கது.
