சவூதி அரேபியாவின் சிவிலியன் விமாநிலையங்கள் மீதான தாக்குதல்களுக்கு இலங்கை கடும் கண்டனம்
சவூதி அரேபிய இராச்சியத்தில் உள்ள சிவிலியன் விமானநிலையங்களைக் இலக்கு வைத்து அண்மையில் மேற்கொள்ளப்பட்ட தாக்குதல்களுக்கு இலங்கை தனது பலத்த கண்டனத்தைப் பதிவுசெய்துள்ளது. உயிர்ப்பலிகளையும் பலத்த காயங்களையும் ஏற்படுத்திய இத்தாக்குதல்கள் தொடர்பில் இலங்கை அரசு தனது கவலையையும் தெரிவித்துள்ளது.
இது தொடர்பாக இலங்கை வெளிநாட்டலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சினால் வெளியிடப்பட்டுள்ள உத்தியோகபூர்வ ஊடக அறிக்கையில், இத்தாக்குதல்களில் உயிரிழந்தவர்களின் குடும்பங்களுக்கு ஆழ்ந்த இரங்கலைத் தெரிவித்துள்ளதோடு, காயமடைந்தவர்கள் விரைவாகக் குணமடையவும் பிரார்த்திப்பதாகக் குறிப்பிடப்பட்டுள்ளது.
மேலும், சவூதி அரேபிய அரசாங்கத்திற்கும் அந்நாட்டு மக்களுக்கும் இலங்கை அரசு தனது ஆதரவையும் முழுமையான ஒருமைப்பாட்டையும் வெளிப்படுத்தியுள்ளது. அத்துடன், பிராந்தியத்தில் பதற்றமான சூழ்நிலையைக் குறைக்கும் வகையில் சம்பந்தப்பட்ட அனைத்துத் தரப்பினரும் அதிகபட்ச பொறுமையைக் கடைப்பிடித்து, ஆக்கப்பூர்வமான பேச்சுவார்த்தைகளில் ஈடுபட வேண்டும் என்றும் இலங்கை வலியுறுத்தியுள்ளது.
