கொழும்பு முன்னாள் பிரதான நீதவான் திலின கமகே நீதித்துறை சேவையிலிருந்து நிரந்தரமாக நீக்கம்

கொழும்பு முன்னாள் பிரதான நீதவானும் மொறட்டுவை முன்னாள் மாவட்ட நீதிபதியுமான திலின கமகே, அவருக்கு எதிராகக் சுமத்தப்பட்ட அனைத்துக் குற்றச்சாட்டுகளிலிருந்தும் குற்றவாளியாகக் காணப்பட்டதைத் தொடர்ந்து, அவரை நீதித்துறை சேவையிலிருந்து பணிநீக்கம் செய்ய நீதிச்சேவை ஆணைக்குழு தீர்மானித்துள்ளது.

ஒழுக்காற்று விசாரணை முடிவுறும் வரை அவர் தற்காலிகமாகப் பணிப்பகிஷ்கரிப்பில் வைக்கப்பட்டிருந்த நிலையிலேயே, தற்போது இந்த இறுதி நடவடிக்கை எடுக்கப்பட்டுள்ளது.

போலியான அனுமதிப்பத்திரத்தைப் பயன்படுத்தி 'சகுரா' என்ற யானைக்குட்டியை சட்டவிரோதமாக வைத்திருந்தார் என்ற குற்றச்சாட்டுத் தொடர்பில் மேற்கொள்ளப்பட்ட ஒழுக்காற்று விசாரணையின் அடிப்படையிலேயே இந்நடவடிக்கை எடுக்கப்பட்டுள்ளது.

குறித்த குற்றச்சாட்டுகள் குறித்து மேற்கொள்ளப்பட்ட விசாரணைகளின் ஒரு பகுதியாக, மொறட்டுவை மாவட்ட நீதிபதியாகவும் நீதவானாகவும் கடமையாற்றிய திலின கமகேயைப் பணியிலிருந்து இடைநீக்கம் செய்ய நீதிச்சேவை ஆணைக்குழு 2025 ஆகஸ்ட் மாதம் நடவடிக்கை எடுத்தது. இது தொடர்பில் 2025 ஆகஸ்ட் 1 ஆம் திகதி அவருக்கு எழுத்துப்பூர்வமாக அறிவிக்கப்பட்டதுடன், 21 நாட்களுக்குள் பதிலளிக்குமாறும் கோரப்பட்டிருந்தது.

இதற்கு முன்னதாக, 2025 ஜூன் மாதம் நீதிச்சேவை ஆணைக்குழு இச்சம்பவம் தொடர்பாக அவருக்கு எதிராகக் குற்றப்பத்திரிகையைத் (charge sheet) தாக்கல் செய்திருந்தது.

சம்பவத்தின் பின்னணி

குறித்த யானைக்குட்டியைச் சட்டவிரோதமாகப் பராமரித்து வந்தமை தொடர்பாகக் குற்றப்புலனாய்வுத் திணைக்களம் (CID) மேற்கொண்ட விசாரணைகளுடன் இச்சம்பவம் தொடர்புடையதாகும். இதற்கமைய, 2015 மே மாதம் குறித்த யானைக்குட்டி வனஜீவிகள் பாதுகாப்புத் திணைக்களத்திடம் ஒப்படைக்கப்பட்டது.

அதனைத் தொடர்ந்து, 2016 ஆம் ஆண்டு கொழும்பு மேலதிக நீதவானாகத் திலின கமகே கடமையாற்றிய காலத்தில், நீதிச்சேவை ஆணைக்குழு அவரது பணிகளை முதன்முறையாக இடைநீக்கம் செய்திருந்தது.

பின்னர், 2019 நவம்பர் 7 ஆம் திகதி திலின கமகே, சந்திரரத்ன பண்டார யாதவர உள்ளிட்ட நால்வருக்கு எதிராகக் கொழும்பு மேல் நீதிமன்றத்தில் குற்றப்பத்திரிகை தாக்கல் செய்யப்பட்டது.

எனினும், போதிய சான்றுகள் இன்மையைக் சுட்டிக்காட்டி, சட்டமா அதிபர் திணைக்களம் 2021 டிசம்பர் 16 ஆம் திகதி திலின கமகே மீதான குற்றச்சாட்டுகளை வாபஸ் பெற்றிருந்தமை குறிப்பிடத்தக்கது.